«ស្ថានភាពកូវីដនេះបានបង្ខំឱ្យយើងធ្វើ១០ឆ្នាំមុនអ្វីដែលយើងអាចធ្វើបាន» នេះជាការលើកឡើងរបស់រដ្ឋមន្ត្រីក្រសួងអប់រំ លោក ហង់ ជួនណារ៉ុន ក្នុងពិធីបើកការដ្ឋានជួសជុលអាគារ «មជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយ» កាលពីព្រឹកថ្ងៃទី២២ ខែមិថុនា ឆ្នាំ២០២០កន្លងទៅ។
អាគារនេះស្ថិតក្នុងបរិវេណវិទ្យាល័យព្រះស៊ីសុវត្ថិ ស្ថិតតាមបណ្ដោយផ្លូវព្រះស៊ីសុវត្ថិ កែងផ្លូវព្រះសុគន្ធមានបុណ្យ។
ថ្លែងក្នុងពិធីបើកការដ្ឋានជួសជុលអាគារនេះ រដ្ឋមន្ត្រីក្រសួងអប់រំលោក ហង់ ជួនណារ៉ុន មានប្រសាសន៍ថា ការបង្កើតមជ្ឈមណ្ឌលនេះគឺចេញពីការស្ម័គ្រចិត្តរបស់មន្ត្រី ដោយមានថវិការបស់ក្រសួង និងម្ចាស់ជំនួយមួយចំនួន ដែលលោកចាត់ទុកថា ជាការផ្ដើមឡើងដោយបាតដៃទទេសុទ្ធសាធ។
លោកបន្ថែមថា៖ «ដូច្នេះ ការរៀបចំនេះ គឺយើងរៀបចំពីបាតដៃទទេពីដំបូង ហើយបន្ទាប់មកទៀត មានការជួយគាំទ្រខ្លះពីដៃគូ។ អ៊ីចឹងដៃគូមួយចំនួនគឺគាត់ជួយគាំទ្រតាមលទ្ធភាពរបស់គាត់ព្រោះថា អត់មានអ្នកណាគេគ្រោងថាមានកូវីដនេះទេ អត់មានបានគ្រោងថវិកាជាមុនទេ»។
រដ្ឋមន្ត្រីអប់រំបានបញ្ជាក់ថា មជ្ឈមណ្ឌលអប់រំឌីជីថលនេះចែកចេញជា ៤ផ្នែក ដោយមានកន្លែងថត (ស្ទូឌីយោ) ២កន្លែង សម្រាប់ថតវីដេអូបង្រៀន សាលវេទិកាពិភាក្សាការអប់រំឌីជីថល ថ្នាក់ឆ្លាតវៃ និងកន្លែងស្ដុកទិន្នន័យ។ លោកបន្ថែមថា ក្រោយបញ្ចប់កូវីដ១៩ ក្រសួងនឹងបន្ថែមការអប់រំតាមឌីជីថលនេះក្នុងកម្មវិធីសិក្សាផងដែរ។
លោកថា៖ «យើងនឹងបង្រៀនតាមបែបចម្រុះ ទាំងអនឡាញ ទាំងនៅក្នុងថ្នាក់រៀន។ ហើយដើម្បីយើងវាយតម្លៃហើយ នៅពេលដែលយើងឃើញថា ស្ថានភាពអាចធម្មតាហើយ ទើបយើងឱ្យបង្រៀនក្នុងថ្នាក់រៀនកាន់តែច្រើន ប៉ុន្ដែ អនឡាញនៅតែបន្តក្នុងកម្រិតមួយដែលជាផ្នែកមួយនៃការបង្រៀនតាមបែបទំនើប»។
អាគារនេះនៅមិនទាន់បំពាក់ឧបករណ៍គាំទ្រដល់ការបង្រៀនតាមអនឡាញនៅឡើយទេ ដោយក្រសួងនៅត្រូវការពេលរៀបចំពី ៣ ទៅ ៤ខែទៀត។ តែទោះជាយ៉ាងណា លោកថា ការរៀបចំបន្ទប់ថត នឹងរៀបចំឱ្យបានលឿន។
រដ្ឋលេខាធិការក្រសួងអប់រំ អ្នកស្រី គឹម សេដ្ឋានី ជាអ្នកនាំផ្លូវដោយផ្ទាល់ទៅក្នុងផ្ទះវីឡាកម្ពស់ពីរជាន់ដែលជាអតីតផ្ទះសម្រាប់នាយកសាលា និងនាយករងក្នុងសម័យអាណានិគមបារាំង ដែលនឹងត្រូវរៀបចំជាមជ្ឈមណ្ឌលសិក្សាអនឡាញនេះ។
បើតាមអ្នកស្រី គឹម សេដ្ឋានី អាគារនេះត្រូវរក្សារចនាប័ទ្មដើមទាំងស្រុងពីខាងក្រៅ តែខាងក្នុងនឹងមានការបំពាក់នូវបច្ចេកវិទ្យាទំនើប ដែលបង្ហាញអត្ថន័យពីការផ្សារភ្ជាប់ការអប់រំបែបប្រពៃណី ជាមួយនឹងការអប់រំបែបឌីជីថល។
អ្នកស្រីមានប្រសាសន៍ថា៖ «ហេតុអីបានជាយើងជ្រើសរើសសាលាស៊ីសុវត្ថិ? ព្រោះសាលាស៊ីសុវត្ថិ ជាសាលាវិទ្យាល័យដំបូងគេនៅស្រុកខ្មែរ។ ស៊ីសុវត្ថិ គឺជាសាលាដែលយើងបានជ្រើសរើសដំបូងគេនៅស្រុកខ្មែរ ជាសាលារៀនជំនាន់ថ្មី សម្រាប់អនុវត្តន៍នូវកម្មវិធីថ្មីសម្រាប់ការអនុវត្តក្នុងសតវត្សទី២១។ អ៊ីចឹងហើយបានជាយើងជ្រើសរើសស៊ីសុវត្ថិ។ ហើយដូចខ្ញុំជម្រាបអ៊ីចឹង គោលគំនិត គឺការផ្សារភ្ជាប់អ្វីដែលជាប្រវត្តិសាស្ត្រពីសម័យបុរាណមក ទៅយុគសម័យនៃការអប់រំបច្ចេកវិទ្យា»។
នៅផ្នែកខាងលើនៃអាគារ នឹងត្រូវរៀបចំជាបន្ទប់ស្ទូឌីយោចំនួនពីរ ដែលមានមួយជាបន្ទប់ធំ ដោយមានបន្ទប់គ្រប់គ្រងមួយ។ នៅផ្នែកខាងក្រោម នឹងត្រូវរៀបចំជាបន្ទប់កុំព្យូទ័រ បន្ទប់ឆ្លាតវៃ និងសាលវេទិកាឌីជីថល។
អ្នកស្រី គឹម សេដ្ឋានី បន្ថែមថា៖ «កន្លែងនេះ គឺមិនមែនជារបស់សាលាស៊ីសុវត្ថិទេ គឺជារបស់ក្រសួង ដោយសារតែបន្ទប់កុំព្យូទ័រ ឬបន្ទប់ឆ្លាតវ័យជាដើម គឺក្រសួងជាអ្នករៀបចំ ហើយនៅពេលមានកម្មវិធីអីផ្សេង ដូចជា Technovation ឬអ្វីៗទាក់ទងនឹងបច្ចេកវិទ្យា គឺយើងនឹងរៀបចំ ហើយយើងនឹងរៀបចំជាកម្មវិធីសម្រាប់ឱ្យសិស្សចូលរួមបាន។ ឧទាហរណ៍នៅ Smart Classroom យើងបំពាក់នូវឧបករណ៍ Visual Equipment អីជាដើម អ៊ីចឹងយើងអាចរៀប Tour ដើម្បីឱ្យសាលាគាត់អាចមកចូលរួមនូវអ្វីដែលជាបច្ចេកវិទ្យាថ្មីៗពាក់ព័ន្ធនឹងការអប់រំនេះ»។
ក្រោយកម្ពុជារកឃើញជំងឺកូវីដ១៩ក្នុងប្រទេសកាលពីដើមឆ្នាំនេះ ក្រសួងអប់រំ ដោយបារម្ភពីការឆ្លងរាលដាលជំងឺកូវីដ១៩ទៅកាន់សិស្សនិស្សិត នៅថ្ងៃទី១៦ ខែមីនា បានសម្រេចឱ្យសាលាទាំងអស់នៅទូទាំងប្រទេសបិទទ្វារ និងងាកមកបង្រៀនតាមប្រព័ន្ធអនឡាញវិញ ដោយមិនទាន់កំណត់ថ្ងៃចូលរៀនវិញនៅឡើយទេ។
នាយកប្រតិបត្តិសម្ព័ន្ធគណនេយ្យភាពសង្គម លោក សន ជ័យ មានប្រសាសន៍ថា ឧបសគ្គនៃការសិក្សាតាមអនឡាញនៅកម្ពុជា គឺទាក់ទងនឹងការគ្រប់គ្រង ការតាមដានសិស្ស បច្ចេកទេសបង្រៀនរបស់គ្រូមួយចំនួនដែលមិនទាន់អាចប្រើប្រាស់បច្ចេកវិទ្យាថ្មីនេះ និងកង្វះសម្ភារក្នុងការគាំទ្រដល់សិស្សនៅមូលដ្ឋានតែម្ដង។
ទោះជាយ៉ាងណា លោកបានចាត់ទុកថា ការរៀបចំមជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយនេះ ជារឿងមួយវិជ្ជមានដល់ការអប់រំនៅកម្ពុជា។
លោកមានប្រសាសន៍ថា៖ «អ៊ីចឹង បើពួកគេទៅមួយជំហានទៀតនៅក្នុងការបន្សាំការប្រើប្រាស់ស្មាតហ្វូនឱ្យចំគោលដៅ យកទៅប្រើសម្រាប់ការរៀនសូត្រ សម្រាប់ការចែករំលែកព័ត៌មានដែលមានប្រយោជន៍សម្រាប់ការសិក្សា នេះជារឿងមួយល្អ។ ខណៈពេលនេះ យើងឃើញមានការប្រើប្រាស់ផុលផុសនូវ Facebook និង YouTube រាប់លាននាក់ក្នុងមួយថ្ងៃៗ ឥលូវនេះ គេកំពុងតែផ្ដោតតែលើការកម្សាន្តទេ។ ប៉ុន្ដែ គួរតែចេញមួយជំហានទៀតពីការកម្សាន្តទៅជាការរៀនសូត្រ ខ្ញុំគិតថាអាចទៅរួច ហើយនេះជាដំណើរវិវត្តន៍មួយដែលមិនមែនតែកើតនៅកម្ពុជា វាជានិន្នាការសកលទៅហើយ»។
រដ្ឋមន្ត្រីក្រសួងអប់រំ បានប៉ាន់ប្រមាណថា សិស្សានុសិស្សចាប់ពីថ្នាក់បឋមដល់វិទ្យាល័យមានជាង ៣លាននាក់ ក្នុងនោះ ៣០ភាគរយនៃសិស្សទាំងនោះ ពុំទទួលបានការសិក្សាតាមអនឡាញ និងការសិក្សាពីចម្ងាយបានពេញលេញនោះទេ ដោយលោកថា ក្រសួងនឹងធ្វើការវាយតម្លៃនៅពេលដែលសាលាបើកឡើងវិញក្រោយចប់វិបត្តិកូវីដ១៩។
ទោះជាយ៉ាងណា លោកបានចាត់ទុកឧបសគ្គនៃវិបត្តិកូវីដ១៩ គឺជាបទពិសោធន៍ និងជាការពង្រឹងនូវសមត្ថភាពនៃវិស័យអប់រំនៅកម្ពុជា។
លោកមានប្រសាសន៍ថា៖ «យើងអត់អរគុណកូវីដទេ! តែយើងបានប្រែក្លាយវិបត្តិកូវីដនេះជាឱកាស អ៊ីចឹងបើសិនជាយើងមិនបានខិតខំប្រឹងប្រែងកែប្រែទេ យើងក៏អត់បានបង្រៀនតាមអនឡាញដែរ។ យើងមិនអរគុណកូវីដទេ! ព្រោះវាបានបង្កើតបញ្ហាទូទាំងមនុស្សជាតិ មានកូវីដនេះធ្វើឱ្យកំណើនសេដ្ឋកិច្ចក៏ធ្លាក់ចុះ បច្ចេកវិទ្យាក៏ធ្លាក់ចុះ ស្អីៗក៏ធ្លាក់ចុះទាំងអស់ តែយើងត្រូវជម្នះកូវីដនេះ តាមរយៈការខិតខំប្រឹងប្រែង ហើយតាមរយៈការពន្លឿនការប្រើប្រាស់បច្ចេកវិទ្យាក្នុងការអប់រំ»៕
