ចលនានិស្សិតអំពាវនាវទៅឥស្សរជននយោបាយកម្ពុជាទាំងអស់ត្រូវរួបរួមគ្នា ហើយទាមទារឲ្យវៀតណាមប្រគល់ទឹកដីសងមកកម្ពុជាវិញ ពិសេសកោះត្រល់ដោយយោងតាមច្បាប់ជាតិនិងច្បាប់អន្តរជាតិ។
ក្នុងសេចក្តីថ្លែងការរបស់ចលនានិស្សិត ដើម្បីលទ្ធិប្រជាធិបតេយ្យ ចុះផ្សាយកាលពីថ្ងៃទី១៧ ខែមិថុនានេះ ដោយអំពាវនាវទៅខអ្នកនយោបាយខ្មែរ និងឥស្សរជនរួមមាន លោកនាយករដ្ឋមន្ត្រីហ៊ុន សែន លោក សម រង្ស៊ី និងលោក កឹម សុខា ជាដើម ត្រូវស្វែងរកដំណោះស្រាយនយោបាយរួមមួយបន្ទាន់ ដោយឈរលើគោលការណ៍ឯកភាពជាតិ និងកិច្ចសហប្រតិបត្តិការគ្នា។ សេចក្តីថ្លែងការណ៍ ក៏បានជំរុញឱ្យទាមទារឲ្យវៀតណាមប្រគល់ទឹកដីកម្ពុជា ដែលវៀតណាមឈ្លានពានទៅគ្រប់គ្រងជាពិសេសកោះត្រល់ប្រគល់មកកម្ពុជាវិញ ស្របតាមកិច្ចព្រមព្រៀងទីក្រុងប៉ារីស៍ ឆ្នាំ១៩៩១ និងឯកសារនានា ទាំងច្បាប់ជាតិនិងច្បាប់អន្តរជាតិ។
សេចក្តីថ្លែងការណ៍ដដែលបញ្ជាក់ថា ផ្អែកតាមការស្រាវជ្រាវ មានភស្តុតាងបង្ហាញថា វៀតណាមជាអ្នកទន្ទ្រានចូលកាន់កាប់ទឹកដីខ្មែរជាហូរហែមក តាមរយៈប្រើគ្រប់ឧបាយកលក្តៅត្រជាក់ និងការបញ្ជូនកងទ័ពចូលឈ្លានពានកម្ពុជាដោយខុសច្បាប់ ការបង្ហូរជនជាតិវៀតណាមខុសច្បាប់រាប់លាននាក់មករស់នៅលើទឹកដីកម្ពុជា បង្កអសន្តិសុខ បង្កើតគ្រោះដល់ទឹកដីកម្ពុជាទៀតផង។
លិខិតដដែលបន្តថា ការឈ្លានពានរបស់វៀតណាមមកលើកម្ពុជា គឺជាការគំរាមកំហែងដល់សិ្ថរភាព និងសន្តិភាពនៃប្រជាជាតិអាស៊ានផងដែរ។ ករណីនេះ វៀតណាមដែលជាសមាជិកអាស៊ាននិងជាប្រទេសហត្ថលេខីនៃកិច្ចព្រមព្រៀងទីក្រុងប៉ារីស៍ដែរនោះ ត្រូវគោរពអធិបតេយ្យ និងបូរណភាពទឹកដីកម្ពុជា៕