មន្ត្រីជាន់ខ្ពស់រដ្ឋាភិបាល បានឱ្យដឹងថា លោកនាយករដ្ឋមន្ត្រី ហ៊ុន សែន បានបញ្ជាទៅគណៈកម្មាធិការចម្រុះកិច្ចការព្រំដែន ចុះទៅជួបប្រជាពលរដ្ឋនៅខេត្តត្បូងឃ្មុំ ដែលអះអាងថា បាត់ដីក្រោយការបោះបង្គោលព្រំដែនរវាងកម្ពុជានិងវៀតណាម និងឱ្យទីស្តីការគណៈរដ្ឋមន្ត្រី បើកសិក្ខាសាលា ដើម្បីពន្យល់រឿងព្រំដែនដល់ប្រជាពលរដ្ឋដែលមានចម្ងល់។
ការថ្លែងរបស់លោកនាយករដ្ឋមន្ត្រី បានធ្វើឡើងនៅក្នុងកិច្ចប្រជុំបូកសរុបការងារប្រចាំឆមាសទី៤របស់ឧត្តមក្រុមប្រឹក្សាពិគ្រោះ និងផ្តល់យោបល់ នៅវិមានសន្តិភាព នៅព្រឹកថ្ងៃទី២៥ ខែសីហានេះ។
លោក ឈឹម ផលវិរុណ ប្រធានលេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់ បានថ្លែងប្រាប់ក្រុមអ្នកសារព័ត៌មានក្រោយកិច្ចប្រជុំនោះថា ទាក់ទងទៅនឹងបញ្ហាព្រំដែន នៅក្នុងកិច្ចប្រជុំនោះ លោកនាយករដ្ឋមន្ត្រី ហ៊ុន សែន បានបញ្ជាទៅ លោក វ៉ា គឹមហុង ប្រធានគណៈកម្មាធិការចម្រុះកិច្ចការព្រំដែនកម្ពុជា ចុះទៅជួបប្រជាពលរដ្ឋ ដែលអះអាងថា បាត់ដីនៅខេត្តត្បូងឃ្មុំ ក្រោយការបោះបង្គោលព្រំដែន ។
លោកបានគូសបញ្ជាក់ថា៖ «សម្តេច[ហ៊ុន សែន]បានចេញបទបញ្ជាតាមការលើកឡើងរបស់ឧត្តមក្រុមប្រឹក្សាពិគ្រោះនិងផ្តល់យោបល់ គឺបញ្ជាទៅឯកឧត្តម វ៉ា គឹមហុង ត្រូវចុះទៅជួបប្រជាពលរដ្ឋ ដែលគាត់អះអាងថាបាត់ដី អីចឹងទៅមើលថាបាត់ត្រង់ណា បាត់មែន ឬបាត់អី ឬក៏បញ្ហាអី អាហ្នឹងចុះទៅផ្ទាល់តែម្តង»។
លោក ឈឹម ផលវិរុណ បន្តថា ជាមួយគ្នានោះ លោកនាយករដ្ឋមន្ត្រី ក៏បានណែនាំទៅកាន់ លោកឧបនាយករដ្ឋមន្រ្តី ប៊ិន ឈិន រដ្ឋមន្រ្តីទីស្ដីការគណៈរដ្ឋមន្រ្តី ឱ្យបើកសិក្ខាសាលាមួយ ដើម្បីប្រជាពលរដ្ឋ សិស្ស និស្សិតចូលស្តាប់ និងអាចសួរនាំអំពីផែនទី និងការបោះបង្គោលព្រំដែនផងដែរ។
វីអូឌី មិនអាចសុំបញ្ជាក់ពី លោក វ៉ា គឹមហុង ប្រធានគណៈកម្មាធិការចម្រុះកិច្ចការព្រំដែនកម្ពុជា បានទេនៅរសៀលថ្ងៃអង្គារនេះ។
ប្រធានក្រុមប្រឹក្សាឃ្លាំមើលកម្ពុជាដែលមានមូលដ្ឋាននៅក្រៅប្រទេស លោក មែន ណាត និយាយថា ដីដែលពលរដ្ឋបាត់បង់ដោយសារបោះបង្គោលព្រំដែន នឹងអាចរកឃើញ បើសិនការចុះពិនិត្យនោះ ផ្អែកលើដីដែលពលរដ្ឋធ្លាប់អាស្រ័យផលតាំងពីដូនតាមក។
លោកថា៖ «ផែនទីដែលពួកគាត់[រដ្ឋាភិបាល]យកមកពន្យល់ឆ្នាំ២០១៥អីនឹង អាហ្នឹងគ្រាន់តែឱ្យល្អមើលទេ តែការបោះបង្គោលព្រំដែនជាក់ស្តែ គាត់បោះតាមសន្ធិសញ្ញាព្រំដែនឆ្នាំ១៩៨៥ អាហ្នឹងដែលធ្វើឱ្យបាត់ដីនៅតាមបណ្តោយព្រំដែន»។
ពលរដ្ឋម្នាក់ដែលសុំមិនបញ្ចេញឈ្មោះ រស់នៅស្រុកពញ្ញាក្រែក ខេត្តត្បូងឃ្មុំ ដែលអះអាងថាមានពលរដ្ឋចំនួន ១០៦គ្រួសារ បានបាត់បង់ដី៦០ហិកតា ដោយការបោះបង្គោលព្រំដែនរវាងកម្ពុជានិងវៀតណាម បានសាទរការដែលនាយករដ្ឋមន្ត្រី បញ្ជាឱ្យមន្ត្រីកិច្ចការព្រំដែនចុះទៅពិនិត្យដោយផ្ទាល់នៅទីតាំងនោះ។ ប៉ុន្តែអ្នកស្រីហាក់មានសង្ឃឹមតិចតួចថាអ្នកភូមិបានដីនោះមកវិញ។
អ្នកស្រីនិយាយថា៖ «បង្ហាញទៅក៏មិនបានមកវិញ ព្រោះចូលម្នាក់បន្តិចៗ មិនមែនតែដីខ្ញុំតែម្នាក់ឯងឯណា?»។
ពាក់ព័ន្ធនឹងបញ្ហាព្រំដែននេះ លោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា ត្រូវបានសមត្ថកិច្ចរាជធានីភ្នំពេញ ចាប់ខ្លួនបញ្ជូនកាលពីថ្ងៃទី៣១ ខែកក្កដា ហើយនៅថ្ងៃបន្ទាប់ លោកត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនជាបណ្តោះអាសន្ននៅពន្ធនាគារព្រៃស ក្រោមបទចោទថា ញុះញង់ឱ្យមានការប្រព្រឹត្តបទឧក្រិដ្ឋជាអាទិ៍។
ក្រោយមក នៅថ្ងៃទី១៤ ខែសីហា សមត្ថកិច្ចរាជធានីភ្នំពេញ ក៏បានចាប់ខ្លួនប្រធានគណបក្សខ្មែរឈ្នះ លោក សួង សុភ័ណ្ឌ តាមដីការបស់តុលាការ ក្រោយពីប្រធានគណបក្សរូបនេះ បានចុះទៅពិនិត្យបង្គោលព្រំដែនរវាងកម្ពុជា-វៀតណាម ដែលបោះរួចនៅស្រុកពញ្ញាក្រែក ខេត្តត្បូងឃ្មុំ។ លោកសួង សុភ័ណ្ឌ ត្រូវបានចោទប្រកាន់ពីបទ «ញុះញង់បំភ្លៃការពិតលើបញ្ហាព្រំដែន និងការចោទប្រកាន់មួលបង្កាច់ទម្លាក់កំហុស មកលើគណៈកម្មាធិការចម្រុះកិច្ចការព្រំដែនកម្ពុជា ថាប្រព្រឹត្តបទល្មើសក្បត់ជាតិលើរឿងព្រំដែនកម្ពុជា-វៀតណាម»៕
