តំណាងយុវជន សហជីព និងពលរដ្ឋប្រមាណជិត៣០នាក់ នៅព្រឹកថ្ងៃចន្ទនេះ បានស្នើសហគមន៍អន្តរជាតិនិងការិយាល័យឧត្តមស្នងការទទួលបន្ទុកសិទ្ធិមនុស្សប្រចាំនៅកម្ពុជា (UNHCR) ជួយអន្តរាគមន៍ទៅរដ្ឋាភិបាលកម្ពុជា ដោះលែងលោក រ៉ុង ឈុន និងអ្នកជាប់ពន្ធនាគារមួយចំនួនទៀត។
ការស្នើនេះបានធ្វើឡើងតាមរយៈការប្រមូលផ្តុំដាក់ញត្តិនៅការិយាល័យ UNHCR និងដើរថ្មើរជើងដើម្បីដាក់ញត្តិបន្តនៅស្ថានទូតជប៉ុនប្រចាំនៅកម្ពុជា ក្នុងរាជធានីភ្នំពេញ។
ក្នុងញត្តិរបស់តំណាងសមាគម សហព័ន្ធនិស្សិត សហព័ន្ធសហជីព យុវជន និងប្រជាពលរដ្ឋទាំងនោះ ដែលបានដាក់ជូនតំណាងការិយាល័យ UNHCR អង្គការពលកម្មអន្តរជាតិ សហគមន៍អឺរ៉ុប ឯកអគ្គរដ្ឋទូតនៃបណ្តាប្រទេសមួយចំនួន បានលើកឡើងថា ការចាប់ខ្លួននិងការសម្រេចឃុំខ្លួនលោក រ៉ុង ឈុន ជាទង្វើអយុត្តិធម៌ ខណៈដែលរូបគាត់បានបំពេញការងារជាច្រើនដើម្បីការពារផលប្រយោជន៍សង្គមជាតិនិងកម្មករនិយោជិត។
ញត្តិដដែលនោះបានបន្តថា៖ «ទាំងនេះគឺជាសិទ្ធិសេរីភាពរបស់គាត់ [លោក រ៉ុង ឈុន] ជាថ្នាក់ដឹកនាំសហជីពដែលមានការទទួលស្គាល់ជាអន្តរជាតិ ហើយការបញ្ចេញមតិនិងសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌ គឺជាកាតព្វកិច្ចរបស់ប្រជាពលរដ្ឋទូទៅ ដូចមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា»។
ករណីនេះ ពួកគេបានស្នើដល់ស្ថាប័នអន្តរជាតិនិងបណ្តាប្រទេសប្រជាធិបតេយ្យទាំងនោះ ជួយអន្តរាគមន៍ឱ្យមានការដោះលែងលោក រ៉ុង ឈុន និងអ្នកផ្សេងទៀតជាបន្ទាន់និងឥតលក្ខខណ្ឌ។
អ្នកនាំពាក្យក្រសួងយុត្តិធម៌ លោក ជិន ម៉ាលីន ធ្លាប់បានបញ្ជាក់នៅក្នុងទំព័រហ្វេសប៊ុករបស់លោក កាលពីថ្ងៃទី១៩ ខែសីហានេះថា តុលាការជាស្ថាប័នឯករាជ្យ គ្មានជនណាឬក្រុមអង្គការអន្តរជាតិណាមួយអាចដាក់សម្ពាធនិងបង្គាប់បញ្ជាមកលើតុលាការបាននោះទេ។
លោកបន្តថា ការចេញសេចក្តីថ្លែងការណ៍ដាក់សម្ពាធនិងទាមទារឱ្យតុលាការដោះលែងជនជាប់ចោទនិងទម្លាក់ចោលបទចោទ មិនមែនជាមធ្យោបាយស្របច្បាប់ក្នុងការការពារជនជាប់ចោទនោះទេ ហើយក៏នឹងមិនមានឥទ្ធិពលអ្វីដែរទៅលើការសម្រេចរបស់តុលាការដែលជាស្ថាប័នឯករាជ្យ។
លោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា ត្រូវបានចាប់ខ្លួនកាលពីថ្ងៃទី៣១ ខែកក្កដា ឆ្នាំ២០២០ និងត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនបណ្តោះអាសន្ននៅពន្ធនាគារព្រៃស រាជធានីភ្នំពេញ មួយថ្ងៃបន្ទាប់ពីការចាប់ខ្លួន ក្រោមបទចោទថា ញុះញង់ឱ្យមានការប្រព្រឹត្តបទឧក្រិដ្ឋជាអាទិ៍ពាក់ព័ន្ធនឹងបញ្ហាព្រំដែន។
នៅថ្ងៃទី១៣ ខែសីហា ឆ្នាំ២០២០ យុវជនចំនួន៦នាក់ដែលសកម្មក្នុងការទាមទារឱ្យមានការដោះលែងលោក រ៉ុង ឈុន ត្រូវបានសមត្ថកិច្ចចាប់ខ្លួន ក្នុងនោះមាន៤នាក់ត្រូវបានដោះលែងវិញ ក្រោយពួកគេព្រមចុះកិច្ចសន្យាឈប់តវ៉ា រីឯ២នាក់ទៀតត្រូវបានបញ្ជូនទៅឃុំខ្លួននៅពន្ធនាគារបណ្តោះអាសន្ន។
ដោយឡែក ប្រធានគណបក្សខ្មែរឈ្នះ លោក សួង សុភ័ណ្ឌ ត្រូវបានសមត្ថកិច្ចចាប់ខ្លួនកាលពីថ្ងៃ១៤ ខែសីហា ឆ្នាំ២០២០ ក្រោមការចោទប្រកាន់ពីបទ «ញុះញង់បំភ្លៃការពិតលើបញ្ហាព្រំដែន និងការចោទប្រកាន់មួលបង្កាច់ទម្លាក់កំហុសមកលើគណៈកម្មាធិការចម្រុះកិច្ចការព្រំដែនកម្ពុជា ថាប្រព្រឹត្តបទល្មើសក្បត់ជាតិលើរឿងព្រំដែនកម្ពុជា-វៀតណាម»៕