ក្រុមអ្នកឃ្លាំមើលសិទ្ធិមនុស្ស បានស្នើដល់រាជរដ្ឋាភិបាលដោះលែងសមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន ដោយលើកហេតុផលថា វិធានការចាប់ឃុំខ្លួននេះ រំលោភសិទ្ធិសម្តែងមតិដែលធានាដោយរដ្ឋធម្មនុញ្ញ។
លោក រ៉ុង ឈុន ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនបណ្តោះអាសន្ននៅពន្ធនាគារព្រៃស រាជធានីភ្នំពេញ កាលពីថ្ងៃសៅរ៍សប្តាហ៍មុន ក្រោមបទចោទថា ញុះញង់ឱ្យមានការប្រព្រឹត្តបទឧក្រិដ្ឋជាអាទិ៍។
សេចក្តីថ្លែងការណ៍រួមរបស់អង្គការ-សមាគមចំនួន១១៤ កាលពីថ្ងៃទី០៣ ខែសីហា ដែលក្នុងនោះរួមមាន មជ្ឈមណ្ឌលសម្ព័ន្ធភាពការងារនិងសិទ្ធិមនុស្ស អង្គការលីកាដូ និងសមាគមការពារសិទ្ធិមនុស្សអាដហុក បានលើកឡើងថា លោក រ៉ុង ឈុន ជាអ្នកតស៊ូមតិមួយរូបដែលការពារសិទ្ធិកម្មករ គ្រូបង្រៀន និងសកម្មក្នុងការឃ្លាំមើលបញ្ហាព្រំដែន។
សេចក្តីថ្លែងការណ៍បានបន្តថា៖ «ការចោទប្រកាន់ដែលធ្វើឱ្យលោក រ៉ុង ឈុន ប្រឈមនឹងការជាប់ពន្ធនាគាររហូតដល់២ឆ្នាំ គឺជាការរំលោភសិទ្ធិនិងសេរីភាពរបស់លោក ក្នុងការបញ្ចេញមតិដែលត្រូវបានធានាដោយរដ្ឋធម្មនុញ្ញនៃព្រះរាជាណាចក្រកម្ពុជា»។
សេចក្តីថ្លែងការណ៍នោះរំពឹងថា រាជរដ្ឋាភិបាលនឹងគោរពកាតព្វកិច្ចរបស់ខ្លួនដោយផ្នែកតាមរដ្ឋធម្មនុញ្ញនិងច្បាប់អន្តរជាតិ និងសង្ឃឹមថា សាលាដំបូងរាជធានីភ្នំពេញនឹងពិចារណាក្នុងការទម្លាក់ចោលការចោទប្រកាន់ទាំងអស់និងដោះលែងលោក រ៉ុង ឈុន ឱ្យមានសេរីភាពវិញក្នុងពេលឆាប់ៗនេះ។
នាយកប្រតិបត្តិមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស លោក មឿន តុលា យល់ឃើញថា ចំណាត់ការលើការចាប់ខ្លួនលោក រ៉ុង ឈុន ជាការរំលោភសិទ្ធិបញ្ចេញមតិរបស់ប្រជាពលរដ្ឋ ដែលមានចែងក្នុងរដ្ឋធម្មនុញ្ញ។
លោកថា៖ «ការចាប់ ការឃុំខ្លួនលោក រ៉ុង ឈុន វាជាភស្តុតាងមួយដែលធ្វើឱ្យសហគមន៍អឺរ៉ុបនិងសហគមន៍ផ្សេងៗទៀតមើលឃើញច្បាស់ថា កម្ពុជាយើងហាក់មិនមានចេតនាដោះស្រាយបញ្ហាដែលគេរកឃើញកន្លងមកទេ។ បញ្ហារឿងប្រជាធិបតេយ្យ បញ្ហាសិទ្ធិនុស្ស សិទ្ធិដីធ្លី ក៏ដូចសិទ្ធិពលរដ្ឋ សិទ្ធិនយោបាយ ក៏ដូចជាសិទ្ធិកម្មករនិយោជិតដែរ»។
សហភាពសហព័ន្ធអន្តរជាតិ ហៅកាត់ (ITUC) កាលពីថ្ងៃចន្ទក៏បានចេញសេចក្តីថ្លែងការណ៍ថ្កោលទោសចំពោះការចាប់ខ្លួនលោក រ៉ុង ឈុន នេះដែរ ដោយអះអាងថា លោក រ៉ុង ឈុន ជាបុគ្គលមួយរូបដែលការពារនិងជួយជំរុញលក្ខខណ្ឌការងារកម្មករឱ្យមានភាពប្រសើរឡើង។
អ្នកនាំពាក្យគណបក្សខ្មែរឈ្នះ លោក យិន ឈឿន មានប្រសាសន៍នៅថ្ងៃនេះថា រាជរដ្ឋាភិបាល គួរតែបង្ហាញពីតម្លាភាពនិងនាំក្រុមអ្នកឃ្លាំមើលករណីព្រំដែនទៅស្វែងរកការពិតនៅតំបន់ព្រំដែនដែលមានការសង្ស័យថា មានការរំលោភពីប្រទេសវៀតណាម ជាជាងការប្រើវិធានការច្បាប់ ទៅលើលោក រ៉ុង ឈុន។
លោកថា៖ «យើងចង់ឃើញការបង្ហាញមួយឱ្យមានតម្លាភាព ហើយបើសង្គមស៊ីវិលនិងអ្នកឃ្លាំមើលគាត់យល់ថាមានបញ្ហាបាត់បង់ហ្នឹង អ៊ីចឹងសុំ[ឱ្យរាជរដ្ឋាភិបាល]បង្ហាញមកឬទៅបង្ហាញដល់ទីតាំងជាក់ស្តែងឱ្យមានតម្លាភាពទាំងអស់គ្នាមក ប៉ុន្តែបែរជាប្រើវិធានការច្បាប់ទៅវិញ ខ្ញុំអត់យល់ដែរចំពោះរដ្ឋាភិបាល»។
ប្រធានក្រុមអង្គភាពអ្នកនាំពាក្យរាជរដ្ឋាភិបាល លោក ផៃ ស៊ីផាន បានប្រាប់អ្នកសារព័ត៌មានក្នុងសន្និសីទនៅថ្ងៃនេះថា កិច្ចការព្រំដែនជាកិច្ចការរបស់រដ្ឋនិងការងាររវាងប្រទេសនិងប្រទេស ដែលគ្មានជនណាម្នាក់អាចលូកលាន់បានឡើយ។
លោកថា៖ «គ្មានអង្គការណា គ្មានសកម្មជនណា ដែលអាចមានសិទ្ធិមកលូកលាន់ក្នុងសាច់រឿងនោះទេ រឿងនេះជាការងារអន្តរជាតិ ជាការងារមួយដែលយើងប្រយ័ត្នប្រយែងបំផុត យើងថ្នាក់ថ្នមសភាពការណ៍បំផុតក្នុងការដោះស្រាយបញ្ហានេះ»។
លោក ហ្វីល រ៉ូបឺតសិន អនុប្រធានប្រចាំតំបន់អាស៊ីនៅអង្គការឃ្លាំមើលសិទ្ធិមនុស្សអន្តរជាតិ បានមានប្រសាសន៍ថា លោក រ៉ុង ឈុន គ្រាន់តែនិយាយជំនួសមុខឱ្យអ្នកដែលបានអះអាងបាត់បង់ដី អំឡុងពេលមានការបោះបង្គោលព្រំដែនប៉ុណ្ណោះ ។
លោកប្រាប់តាមអ៊ីម៉ែលថា៖ «ប្រាកដណាស់ សហភាពអឺរ៉ុបគួរតែចាត់ទុកករណីចាប់ខ្លួនរបស់លោក រ៉ុង ឈុន និងស្ថានភាពដែលកំពុងបន្តនេះជាបញ្ហាដែលប្រទេសកម្ពុជាត្រូវដោះស្រាយ ជាផ្នែកនៃការឆ្លើយតបចំពោះប្រព័ន្ធអនុគ្រោះ EBA»។
គួរបញ្ជាក់ថា លោក រ៉ុង ឈុន ត្រូវបានចាប់ខ្លួនក្រោយពីលោកបានចេញសេចក្ដីថ្លែងការណ៍មួយ ស្ដីពីជម្លោះដីធ្លីរបស់ប្រជាពលរដ្ឋខ្មែរចំនួន១០៦គ្រួសារ នៅឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ជាខេត្តជាប់ព្រំដែនវៀតណាម។
ប៉ុន្តែនៅថ្ងៃទី៣១ ខែកក្កដា គណៈកម្មការកិច្ចការព្រំដែនកម្ពុជា បានចេញសេចក្តីប្រកាសមួយ ចាត់ទុកការលើកឡើងរបស់លោក រ៉ុង ឈុន ថា «មានចេតនាទុច្ចរិត» ទម្លាក់កំហុសដាក់រដ្ឋាភិបាល ។
