ក្រសួងយុត្តិធម៌និងអាជ្ញាធររាជធានីភ្នំពេញនៅថ្ងៃចន្ទនេះ បានព្រមានចាត់វិធានការផ្លូវច្បាប់ចំពោះជនទាំងឡាយណាដែលប្រមូលផ្តុំទាមទារឱ្យដោះលែងលោក រ៉ុង ឈុន ដោយអាជ្ញាធរចាត់ទុកសកម្មភាពនេះថាជាទង្វើផ្ទុយនឹងច្បាប់និងជាការដាក់សម្ពាធលើស្ថាប័នតុលាការ។
ការព្រមាននេះបានធ្វើឡើងក្រោយពេលលោក រ៉ុង ឈុន ប្រធានសហភាពសហជីពកម្ពុជា ត្រូវបានអាជ្ញាធរចាប់ខ្លួនកាលពីយប់ថ្ងៃទី៣១ ខែកក្កដា និងបញ្ជូនខ្លួនទៅសាលាដំបូងរាជធានីភ្នំពេញនៅថ្ងៃបន្ទាប់។ ក្រោយពីមានការចាប់ខ្លួនលោក រ៉ុង ឈុន ក៏មានសាច់ញាតិ យុវជន និងព្រះសង្ឃជាច្រើនអង្គនាក់ បាននាំគ្នាទៅប្រមូលផ្តុំនៅមុខសាលាដំបូងរាជធានីភ្នំពេញ ដើម្បីទាមទារឱ្យតុលាការដោះលែងប្រធានសហជីពរូបនេះឱ្យមានសេរីភាពវិញ។
អ្នកនាំពាក្យក្រសួងយុត្តិធម៌ បានលើកឡើងនៅក្នុងសេចក្តីប្រកាសព័ត៌មានថា សកម្មភាពប្រមូលផ្តុំតវ៉ាទាមទារឱ្យស្ថាប័នតុលាការដោះលែងលោក រ៉ុង ឈុន នេះ ពុំមែនជាទង្វើត្រឹមត្រូវតាមច្បាប់នោះទេ ប៉ុន្តែជាការដាក់សម្ពាធលើស្ថាប័នតុលាការ ដែលអាចប្រឈមមុខនឹងការចោទប្រកាន់ពីបទព្រហ្មទណ្ឌ តាមមាត្រា៥២២នៃក្រមព្រហ្មទណ្ឌនៃព្រះរាជាណាចក្រកម្ពុជា។
អ្នកនាំពាក្យបានគូសបញ្ជាក់ថា៖ «សូមអំពាវនាវដល់បងប្អូនដែលកំពុងធ្វើសកម្មភាពខុសច្បាប់ខាងលើនេះ សូមបញ្ឈប់ជាបន្ទាន់នូវរាល់សកម្មភាពរបស់ខ្លួន មុននឹងអាជ្ញាធរមានសមត្ថកិច្ចមានវិធានការតាមច្បាប់»។
អ្នកនាំពាក្យរូបនេះបានបន្ថែមថា ក្នុងសង្គមនីតិរដ្ឋ លោក រ៉ុង ឈុន មានសិទ្ធិពេញលេញស្របតាមរដ្ឋធម្មនុញ្ញនិងតាមក្រមនីតិវិធីព្រហ្មទណ្ឌ ក្នុងការស្វែងរកនិងពឹងពាក់មេធាវី ដើម្បីការពារសុចរិតភាពនិងភាពត្រឹមត្រូវរបស់គាត់តាមផ្លូវច្បាប់ ស្របតាមនីតិវិធីនៅចំពោះមុខស្ថាប័នតុលាការ។
ស្របពេលគ្នានេះដែរ រដ្ឋបាលរាជធានីភ្នំពេញក៏បានចេញសេចក្តីណែនាំមួយដោយគូសបញ្ជាក់ថា សកម្មភាពជួបជុំប្រមូលផ្តុំនៅមុខសាលាដំបូងនោះ បានធ្វើឱ្យប៉ះពាល់ដល់ប្រក្រតីភាពសង្គម សណ្តាប់ធ្នាប់សាធារណៈ លំហូរចរាចរណ៍ និងប្រាសចាកពីគោលការណ៍ច្បាប់ស្តីពីការធ្វើបាតុកម្មដោយសន្តិវិធី។
រដ្ឋបាលរាជធានីភ្នំពេញបានបន្តថា រាល់ការជួបប្រជុំប្រមូលផ្តុំតវ៉ាទាំងអស់ ត្រូវជូនដំណឹងជាលាយលក្ខណ៍អក្សរទៅកាន់រដ្ឋបាលរាជធានីភ្នំពេញ ស្របតាមច្បាប់និងការណែនាំនានាស្តីពី ការបង្ការទប់ស្កាត់ការរីករាលដាលការចម្លងវីរុសកូវីដ១៩។
រដ្ឋបាលរាជធានីភ្នំពេញបានបញ្ជាក់ថា៖ «រាល់សកម្មភាពជួបប្រជុំប្រមូលផ្តុំដែលគ្មានការជូនដំណឹងជាលាយលក្ខណ៍អក្សរមករដ្ឋបាលរាជធានីភ្នំពេញ ត្រូវចាត់ទុកជាទង្វើខុសច្បាប់ដែលអាជ្ញាធរមានសមត្ថកិច្ចត្រូវចាត់វិធានការតាមច្បាប់ជាធរមាន»។
កាលពីថ្ងៃទី១ ខែសីហា ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួន លោក រ៉ុង ឈុន ជាបណ្តោះអាសន្ននៅពន្ធនាគារព្រៃស ក្រោមបទចោទ «ញុះញង់ឱ្យមានការប្រព្រឹត្តបទឧក្រិដ្ឋជាអាទិ៍»។
យោងតាមក្រមព្រហ្មទណ្ឌនៃព្រះរាជាណាចក្រកម្ពុជា មាត្រា៤៩៥ បទញុះញង់ឱ្យប្រព្រឹត្តបទឧក្រិដ្ឋជាអាទិ៍ អាចប្រឈមនឹងទោសជាប់ពន្ធនាគារពី៦ខែទៅ២ឆ្នាំនិងពិន័យជាប្រាក់ពី១លានរៀលទៅ៤លានរៀល៕
