ប្រជាសហគមន៍មួយនៅខេត្តកំពង់ឆ្នាំង ជំរុញអាជ្ញាធរមូលដ្ឋានជួយទប់ស្កាត់បទល្មើសនេសាទខុសច្បាប់ក្នុងរដូវត្រីពង នៅបឹងធម្មជាតិមួយឈ្មោះ «បឹងពោធិ៍» ស្ថិតនៅឃុំតាជេស ស្រុកកំពង់ត្រឡាច ខណៈពួកគេមានការព្រួយបារម្ភពីការបាត់ពូជត្រីនៅបឹងធម្មជាតិនោះ។
ប្រជាសហគមន៍ឡពាង ឃុំតាជេស លោក ស្ងួន ញឿន ប្រាប់វីអូឌីនៅថ្ងៃនេះថា ថ្មីៗនេះមានជនឆ្លៀតឱកាសមួយចំនួនបានប្រើប្រាស់ឧបករណ៍នេសាទខុសច្បាប់ ដូចជា ឧបករណ៍ឆក់ត្រីនិងស្បៃមុងក្រឡាល្អិតជាដើម ដើម្បីនេសាទត្រីនៅកន្លែងត្រីពងក្នុងបឹងធម្មជាតិនោះ។
លោកបន្តថា ករណីនេះ ប្រជាពលរដ្ឋបានរាយការណ៍ទៅអាជ្ញាធរមូលដ្ឋានដែរ ប៉ុន្តែអាជ្ញាធរហាក់មិនអើពើក្នុងការទប់ស្កាត់បទល្មើសនេសាទនេះទេ ហើយក៏មិនបានចុះណែនាំដល់ប្រជាពលរដ្ឋកុំឱ្យនេសាទក្នុងរដូវត្រីពងនេះដែរ។
លោកថា៖ «ស្បៃមុងនៅជុំវិញបឹងហ្នឹង១៥កន្លែង សុទ្ធតែរបស់ខុសច្បាប់ ក្រឡាញឹកទាំងអស់ ហើយយើងបានរាយការណ៍ទៅសមត្ថកិច្ច អាជ្ញាធរ និងជលផលទាំងអស់ ប៉ុន្តែមិនដែលឃើញពួកគាត់ចេញមកបង្រ្កាបបទល្មើសទេ។ គេ[អាជ្ញាធរ]ថា មិនមានពេលបង្រ្កាបបទល្មើសទាំងអស់ហ្នឹងទេ បើឃុំវិញគេថាមិនមែនដែនសមត្ថកិច្ចរបស់គេ ព្រោះខាងហ្នឹងមិនមែនចាប់បទល្មើសខាងជលផល»។
លោក ស្ងួន ញឿន បានអះអាងដែរថា កន្លងមក ពួកគាត់ក៏ធ្លាប់រងការគំរាមសម្លាប់ពីជនមិនស្គាល់មុខ ក្រោយពីពួកគាត់ចុះរារាំងនិងទប់ស្កាត់មិនឱ្យមានការនេសាទខុសច្បាប់ក្នុងបឹងធម្មជាតិនោះផងដែរ។
ពលរដ្ឋម្នាក់ទៀត អ្នកស្រី ប៊ុត ជូច បានស្នើទៅអាជ្ញាធរជួយទប់ស្កាត់ការនេសាទដោយប្រើឧបករណ៍ខុសច្បាប់នៅក្នុងរដូវត្រីពង ដើម្បីថែរក្សាពូជត្រីនៅក្នុងបឹងធម្មជាតិមួយនេះកុំឱ្យបាត់បង់។
អ្នកស្រីថា៖ «ខ្ញុំព្រួយបារម្ភដែរ បើសិនអាជ្ញាធរគេជួយទប់ស្កាត់ទៅ យើងមានទំនុកចិត្តបន្តិច ដល់ពេលអាជ្ញាធរធ្វើព្រងើយកន្តើយអ៊ីចឹង យើងកាន់តែលំបាក។ ពិបាកក្នុងការថែរក្សា ទាល់តែយើងមូលមតិគ្នា បានយើងធ្វើទៅរួច»។
មេភូមិឡពាង លោក ឌុច ប៊ុនហេង ច្រានចោលការលើកឡើងរបស់ប្រជាពលរដ្ឋទាំងនោះ ដោយថា កន្លងមក ប្រជាពលរដ្ឋមិនដែលរាយការណ៍ពាក់ព័ន្ធនឹងការនេសាទនៅក្នុងបឹងធម្មជាតិនោះដល់អាជ្ញាធរមូលដ្ឋានឡើយ។
លោកថា៖ «ខ្ញុំចង់ឱ្យសហគមន៍ អ្នកដែលថែរក្សា [បឹងធម្មជាតិនោះ] គាត់រាយការណ៍មក បានខ្ញុំដឹង ស្រួលខ្ញុំមានវិធានការទប់ស្កាត់»។
នាយខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង លោក លី ឡា ទទួលស្គាល់ថា ពិតជាបទល្មើសនេសាទខុសច្បាប់នៅទីនោះមែន ប៉ុន្តែតិចតួចប៉ុណ្ណោះ។
លោកថា៖ «មិនមានអីធំដុំទេ គាត់ធ្លាប់រាយការណ៍មក ខ្ញុំឱ្យមន្ត្រីខ្ញុំចុះទៅជាប់រហូតហ្នឹង មានស្បៃមងពេលខ្លះ៥ម៉ែត្រទៅ១០ម៉ែត្រដាក់នៅបន្តិចហ្នឹង ខ្ញុំសហការរហូតហ្នឹង ទោះបីជាពួកគាត់មិនមែនជាសហគមន៍បង្កើតឡើងដោយច្បាប់ក៏ដោយ ឱ្យតែប្រជាពលរដ្ឋរាយការណ៍មក ខ្ញុំអនុវត្តហើយ អ៊ីចឹងខ្ញុំធ្វើរហូតជាមួយគាត់ហ្នឹង អ៊ីចឹងយើងមិនទុកឱ្យមាន[បទល្មើស]ទេ»។
បើតាមក្រុមប្រជាពលរដ្ឋ បឹងពោធិ៍មានផ្ទៃក្រឡាជិត៤៨ហិកតា ត្រូវបានប្រជាពលរដ្ឋចំនួន៣ ភូមិ កំពុងអាស្រ័យផលពីបឹងធម្មជាតិនេះ ក្នុងនោះមានភូមិឡពាង ភូមិសំរោង និងភូមិសូវង្ស៕