ស្នងការដ្ឋាននគរបាលខេត្តកណ្ដាល អះអាងថា យោធាវៀតណាមបានរុះរើតង់ចាស់ហើយប្ដូរមកសង់តង់ថ្មី ដែលជាជម្រករឹងមាំនៅតំបន់មិនទាន់ឯកភាពគ្នា ស្ថិតនៅភូមិភូវី ឃុំកូឡូក ស្រុកទិនចូវ ខេត្តអាងយ៉ាង ទល់នឹងឃុំក្អមសំណ ស្រុកលើកដែក ខេត្តកណ្ដាល។
ក្នុងលិខិតជូនអភិបាលខេត្តកណ្តាល ចុះថ្ងៃទី២៦ ខែសីហា ឆ្នាំ២០២០ ស្នងការនគរបាលខេត្តកណ្ដាល ឱ្យដឹងថា កាលពីថ្ងៃទី២៥ ខែសីហា កម្លាំងការពារព្រំដែនកម្ពុជាបានចុះទៅត្រួតពិនិត្យទីតាំងតង់់ចាស់របស់យោធាការពារព្រំដែនវៀតណាម នៅតំបន់មិនទាន់ឯកភាពគ្នានៃប្រទេសទាំងពីរ ក៏បានជួបភាគីវៀតណាមកំពុងសាងសង់តង់ថ្មី (ជាជម្រករឹងមាំ)។
ស្នងការដ្ឋានបន្តថា តង់ថ្មីដែលយោធាវៀតណាមសាងសង់នោះធ្វើពីឈើសសរថ្ម កម្ពស់៣ម៉ែត្រទំហំ៥ម៉ែត្រគុណនឹង៤ម៉ែត្រ ដំបូលប្រក់ស័ង្កសី ដោយឃ្លាតពីខ្សែបន្ទាត់ព្រំដែនដែលកម្ពុជាគ្រប់គ្រងបច្ចុប្បន្នចម្ងាយប្រមាណ១២០ម៉ែត្រ។
ស្នងការដ្ឋានបានបន្តទៀតថា បើទោះជាកម្លាំងប៉ុស្តិ៍នគរបាលការពារព្រំដែនក្អមសំណនិងកម្លាំងយោធាការពារព្រំដែនកង៦០១ បានស្នើឱ្យយោធាវៀតណាមបញ្ឈប់សកម្មភាពសាងសង់នោះជាច្រើនសារក៏ដោយ ប៉ុន្តែភាគីវៀតណាមមិនព្រមបញ្ឈប់ឡើយ ដោយថា ការសាងសង់ប៉ុស្តិ៍យាមរឹងមាំថ្មីឬជម្រករឹងមាំថ្មីនេះ គឺធ្វើតាមបញ្ជាថ្នាក់លើរបស់ខ្លួន។
បើតាមស្នងការដ្ឋាននគរបាលខេត្តកណ្តាល ភាគីវៀតណាមមានគម្រោងសាងសង់សំណង់រឹងមាំនេះចំនួន៤គោលដៅលើ១០គោលដៅចាស់ដែលមានស្រាប់។
វីអូឌី នៅពុំទាន់អាចសុំការបញ្ជាក់បន្ថែមពីអភិបាលខេត្តកណ្តាល លោក គង់ សោភ័ណ្ឌ បានទេ នៅព្រឹកថ្ងៃព្រហស្បតិ៍នេះ។
ទោះជាយ៉ាងណា ភាគីវៀតណាមនៅមិនទាន់មានការបញ្ជាក់ណាមួយជុំវិញការសាងសង់សំណង់រឹងមាំ នៅតំបន់មិនទាន់ឯកភាពនេះនៅឡើយ។ ប៉ុន្តែលោកធ្លាប់បានប្រាប់វីអូឌីកាលពីថ្ងៃទី២៣ ខែមិថុនា ឆ្នាំ២០២០ ថាភាគីវៀតណាមបានបោះតង់ចំនួន៣១ទីតាំងជាប់ព្រំដែនកម្ពុជា-វៀតណាម ស្ថិតនៅស្រុកចំនួន២ក្នុងខេត្តកណ្តាល ក្រោមហេតុផលដើម្បីបង្ការការឆ្លងរីករាលដាលជំងឺកូវីដ១៩។
ប្រធានគណៈកម្មាធិការទទួលបន្ទុកកិច្ចការព្រំដែនកម្ពុជា លោក វ៉ា គឹមហុង បានបញ្ជាក់កាលពីថ្ងៃទី១១ ខែមិថុនាដែរថា ចាប់តាំងពីផ្ទុះជំងឺកូវីដ១៩មក ភាគីវៀតណាមបានបោះតង់នៅតាមបណ្តោយព្រំដែនកម្ពុជា-វៀតណាម ទាំងតំបន់មិនទាន់ឯកភាពនិងតំបន់ឯកភាពគ្នារួច មានចំនួន២៥៦ទីតាំង៕
