ទីស្ដីការគណៈរដ្ឋមន្ត្រី បានអនុម័តយល់ព្រមលើសេចក្តីព្រាងច្បាប់ស្ដីពីការអនុម័តយល់ព្រមលើអនុសញ្ញាស្ដីពីបត្យាប័នរវាងរដ្ឋាភិបាលកម្ពុជានិងរដ្ឋាភិបាលនៃសាធារណរដ្ឋបារាំង ខណៈអ្នកតាមដានយល់ថា បត្យាប័នធ្វើឡើងសំដៅលើលោក សម រង្ស៊ី ដែលកំពុងរស់នៅប្រទេសបារាំង។
លោកនាយករដ្ឋមន្ត្រី ហ៊ុន សែន សរសេរក្នុងទំព័រហ្វេសបុករបស់លោកនាថ្ងៃនេះថា សេចក្តីព្រាងច្បាប់ស្តីពីការអនុម័តយល់ព្រមលើអនុសញ្ញាស្តីពីបត្យាប័ននេះ នឹងត្រូវលើកមកពិភាក្សា។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ប្រាប់VODថា អនុសញ្ញានេះ គឺជាកិច្ចសហប្រតិបត្តិការក្នុងវិស័យព្រហ្មទណ្ឌ ក៏ដូចជាការទប់ស្កាត់នូវឧក្រិដ្ឋកម្មនិងបទល្មើសឆ្លងដែនរវាងប្រទេសទាំងពីរ។ លោកបន្ថែមថា បត្យាប័ននេះនឹងបើកផ្លូវឱ្យមានការផ្ទេរទណ្ឌិតរវាងប្រទេសទាំងពីរផងដែរ។
លោកមានប្រសាសន៍ថា៖ «កិច្ចព្រមព្រៀងនេះគឺអនុញ្ញាតឱ្យមានការចាប់បញ្ជូនជនល្មើសដែលប្រព្រឹត្តបទល្មើសនៅក្នុងដែនដីនៃប្រទេសមួយ ហើយរត់ភៀសខ្លួនទៅប្រទេសមួយទៀតដែលជាសមាជិកនៃកិច្ចព្រមព្រៀង»។
អនុសញ្ញាស្ដីពីបត្យាប័នរវាងកម្ពុជានិងបារាំង ត្រូវបានចុះហត្ថលេខាដោយនាយករដ្ឋមន្ត្រីកម្ពុជា លោក ហ៊ុន សែន និងអតីតប្រធានាធិបតីបារាំង លោក ហ្វ្រង់ស្វ័រ ហូឡង់ ក្នុងពេលដែលលោកនាយករដ្ឋមន្ត្រី ហ៊ុន សែន ទៅធ្វើទស្សនកិច្ចនៅបារាំងអំឡុងខែតុលា ឆ្នាំ២០១៥ ប៉ុន្តែអនុសញ្ញានេះនៅមិនទាន់បានចូលជាធរមានសម្រាប់ប្រទេសទាំងពីរអនុវត្តនៅឡើយ។
សម្រាប់អ្នកតាមដានយល់ថា ការរៀបចំបត្យាប័ននៅពេលនេះ ហាក់មានចេតនាសំដៅទៅលើប្រធានអតីតបក្សប្រឆាំង លោក សម រង្ស៊ី ដែលកំពុងរស់នៅប្រទេសបារាំងនិងកំពុងជាប់បណ្ដឹងរាប់មិនអស់នៅកម្ពុជា។
អ្នកស្រាវជ្រាវការអភិវឌ្ឍសង្គម លោកបណ្ឌិត សេង សារី យល់ថា បើទោះបីបត្យាប័នធ្វើឡើងនេះហាក់សំដៅលើលោក សម រង្ស៊ី អតីតមេដឹកនាំបក្សប្រឆាំងនៅកម្ពុជាក៏ដោយ ក៏លោកយល់ថា អាចនឹងគ្មានប្រសិទ្ធភាពជាមួយនឹងបារាំងនោះទេ។
លោកមានប្រសាសន៍ថា៖ «ព្រោះនេះវាទាក់ទងនឹងច្បាប់អន្តរជាតិ ទាក់ទងនឹងការផ្លាស់ប្ដូរអ្នកទោសជាមួយគ្នា។ ទោះជាយ៉ាងណា ខ្ញុំជឿលើប្រទេសបារាំង បើទោះប្រទេសនេះមានបត្យាប័នជាមួយកម្ពុជាក៏ដោយ ក៏ប្រទេសនេះនឹងមិនធ្វើបត្យាប័នដោយគ្មានមូលដ្ឋានច្បាប់ដែរ ព្រោះបារាំងជាប្រទេសគោរពប្រជាធិបតេយ្យនិងនីតិរដ្ឋ»។
VOD មិនអាចទាក់ទងលោក សម រង្ស៊ី ដើម្បីឆ្លើយតបនឹងករណីនេះបាននៅឡើយទេ។
មេធាវីការពារលោក សម រង្ស៊ី គឺលោក សំ សុខគង់ យល់ថា បើទោះបីជាកម្ពុជានិងបារាំងមានបត្យាប័នជាមួយគ្នានឹងគ្នាក៏ដោយ ក៏លោកយល់ថា ប្រទេសបារាំងនឹងមិនអនុវត្តតាមសំណើរបស់កម្ពុជាទាំងស្រុង ទៅលើកូនក្ដីលោកដែរ។
លោក សំ សុខគង់ មានប្រសាសន៍ថា៖ «ព្រោះប្រទេសបារាំងគឺជាប្រទេសមួយដែលមានការយល់ដឹងអំពីបញ្ហាផ្លូវច្បាប់ជាតិនិងអន្តរជាតិ ក៏ដូចជាសិទ្ធិមនុស្ស»។
អតីតប្រធានបក្សប្រឆាំង លោក សម រង្ស៊ី ដែលបច្ចុប្បន្នកំពុងរស់នៅប្រទេសបារាំងកំពុងរងបណ្ដឹងចំនួន១០នៅតុលាការកម្ពុជា ក្នុងនោះ៨បណ្ដឹងត្រូវបានតុលាការជំនុំជម្រះរួចហើយ ដែលតុលាការកាត់ទោសឱ្យលោកជាប់ពន្ធនាគារ១៣ឆ្នាំនិង២ខែ និងត្រូវបង់ប្រាក់សំណង១លាន៥៨ម៉ឺន២៥០ដុល្លារនិង១០០រៀលដល់តុលាការនិងដើមបណ្ដឹង ទោះជាយ៉ាងណា លោកមិនទាន់ចូលខ្លួនមកអនុវត្តទោសនៅឡើយ។
ក្រៅពីជាប់បណ្ដឹងនៅកម្ពុជា លោក សម រង្ស៊ី ក៏ជាប់បណ្ដឹងមួយទៀតនៅប្រទេសបារាំងផងដែរ ទាក់ទងនឹងបណ្ដឹងបរិហារកេរ្តិ៍ដែលប្ដឹងដោយលោកនាយករដ្ឋមន្ត្រី ហ៊ុន សែន ជាមួយកូនប្រសារលោក គឺលោក ឌី វិជ្ជា៕