រដ្ឋាភិបាលកម្ពុជា បានអនុម័តគោលនយោបាយជាតិដំឡូងមីឆ្នាំ២០២០-២០២៥ ដោយថា ដើម្បីរក្សាកំណើនសេដ្ឋកិច្ចនិងកាត់បន្ថយភាពក្រីក្រ។
អ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន បានសរសេរនៅលើហ្វេសប៊ុកផ្លូវការលោក នៅថ្ងៃសុក្រ ទី១៤ ខែសីហានេះថា គោលនយោបាយជាតិដំឡូងមីនេះ មានគោលបំណងធ្វើឱ្យកម្ពុជាក្លាយជាទីតាំងផលិត កែច្នៃ និងជាអ្នកផ្គត់ផ្គង់ដំឡូងមី ប្រកបដោយនិរន្តរភាព សម្រាប់ទីផ្សារក្នុងតំបន់និងពិភពលោក។
លោកបញ្ជាក់ថា៖ «គោលនយោបាយជាតិដំឡូងមី ២០២០-២០២៥នេះ ធ្វើឱ្យផលិតផលដំឡូងមីកម្ពុជា នឹងក្លាយជាដំណាំយុទ្ធសាស្ត្រមួយដែលផ្ដល់ប្រាក់ចំណូលច្រើនដល់កសិករនិងជាមូលដ្ឋាននៃការអភិវឌ្ឍឧស្សាហកម្មកែច្នៃនៅកម្ពុជា។ កម្ពុជាពិតជាអាចបោះជំហានទៅរកការអភិវឌ្ឍសេដ្ឋកិច្ចជាតិដោយយកផលិតផលដំឡូងមី ជួយជំរុញកំណើននិងចែករំលែកផលប្រយោជន៍នៃកំណើននេះដល់គ្រប់ភាគីពាក់ព័ន្ធទាំងអស់»។
កាលពីខែតុលា ឆ្នាំ២០១៩ ទីស្ដីការគណៈរដ្ឋមន្ត្រី បានសម្រេចឱ្យក្រសួងពាណិជ្ជកម្មសិក្សាលើការរៀបចំគោលនយោបាយជាតិដំឡូងមី បន្ទាប់ពីខ្លឹមសារនៃគោលនយោបាយនេះត្រូវបានឯកភាព។
ក្នុងរបាយការណ៍រៀបចំការវិនិយោគសម្រាប់ដំឡូងមី ចេញផ្សាយកាលដើមខែវិច្ឆិកា ឆ្នាំ២០១៩ កម្មវិធីអភិវឌ្ឍន៍សហប្រជាជាតិ UNDP បានលើកឡើងថា ការវិនិយោគលើដំឡូងមីធ្វើឱ្យកម្ពុជាទទួលបានផលចំណេញច្រើនជាងការវិនិយោគលើជម្រើសផ្សេងទៀត ដូចជា វិស័យស្រូវ ចិញ្ចឹមសត្វ ស្បៀងអាហារ និងវិស័យទេសចរណ៍។
ក្នុងរបាយការណ៍នោះ លើកឡើងថា៖ «ការដាក់ទុនវិនិយោគលើវិស័យដំឡូងមីចំនួន២៩៤លានដុល្លារ វិស័យដំឡូងមីនឹងរីកចម្រើនជាងវិស័យចិញ្ចឹមសត្វ ស្បៀងអាហារ និងទេសចរណ៍។ វានឹងមានលទ្ធផលដូចការវិនិយោគលើស្រូវអង្ករដែរ ហើយផលត្រឡប់វិញនឹងធ្វើឱ្យកម្ពុជាចំណេញដល់ទៅបីដង ហើយបើគិតពីផលចំណេញសេដ្ឋកិច្ចវិញ គឺមិនតិចជាង៩៤០លានដុល្លារទេក្នុងរយៈពេល១០ឆ្នាំ»។
UNDP ឱ្យជាយោបល់ថា រដ្ឋាភិបាលកម្ពុជាគួរទម្លាក់កញ្ចប់ថវិកាចំនួន២៩៦លានដុល្លារ ដើម្បីអភិវឌ្ឍវិស័យនេះ ដោយគាំទ្រឱ្យមានរោងចក្រឧស្សាហកម្មកែច្នៃនិងរៀបចំហេដ្ឋារចនាសម្ព័ន្ធជាអាទិភាព គួរបង្កើតសំណុំទិន្នន័យ ធ្វើបច្ចុប្បន្នភាពវិភាគសេដ្ឋកិច្ច និងវាយតម្លៃពីផលប៉ះពាល់បរិស្ថានដើម្បីតាមដានផងដែរ។
របាយការណ៍ក្រសួងកសិកម្ម បង្ហាញថា ក្នុងឆ្នាំ២០១៩ កម្ពុជាបាននាំចេញដំឡូងមីទៅក្រៅប្រទេសបានជាង៣,២៩លានតោន កើន២៧ភាគរយ បើធៀបនឹងឆ្នាំ២០១៨ ដែលមាន២,៥៩លានតោន ហើយប្រទេសដែលនាំចេញភាគច្រើនគឺវៀតណាម ថៃ និងប្រទេសចិន៕