ក្រសួងរ៉ែ និងថាមពល កំណត់បទប្បញ្ញត្តិបច្ចេកទេសសុវត្ថិភាពសន្និធិ (ទុកដាក់) ឧស្ម័នអិលភីជី(LPG)ឬហ្គាស និងប្រេងរំអិលក្នុងកំប៉ុងឬធុង ដើម្បីលក់និងប្តូរដល់យានយន្ត សម្រាប់អាជីវកម្មលក់ហ្គាសនិងប្រេងរំអិល សំដៅលើកកម្ពស់សុវត្ថិភាពនិងសណ្តាប់ធ្នាប់សាធារណៈ។
ប្រកាសរបស់ក្រសួងដែលបានផ្សព្វផ្សាយនៅថ្ងៃពុធនេះ បានតម្រូវឱ្យរូបវន្តបុគ្គលឬនីតិបុគ្គលដែលធ្វើសកម្មភាពលក់ហ្គាសក្នុងកំប៉ុងឬធុង ត្រូវគោរពតាមបទប្បញ្ញត្តិបច្ចេកទេសសុវត្ថិភាព ក្នុងនោះ សំបកកំប៉ុងផ្ទុកហ្គាសដែលយកមកលក់ ត្រូវធ្វើពីលោហៈធាតុដែលអាចធន់នឹងសម្ពាធ ហើយមានចំណុះចាប់ពី៣០០ក្រាមចុះក្រោម និងសំបកធុងផ្ទុកហ្គាសត្រូវមានចំណុះពី៤៨គីឡូក្រាមចុះក្រោម។
ប្រកាសដដែលក៏បានតម្រូវឱ្យទីតាំងឃ្លាំង/ស្តង់ស្តុកធុងហ្គាស ត្រូវស្ថិតនៅជាន់ផ្ទាល់ដីរាបស្មើ ស្ងួត រឹងមាំ ខ្ពស់ជាងឬស្មើទៅនឹងតាំងនៅជុំវិញ និងត្រូវមានសសរជញ្ជាំងនិងដំបូលធ្វើពីធាតុមិនងាយឆេះ និងមានប្រព័ន្ធរន្ធខ្យល់ចេញចូលផ្នែកខាងលើនិងខាងក្រោម។
ប្រកាសរបស់ក្រសួងក៏បានកំណត់ចម្ងាយរបស់ទីតាំងឃ្លាំង/ស្តង់ពីជញ្ជាំងលំនៅឋានអ្នកជិតខាងឬព្រំរបងនៃការដ្ឋានដែលស្ថិតនៅក្បែរ និងត្រូវស្ថិតនៅចម្ងាយ៣ម៉ែត្រពីសារធាតុគ្រោះថ្នាក់ ដូចជា ធុងខ្យល់បំណែន ធុងអាសេទីឡែន ធុងសារធាតុដែលអាចឆាបឆេះ សារធាតុងាយឆេះ ពុល និងច្រែះស៊ី និងចម្ងាយ៧ម៉ែត្រកន្លះពីអុកស៊ីសែនរាវ។
ប្រកាសបានបញ្ជាក់ថា៖ «ទីតាំងដែលជាផ្ទះល្វែងមួយល្វែងនៅជាប់ៗគ្នា មិនអនុញ្ញាតឱ្យមានការស្តុកទុកឧស្ម័នអិលភីជីក្នុងកំប៉ុងឬធុង ដើម្បីលក់លើសពី៥០០គីឡូក្រាមឡើយ»។
ក្រៅពីនោះ ប្រកាសរបស់ក្រសួងក៏បានណែនាំឱ្យបំពាក់ឧបករណ៍និងស្លាកសញ្ញាផ្សេងៗ ដើម្បីសុវត្ថិភាព និងវិធានរៀបចំទុកដាក់កំប៉ុងនិងធុងហ្គាសឱ្យបានត្រឹមត្រូវផងដែរ។
ដោយឡែក សម្រាប់ឃ្លាំងទុកដាក់ប្រេងរំអិលវិញ ប្រកាសរបស់ក្រសួងក៏បានតម្រូវឱ្យមានឧបករណ៍សម្ភារលើកដាក់និងដឹកជញ្ជូនឱ្យបានត្រឹមត្រូវតាមបច្ចេកទេស ប្រើកំប៉ុងឬធុងដែលមានចំណុះចាប់ពីឬស្មើ២០០លីត្រចុះក្រោម និងត្រូវទុកដាក់ប្រេងរំអិលនៅក្នុងឃ្លាំងឬអគារ ជាពិសេសត្រូវចៀសវាងការបង្ហូរកាកសំណល់ប្រេងរំអិលចូលក្នុងប្រព័ន្ធលូសាធារណៈ។
ចំពោះទីតាំងលក់និងប្តូរប្រេងរំអិល ប្រកាសរបស់ក្រសួងបានកំណត់ឱ្យមានទីធ្លាទូលាយនិងមានខ្យល់ចេញចូលបានល្អ ដាក់ឱ្យស្ថិតនៅចម្ងាយអប្បបរមា៣ម៉ែត្រពីប្រភពបញ្ឆេះ និងត្រូវរៀបចំទុកដាក់កំប៉ុងឬធុងប្រេងរំអិលឱ្យមានរបៀបរៀបរយនិងសុវត្ថិភាព។
កាលពីថ្ងៃទី១៨ ខែកក្កដា មានករណីផ្ទុះធុងហ្គាសបង្កជាអគ្គិភ័យកើតឡើង នៅសង្កាត់បឹងរាំង ខណ្ឌដូនពេញ រាជធានីភ្នំពេញ បានបណ្តាលឱ្យមនុស្ស៤នាក់បានស្លាប់និង៥នាក់ទៀតរងរបួសធ្ងន់ស្រាល។
ក្រោយហេតុការណ៍នោះ អភិបាលរាជធានីភ្នំពេញបានណែនាំដល់មន្ត្រីជំនាញពាក់ព័ន្ធនិងអាជ្ញាធរខណ្ឌ ត្រូវចុះត្រួតពិនិត្យនិងលុបបំបាត់ទីតាំងលក់ហ្គាសអនាធិបតេយ្យ ដើម្បីបញ្ចៀសការរំខាននិងបង្ការហានិភ័យដល់ប្រជាពលរដ្ឋ៕
