ក្នុងខ្សែភាពយន្តមួយចំនួន តួអង្គខ្លះមានខ្លួនជាមនុស្សក្បាលជាសត្វនាគ គោ ឬដំរីជាដើម។ អ្នកដឹកនាំរឿងអាចបង្កើតតួអង្គទាំងនោះបាន ដោយសារតែមានបច្ចេកវិទ្យាផ្សេងគឺអាចប្រើកុំព្យូទ័រដើម្បីកែប្រែនិងម្យ៉ាងទៀតនោះគឺ «ការផាត់មុខបែបច្នៃប្រឌិត» ដែលភាសាអង់គ្លេសហៅថា Special Effects Makeup។ ការផាត់មុខបែបច្នៃប្រឌិត គឺជាការលាបមុខឬដងខ្លួនឱ្យចេញជារូបរាងផ្សេងៗនិងប្លែកភ្នែកតាមការស្រមើស្រមៃ ដែលធ្វើឱ្យអ្នកមើលគិតថាជារូបពិតនៅក្នុងខ្សែភាពយន្ត។
លោក ឆាយ បូរ៉ា អ្នកដឹកនាំរឿង «ឃ្លានទៅសែនឆ្ងាយ» លើកឡើងថា ការផាត់មុខបែបច្នៃប្រឌិតនេះមានច្រើនទម្រង់ ដែលអ្នកជំនាញផាត់មុខអាចធ្វើឱ្យស្អាត អាក្រក់ ប្តូរពីក្មេងទៅចាស់ឬពីមនុស្សចាស់មកក្មេង ពីរាងកាយធម្មតាក្លាយទៅជាមានស្នាមរបួសដាច់ចេញឈាមជាដើម។
លោកបានបន្ថែមថា អ្នកមានជំនាញខ្លាំងអាចផាត់ដល់ប្រស្រីភ្នែក បាញ់ថ្នាំលើដងខ្លួនដូចជាឡាន។ ជាការពិត ការផាត់មុខគឺមិនមែនសំដៅលើតែផ្ទៃមុខទេ គឺសំដៅទៅលើដងខ្លួនទាំងមូល ដើម្បីតម្រូវសាច់រឿងផ្សេងៗរបស់អ្នកដឹកនាំរឿងឬអ្នកនិពន្ធ ឧទាហរណ៍ដូចគេសរសេរមកជាមនុស្សតែមានដុះស្នែង មានជំពុះឬស្លាប។
លោកបន្តថា៖ «ហើយវាជាមែកធាងមួយក្នុងចំណោមមែកធាងដទៃទៀតក្នុងការផលិតភាពយន្តដូចនេះហើយវាជាមុខជំនាញដែលចាំបាច់បម្រើក្នុងវិស័យភាពយន្ត។ ការផាត់មុខគឺត្រូវការអ្នកជំនាញច្បាស់លាស់ដែរ ព្រោះថា បើមិនមានជំនាញពិតប្រាកដទេ ពេលដែលថតចូលកាំមេរ៉ាទៅវាអត់ស្អាត។ ការផាត់មុខបែបច្នៃប្រឌិតគឺជាការជួយសម្រេចបំណងប្រាថ្នារបស់អ្នកនិពន្ធ ដោយប្រែក្លាយតួអង្គតាមការស្រមើស្រមៃរបស់ពួកគាត់»។
ទោះយ៉ាងណាក៏ដោយ ក្នុងភាពយន្តដែលផលិតដោយផលិតករខ្មែរ តួអង្គបែបនេះមិនសូវឃើញមានប៉ុន្មាន ព្រោះតែខ្វះធនធានមនុស្សលើវិស័យនេះ។
ប្រធាននាយកដ្ឋានភាពយន្តនៅកម្ពុជា លោក ប៉ុក បូរក្ស មានប្រសាសន៍ថា ក្នុងវិស័យភាពយន្តវាមានជំនាញច្រើនណាស់ ហើយជំនាញទាំងអស់ហ្នឹងគឺវាមានទំនាក់ទំនងប្រទាក់ក្រឡាគ្នាទាំងអស់ក្នុងការផលិតភាពយន្តមួយ ដោយចាប់ផ្តើមពីការតែងនិពន្ធ ដឹកនាំរឿង សំដែង ការថត ហើយពិសេសនោះគឺការរៀបចំផាត់មុខផ្សេងៗ។ ដោយឡែក លោកថា ការផាត់មុខបែបច្នៃប្រឌិតនេះគឺជាធាតុដ៏សំខាន់នៅក្នុងវិស័យភាពយន្តមួយ ព្រោះថា វាជួយធ្វើឱ្យដំណើររឿង ការសំដែងរបស់តួអង្គនីមួយៗមានលក្ខណៈដូចទៅនឹងការពិតដែលអ្នកនិពន្ធចង់បាន។
លោក ប៉ុក បូរក្ស បញ្ជាក់ថា៖ «ជាក់ស្ដែងចំពោះ visual effect នេះ! make up ហ្នឹង! ខ្ញុំយល់ថា វាមានលក្ខណៈពិសេសលើសពីអ្នក make up ធម្មតា ដែលអ្នក make up ធម្មតាយើងឃើញថា គាត់ផាត់សម្រាប់ចូលក្នុងពិធីអីមួយ ដោយផាត់ឱ្យស្អាត ឱ្យស ឱ្យអីអញ្ចឹងទៅ។ ក៏ប៉ុន្តែសម្រាប់ visual effect make up ជាពិសេសសម្រាប់ក្នុងវិស័យខ្សែភាពយន្តគឺជាលក្ខណៈពិសេសលើសពីអ្វីដែល make up ធម្មតាមាន គឺត្រូវធ្វើទៅតាមអ្វីដែលសាច់រឿងតម្រូវ ទាំងអាក្រក់ ទាំងល្អ ដែលវាដូចទៅនឹងការពិតអញ្ចឹង»។
កញ្ញា ឌូ ពុធមូលីតា ដែលជាអ្នកជំនាញផាត់មុខបែបច្នៃប្រឌិតនិងជាម្ចាស់ហ្វេសប៊ុកផេក «Apple Love Makeup Gallery» បានលើកឡើងថា ការផាត់មុខបែបច្នៃប្រឌិតនេះមានសារៈសំខាន់ណាស់ក្នុងវិស័យភាពយន្ត ប៉ុន្តែយើងមិនសូវឃើញមានយុវជនច្រើនឡើយងាកមកចាប់អារម្មណ៍រៀនជំនាញនេះឱ្យពិតប្រាកដ។
កញ្ញា ឌូ ពុធមូលីតា បានបញ្ចប់ការសិក្សាលើជំនាញផាត់មុខបែបច្នៃប្រឌិតនេះនៅសាលា Cinema Makeup School នៃសហរដ្ឋអាមេរិក ហើយកញ្ញាបានបន្តធ្វើការនៅលើជំនាញនេះនៅទីក្រុង Los Angles សហរដ្ឋអាមេរិក។ កញ្ញាចាប់យកជំនាញនេះ គឺកើតចេញពីការធ្វើការងារស្ម័គ្រចិត្តជាមួយនឹងមិត្តភក្តិរបស់នាងក្នុងឆ្នាំ២០១១ នៅពេលដែលនាងរៀននៅសាកលវិទ្យាល័យនៅប្រទេសកម្ពុជា ដោយធ្វើរឿងមួយទាក់ទងនឹងបិសាចដែលគេស្គាល់ថាជា Zombies។
កញ្ញាបានប្រាប់ថា៖ «យើងនៅខ្វះចំណេះដឹងច្រើនអ៊ីចឹង ជាពិសេសគឺកត្តាសង្គម ដោយសារតែការងារ ពេលបងធ្វើការពីបួនឬដប់ឆ្នាំមុនហ្នឹង គឺមិនទាន់មានអ្នកណាធ្វើទេ។ រហូតដល់ឥលូវហ្នឹងក៏មិនទាន់មានអ្នកណាធ្វើដែរ អ៊ីចឹងការងារហ្នឹងគឺប្លែកខុសពីគេ អ៊ីចឹងគឺមានសំណួរច្រើនពីខាងគ្រួសារនិងមិត្តភក្តិដែលគាត់ឆ្ងល់ថា បង់បោះបង់សាលាហើយទៅធ្វើការងារហ្នឹងគឺច្បាស់លាស់អត់? អ៊ីចឹងវាធ្វើឱ្យយើងបាក់ទឹកចិត្តនិងមិនមានទំនុកចិត្តលើខ្លួនឯង»។
កញ្ញា ឌូ ពុធមូលីតា ដែលបានទទួលអាហារូបករណ៍ទៅរៀនបន្តលើជំនាញផាត់មុខបែបច្នៃប្រឌិតនៅសហរដ្ឋអាមេរិក បានរៀបរាប់បន្តថា ការផាត់មុខឱ្យចេញជាសត្វចម្លែកឬអ្វីផ្សេង គឺអាស្រ័យលើការនិយមចូលចិត្តរបស់អ្នកទស្សនាផងដែរ។ កញ្ញាបានបន្ថែមថា អ្នកជំនាញមានការលំបាកខ្លាំង ដោយថា ពួកគេត្រូវមានការសិក្សាស្រាវជ្រាវច្រើននិងផ្តោតទៅនឹងជំនាញ ត្រូវដកពិសោធន៍ ធ្វើយ៉ាងណាឱ្យត្រូវនូវអ្វីដែលអ្នកដឹកនាំរឿងចង់បាន។
កញ្ញា ឌូ ពុធមូលីតា បានលើកឡើង៖ «បើសិនជាខ្ញុំស្រាវជ្រាវតួលក្ខណៈបែបបុរាណខ្មែរ ធម្មតាខ្ញុំប្រមូលរូបថតដែលខ្ញុំស្រឡាញ់ ក្បាច់ក្បូរ ពណ៌ឬក៏ចរិតរបស់តួអីក៏ដោយមកបូកបញ្ចូលវា ខ្ញុំដាក់វានៅលើផ្ទាំងក្តារធំមួយ ហើយខ្ញុំច្របាច់បញ្ចូលគ្នាឬអាចគូររូបរាងសិន។ បន្ទាប់មកទើបខ្ញុំផាត់ទៅលើមុខ ខ្លួន ហើយធ្វើការទៅព្រាងលើសម្លៀកបំពាក់។ ខ្ញុំត្រូវធ្វើខ្លួនឯងទាំងអស់ ទាំងសម្លៀកបំពាក់ ទាំងមកុដ គ្រឿងសម្រាប់បិទមុខ ពីព្រោះខ្ញុំចូលចិត្តគ្រប់គ្រងនូវស្នាដៃរបស់ខ្លួនឯង បើសិនជាឱ្យគេធ្វើ វាអត់ចេញដូចអ្វីដែលយើងចង់បាន»។
កញ្ញា ឌូ ពុធមូលីតា បានចូលរួមតុបតែងមុខដល់តួអង្គក្នុងរឿងអាមេរិកចំនួន១៥រឿងមកហើយ ដែលក្នុងនោះមានរឿង The Wall, Lisa and Liza, Judgement Call Airport Security Squad និង Harana ព្រមទាំងរឿងជាច្រើនទៀត។
ទៅថ្ងៃអនាគត កញ្ញាមានគម្រោងចង់បង្កើតសាលាបង្រៀនផាត់មុខបែបច្នៃប្រឌិតនេះទៅដល់យុវជនជំនាន់ក្រោយនៅប្រទេសកម្ពុជា ដោយបច្ចុប្បន្នកញ្ញាបានចំណាយពេលបង្រៀនតាមអនឡាននៅតាមបណ្តាញសង្គមហ្វេសប៊ុកផងដែរ។
លោក ជៀប សុវិជ្ជា នាយកមជ្ឈមណ្ឌលបណ្តុះបណ្តាលជំនាញ និងទទួលថតភាពយន្តបរទេសនៅកម្ពុជា (CFC) បានឱ្យដឹងថា តារាភាពយន្តបរទេសល្បីៗភាគច្រើន មានអ្នកជំនាញផាត់-តុបតែងមុខ និងសក់ប្រចាំខ្លួនរបស់គេតែម្តង សម្រាប់ធ្វើរបួស ដំបៅ រលាក។ល។
លោក ជៀប សុវិជ្ជា លើកឡើងថា៖ «ការផាត់-តុបតែងមុខបែបសិល្បៈមានច្រើនប្រភេទ ប៉ុន្តែការផាត់-តុបតែងមុខសម្រាប់អ្នកសម្តែងភាពយន្ត ជាផ្នែកមួយដាច់ដោយឡែក ដែលតម្រូវឱ្យ អ្នកផាត់-តុបតែងមុខនោះបានយល់ច្បាស់ពីសាច់រឿង ពីលក្ខណៈនៃតួអង្គនីមួយៗ ហើយតម្រូវទៅតាមឈុតឆាកនីមួយៗនៃសាច់រឿង។ ការផាត់មុខ-តុបតែងមុខតួសម្តែង ជាផ្នែកមួយសំខាន់ សម្រាប់ខ្សែភាពយន្តនៅកម្ពុជា ក៏ដូចជាទូទាំងពិភពលោក ព្រោះថា ការផាត់-តុបតែងមុខឬរាងកាយនៃតួសម្តែងនីមួយៗឱ្យសមស្របទៅតាមសាច់រឿងនិងឈុតឆាកនីមួយៗ ទើបខ្សែភាពយន្តនោះមើលទៅដូចជាការពិត»។
តាមលោក ជៀប សុវិជ្ជា នៅក្នុងប្រទេសកម្ពុជាមិនទាន់មានសាលារៀនណាដែលបើកបង្រៀនជាមុខជំនាញនេះនៅក្នុងសាកលវិទ្យាល័យនៅឡើយទេ ក្រៅពីការរៀនដោយខ្លួនឯងតាម Youtube ឬវគ្គខ្លី។ ក្រសួងវប្បធម៌ និងវិចិត្រសិល្បៈ និង CFC ធ្លាប់បានបើកវគ្គបណ្តុះបណ្តាលលើជំនាញនេះដោយឥតគិតថ្លៃចំនួន២វគ្គមកហើយ ដោយវគ្គទី០១ មានរយៈពេលពីរសប្តាហ៍ ពីថ្ងៃទី០៦ដល់ថ្ងៃទី១៧ ខែកញ្ញា ឆ្នាំ២០១០ មានសិក្ខាកាមចំនួន១២នាក់ បង្ហាត់ដោយលោក Vitchu CHAVASIT ជនជាតិថៃ និងវគ្គទី០២ មានរយៈពេលពីរសប្តាហ៍ ពីថ្ងៃទី១៥ដល់ថ្ងៃទី២៧ ខែមករា ឆ្នាំ២០១៨ មានសិក្ខាកាមចំនួន១៤នាក់ បង្ហាត់ដោយលោក Jeff CABRAL ជនជាតិហ្វីលីពីន។ បច្ចុប្បន្ន CFC នៅតែបន្តផ្តល់ការបណ្តុះបណ្តាលដល់យុវជនដែលស្រឡាញ់ចូលចិត្តជំនាញនេះនិងជំនាញផ្សេងទៀតដែលទាក់ទងនឹងវិស័យខ្សែភាពយន្ត។
ប្រភពដដែលឱ្យដឹងថា សិក្ខាកាមដែលបានមករៀនជំនាញនេះពី CFC ហើយត្រូវបាន CFC បញ្ជូនឱ្យចូលរួមអនុវត្តការងារជាមួយក្រុមថតភាពយន្តបរទេសដែលបានមកថតនៅកម្ពុជា។ សិក្ខាកាមមួយចំនួនទៀតដែលមានបទពិសោធន៍ច្រើនក្នុងការអនុវត្តការងារផ្ទាល់ជាមួយផលិតកម្មបរទេស មានមួយចំនួនកំពុងធ្វើការយ៉ាងមមាញឹកជាមួយផលិតកម្មក្នុងស្រុក ខ្លះទៀតគាត់បើកអាជីវកម្មផ្ទាល់ខ្លួនលើផ្នែកនេះ និងមានមួយចំនួនទៀតឈានដល់ការបើកបង្ហាត់បង្រៀនសិស្សលើផ្នែកផាត់-តុបតែងមុខនេះទៀតផង៕
ដោយ៖ ជី វ៉ា