លោកនាយករដ្ឋមន្ត្រីហ៊ុន សែន ថ្លែងថា លោកកំពុងពិចារណាជម្រើសចំនួន៣ក្នុងការដោះស្រាយដីភូមិកំណើតរបស់លោក ហេង សំរិន ប្រធានរដ្ឋសភា នៅស្រុកពញាក្រែកខេត្តកំពង់ចាម ដែលផែនទីបង្ហាញថា ទីតាំងដីភូមិនេះស្ថិតនៅក្រោមការគ្រប់គ្រងរបស់វៀតណាម។
ក្នុងពិធីបើកសម្ពោធសួនទឹក «ហ្គាឌិនស៊ីធី» ស្ថិតនៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ លោកនាយករដ្ឋមន្ត្រី ហ៊ុន សែន បានថ្លែងនាព្រឹកនេះថា ផែនទីដែលសម្តេចព្រះសីហនុ យកទៅតម្កល់នៅអង្គការសហប្រជាជាតិកន្លងមក ជាផែនទីរបស់បារាំងគូនោះ បែរជាដាក់ភូមិកំណើតរបស់ប្រធានរដ្ឋសភាលោក ហេង សំរិន នៅក្នុងទឹកដីវៀតណាមទៅវិញ។
ករណីនេះ លោកនាយករដ្ឋមន្ត្រីហ៊ុន សែន ថ្លែងថា ដើម្បីដោះស្រាយបញ្ហានេះ រដ្ឋាភិបាលពិចារណាលើជម្រើសចំនួន៣ រួមមានទាំងការដូរភូមិ និង ដូរដីជាមួយវៀតណាម។
លោកថ្លែងដូចនេះថា៖ «ជម្រើសទី១ កាត់ភូមិបង ហេង សំរិន ឲ្យវៀតណាមគ្រប់គ្រង ដោយរក្សាបន្ទាប់ព្រំដែនចាស់ដដែល ទី២រក្សាខ្សែព្រំដែនដដែល ប៉ុន្តែរើភូមិបង ហេង សំរិន ចេញរកដីឲ្យគាត់ ធ្វើភូមិថ្មី នៅក្នុងដីខ្មែរ។ រីឯជម្រើសទី៣ ដោះដូរដីគ្នា[រវាងភាគីកម្ពុជា និងវៀតណាម] ដោយរៀបចំខ្សែព្រំដែនជាថ្មី គូសភូមិបងហេង សំរិន កន្លែងហ្នឹងត្រូវដូរខ្សែព្រំដែន ដោយគូសខ្សែព្រំដែនថ្មីយកភូមិហេង សំរិន ឲ្យមកនៅក្នុងដីខ្មែរ ថាកន្លែងហ្នឹង ៥០០ហិកតា ត្រូវយកកន្លែងផ្សេងសងទៅវៀតណាម៥០០ហិកតា»។
នៅក្នុងពិធីនៅថ្ងៃនេះ លោកនាយករដ្ឋមន្ត្រីមិនទាន់កំណត់ជាក់លាក់ថា នឹងត្រូវជ្រើសរើសយកជម្រើសណាមួយដើម្បីដោះស្រាយបញ្ហានេះនៅឡើយទេ។
កាលពីដើមខែវិច្ឆិកា ឆ្នាំ២០១៨ រដ្ឋសភាបានអនុម័តយល់ព្រមលើការបោះបង្គោលព្រំដែនជាមួយវៀតណាម ដែលរដ្ឋាភិបាលបោះបាន៨៤ភាគរយ ក្រោមសំឡេងគាំទ្រ១១០ លើ១១០ នៃសមាជិកសភារបស់គណបក្សកាន់អំណាចទាំងអស់ដែលមានវត្តមានក្នុងកិច្ចប្រជុំ។
សភាអះអាងថា ការអនុម័តយល់ព្រមនេះ យោងទៅលើសន្ធិសញ្ញាបំពេញបន្ថែមឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥ រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម និងត្រូវបានប្រកាសជាការប្រញាប់។
កម្ពុជា-វៀតណាម មានព្រំប្រទល់ដីគោលជាប់គ្នាប្រវែង ១២៧០គីឡូម៉ែត្រ ហើយមកដល់ពេលនេះ នៅសល់១៦ភាគរយទៀត ដែលកម្ពុជាមិនទាន់ឯកភាពជាមួយវៀតណាមឲ្យបោះបញ្ចប់ ដោយរង់ចាំភាគីបារាំងគូសចម្លងផែនមាត្រដ្ឋានផែនទីពីខ្នាត១ លើ១០០ពាន់ ទៅជាខ្នាត១ លើ៥០ពាន់វិញ៕