ចលនានិស្សិតដើម្បីលទ្ធិប្រជាធិបតេយ្យដែលមានមូលដ្ឋាននៅសហរដ្ឋអាមេរិក បាននិយាយថា ការដែលរដ្ឋាភិបាលកម្ពុជាទទួលស្គាល់ផែនទីថ្មីខ្នាត «១លើ២៥ពាន់» គឺជាការធ្វើសម្បទានដីថ្មីបន្ថែមទៀតឱ្យទៅវៀតណាម។
ប្រធានចលនានេះ លោក ទូច វិបុល និយាយក្នុងសេចក្តីថ្លែងការណ៍នៅថ្ងៃនេះថា ទីភ្នាក់ងារសារព័ត៌មានវៀតណាម (VNA) កាលពីថ្ងៃទី០១ ខែសីហា បានចុះផ្សាយថា រដ្ឋាភិបាលកម្ពុជាបានទទួលស្គាល់ជាផ្លូវការនូវការបំប្លែងខ្នាតផែនទីពី ១លើ១០០ពាន់ (១/១០០,០០០) ទៅ ១លើ២៥ពាន់ (១/២៥,០០០) សម្រាប់កំណត់ខ្សែបន្ទាត់ព្រំដែនដែលរដ្ឋាភិបាលកម្ពុជានិងវៀតណាមបោះបង្គោលបាន៨៤ភាគរយ។
លោក ទូច វិបុល និយាយទៀតថា ផែនទីថ្មីនេះយោងតាមការចុះហត្ថលេខារវាងមេដឹកនាំនៃប្រទេសទាំងពីរថ្ងៃទី០៥ ខែតុលា ឆ្នាំ២០១៩ តបតាមមូលដ្ឋាននៃសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥។
លោក វិបុល និយាយថា៖ «ការបំប្លែងខ្នាតផែនទីទៅជា ១/២៥,០00 នេះ ទាំងខុសប្រក្រតីនិងខុសកាលៈទេសៈជាតិ គឺជាការធ្វើសម្បទានថ្មីបន្ថែមទៀតឱ្យវៀតណាមស្ងាត់ៗនិងមិនស្មោះត្រង់ជាមួយប្រជាជាតិខ្មែរ»។
ប្រធានគណៈកម្មការកិច្ចការព្រំដែនកម្ពុជា លោក វ៉ា គឹមហុង បានច្រានចោលការលើកឡើងនេះ ដោយចាត់ទុកសេចក្តីថ្លែងការណ៍របស់ក្រុមលោក ទូច វិបុល នេះថា ជាការសន្និដ្ឋានខុសពីការពិត។
លោក វ៉ា គឹមហុង ប្រាប់ថា៖ «ខ្ញុំដូចគ្មានអ្វីឆ្លើយតបទៅនឹងពួកអស់ទាំងនោះទេ។ លោកអស់ទាំងនោះតាមខ្ញុំយល់ឃើញ គាត់ធ្វើវិភាគ គាត់ធ្វើព្រំដែន គឺព្រំដែននៅលើអាកាស ជើងអត់ជាប់ដី គាត់ចេះតែថាទៅ។ អាហ្នឹងជាសិទ្ធិរបស់លោកទេ យើង[មិន]ទៅតតាំងអីទេ»។
អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន ដែលត្រូវបានចាប់ដាក់ឃុំព្រោះរិះគន់បញ្ហាព្រំដែននោះ និយាយថា ការបោះបង្គោលព្រំដែនកន្លងទៅធ្វើតាមសន្ធិសញ្ញា១៩៨៥ ក្រោមការត្រួតត្រារបស់វៀតណាមដែលថាធ្វើឱ្យកម្ពុជាខាតបង់ និងតាមសន្ធិសញ្ញាបំពេញបន្ថែមឆ្នាំ២០០៥ ផ្ទុយនឹងកិច្ចព្រមព្រៀងសន្តិភាពទីក្រុងប៉ារីស។
លោក អ៊ុំ សំអាន និយាយទៀតថា តាមរយៈសន្ធិសញ្ញានេះធ្វើឱ្យការវាស់វែងថ្មីៗរកឃើញថា ដីស្រែចម្ការរបស់កសិករខ្មែរមួយចំនួនតាមព្រំដែន រួមទាំងភូមិកំណើតរបស់ប្រធានរដ្ឋសភា លោក ហេង សំរិន ស្ថិតក្នុងដីរបស់វៀតណាម។
អ្នកឃ្លាំមើលព្រំដែនរបស់អតីតបក្សប្រឆាំងរូបនេះ ហៅផែនទីថ្មីដែលរដ្ឋាភិបាលកម្ពុជាទើបទទួលបានថ្មីនេះ ជាប្លង់រឹងរបស់វៀតណាម។
លោកថា៖ «ការធ្វើផែនទីថ្មីហ្នឹងគឺធ្វើតាមការបោះបង្គោលចូលដីខ្មែរថ្មីៗហ្នឹង មានន័យថា យួនរំលោភយកដីខ្មែរប៉ុន្មាន អាផែនទីហ្នឹងធ្វើទៅតាមការរំលោភចូលដីខ្មែររបស់ភាគីយួនហ្នឹងឯង»។
អនុប្រធានគណៈកម្មការកិច្ចការព្រំដែនកម្ពុជា លោកស្រី កុយ ពិសី និយាយលើគេហទំព័រហ្វេសប៊ុករបស់អ្នកស្រីនៅថ្ងៃចន្ទនេះថា ភាគីកម្ពុជាដឹកនាំដោយលោក វ៉ា គឹមហុង និងគណៈប្រតិភូវៀតណាមដឹកនាំដោយលោក ឡេ ហួយទ្រុង អនុរដ្ឋមន្រ្តីក្រសួងការបរទេស និងជាប្រធានគណៈកម្មការចម្រុះខណ្ឌសីមានិងបោះបង្គោលព្រំដែនគោកវៀតណាម បានជួបពិភាក្សាការងារនិងប្រគល់ទទួលផែនទីឋានលេខាព្រំដែនគោកខ្នាត ១/២៥,០០០ រវាងកម្ពុជានិងវៀតណាម នៅច្រកទ្វារព្រំដែនអន្តរជាតិម៉ុកបាយ ខេត្តតៃនិញ កាលពីថ្ងៃទី១ ខែសីហា។
អ្នកស្រី កុយ ពិសី និយាយទៀតថា៖ «សៀវភៅផែនទីឋានលេខាព្រំដែន ដែលបានចងក្រងរួច ចំនួន៥០០ច្បាប់ដើម ក្នុងនោះភាសាខ្មែរ-វៀតណាមចំនួន២៥០ច្បាប់ និងភាសាវៀតណាម-ខ្មែរចំនួន២៥០ច្បាប់ ដែលបានចងជាអាល់ប៊ុម [album] បានល្អ ត្រូវតាមបទដ្ឋានបច្ចេកទេស ដើម្បីទុកប្រើប្រាស់ក្នុងប្រទេសរៀងៗខ្លួនតទៅ»។
មន្ត្រីជំនាញកិច្ចការព្រំដែនកម្ពុជារូបនេះ អះអាងថា មាត្រដ្ឋាន ១/២៥ ០០០ នេះ បានបង្ហាញពេញលេញលទ្ធផលខណ្ឌសីមានិងបោះបង្គោលព្រំដែនប្រមាណជា៨៤ភាគរយដែលប្រទេសទាំងពីរសម្រេចបាន។ លោកស្រីថា ផែនទីនេះជាផែនទីទំនើបសម័យឌីជីថល ៤.0 ដែលបង្ហាញយ៉ាងច្បាស់លាស់ខ្សែព្រំដែន បង្គោលព្រំដែនរួម និងស្ថានភាពភូមិសាស្រ្តនៅលើដីជាក់ស្តែងបានយ៉ាងជាក់លាក់ ងាយស្រួលក្នុងការប្រើប្រាស់ មិនដូចផែនទីខ្នាត ១/១00 ០០០ នោះទេ។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា និយាយថា ការប្ដូរមាត្រដ្ឋានផែនទីមិនខុសទេ តែអ្វីដែលចម្រូងចម្រាសដែលបានកើតឡើងអាចមកពីកង្វះតម្លាភាព។
អ្នកឃ្លាំមើលរូបនេះនិយាយទៀតថា ការចោទគ្នាទៅវិញទៅមករវាងអ្នកឃ្លាំមើលនិងមន្ត្រីរដ្ឋាភិបាលពាក់ព័ន្ធការកំណត់ខ្សែបន្ទាត់ព្រំដែនជាមួយវៀតណាម វាបានកើតឡើងច្រើនឆ្នាំហើយ។
ប៉ុន្តែលោកថា ដើម្បីកុំឱ្យបញ្ហានេះនៅតែបន្តអូសបន្លាយដល់ក្មេងជំនាន់ក្រោយ រដ្ឋាភិបាលគួរលើកទឹកចិត្តឱ្យអ្នកឃ្លាំមើលបានជួបពលរដ្ឋនៅតាមព្រំដែនដែលអះអាងថាបាត់ដីស្រែ ដោយសារការបោះបង្គោលព្រំដែននិងពន្យល់ពលរដ្ឋពីផែនទីខ្នាត ១លើ២៥ពាន់ ឱ្យពលរដ្ឋបានដឹង។
លោកថា៖ «រឿងបញ្ហាជាតិ យើងមិនអាចលាក់បាំងបានទេ។ យើងអាចលាក់បាំងបានថ្ងៃហ្នឹង តែថ្ងៃខាងមុខមិនអាចលាក់បានទេ ហើយចៀសមិនផុតក្នុងការបើកកកាយឱ្យស្របច្បាប់ទេ ពីព្រោះជាកិច្ចព្រមព្រៀងនៃប្រទេសពីរ អ៊ីចឹងពលរដ្ឋនៅក្នុងហ្នឹងដែលជាម្ចាស់អំណាចគួរតែដឹងហើយ»។
កម្ពុជា-វៀតណាម មានព្រំប្រទល់ដីគោកប្រវែង១២៧០គីឡូម៉ែត បច្ចុប្បន្នបោះបាន៨៤ភាគរយនៅសស់១៤ភាគរយទៀតមិនទាន់ឯកភាពគ្នា ដែលភាគីទាំងពីររង់ចាំការគូរចម្លងផែនទីពីភាគីបារាំងពីខ្នាត «១លើ១០០ពាន់» មកខ្នាត «១លើ៥០ពាន់» វិញ៕