រដ្ឋមន្រ្តីក្រសួងការពារជាតិកម្ពុជា លោក ទៀ បាញ់ ប្រកាសមិនអត់ឱនឱ្យអ្នកដែលញុះញង់និងចោទប្រកាន់រដ្ឋាភិបាលកម្ពុជាថា ធ្វើឱ្យបាត់បង់ទឹកដីទៅប្រទេសវៀតណាមនោះទេ ខណៈដែលរដ្ឋាភិបាលបានខិតខំដោះស្រាយបញ្ហាព្រំដែនជាមួយប្រទេសជិតខាងយ៉ាងមានប្រសិទ្ធភាព។
លោក ទៀ បាញ់ បានថ្លែងប្រាប់អ្នកសារព័ត៌មានបន្ទាប់ពីបញ្ចប់ពិធីប្រគល់ផែនទីឋានលេខាព្រំដែនគោកខ្នាត១/២៥០០០ ទៅក្រសួងស្ថាប័នពាក់ព័ន្ធចំនួន៣៥ នៅថ្ងៃទី២៧ ខែសីហានេះថា រដ្ឋាភិបាលនឹងចាត់វិធានការផ្លូវច្បាប់ចំពោះអ្នកដែលចោទប្រកាន់រដ្ឋាភិបាលថា ផលិតនិងបោះពុម្ពផែនទីខ្នាត១/២៥០០០ ធ្វើឱ្យបាត់ទឹកដីរបស់ប្រទសកម្ពុជាទៅប្រទេសជិតខាងនោះទេ។
លោកថា៖ «មិនអាចអត់ឱនឱ្យបានជាដាច់ខាត ព្រោះនេះជារឿងដ៏សំខាន់បំផុតរបស់ប្រទេសជាតិយើងដែលទទួលបានជោគជ័យដ៏ធំធេងនេះ ទម្រាំបានផែនទីនេះទុកជាឯកសារសម្រាប់ប្រើប្រាស់នេះ វាមានការលំបាកណាស់ ហើយក៏មិនមែនជាភាពងាយស្រួលនោះទេ»។
លោកបានបន្តថា ចំពោះបញ្ហាព្រំដែនកម្ពុជា-ថៃដែលលោកធ្លាប់ចុះទៅពិនិត្យ ក៏មានភាពមិនប្រក្រតីនៅកន្លែងមួយចំនួនដែរ ប៉ុន្តែមិនដែលឃើញអ្នកទាំងនោះលើកយកភាពមិនប្រក្រតី ជាមួយថៃ មកជជែកដេញដោលនិងចោទប្រកាន់ទៅលើរដ្ឋាភិបាលដូចករណីព្រំដែនរវាងកម្ពុជានិងវៀតណាមឡើយ។
លោកថា៖ «ខ្ញុំលើកឡើងចំពោះប្រទេសថៃ ខ្ញុំបានធ្វើដំណើរទៅ ឃើញមានកន្លែងមួយចំនួនស្លាកស្នាម ដែលយើងផ្ទៀងទៅក៏មានភាពមិនប្រក្រតីមួយចំនួនដែរ តាមពិតហេតុអីមិនជួយលើកឡើងផង បើអ្នកនោះគិតគូរស្នេហាជាតិពិតប្រាកដ ការពារអធិបតេយ្យខ្លួនពិតប្រាកដ»។
លោក ទៀ បាញ់ បានបន្ថែមថា៖ «នៅពេលដែលរាជរដ្ឋាភិបាលធ្វើការលើបញ្ហាព្រំដែនតាមផ្លូវច្បាប់យ៉ាងម៉តចត់ជាមួយប្រទេសវៀតណាម បែរជាក្រុមប្រឆាំងទាំងអស់នោះលើកយកមកចោទប្រកាន់ថា “ជាជនក្បត់ជាតិ កាត់ដីឱ្យទៅប្រទេសវៀតណាម” អ្វីដែលកាន់តែធ្ងន់ធ្ងរមិនអាចអត់ឱនឱ្យបាននោះ គឺចោទថា រាជរដ្ឋាភិបាលបានលក់ដីឱ្យទៅវៀតណាមទៅវិញ»។
កម្ពុជា-វៀតណាម មានព្រំប្រទល់ដីគោកប្រវែង១២៧០គីឡូម៉ែត ហើយបច្ចុប្បន្នបោះបាន៨៤ភាគរយ នៅសស់១៤ភាគរយទៀតមិនទាន់ឯកភាពគ្នា។
ពាក់ព័ន្ធនឹងបញ្ហាព្រំដែននេះ កាលពីថ្ងៃទី១ ខែសីហា លោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនជាបណ្តោះអាសន្ននៅពន្ធនាគារព្រៃស ក្រោមបទចោទថា «ញុះញង់ឱ្យមានការប្រព្រឹត្តបទឧក្រិដ្ឋជាអាទិ៍»។
ក្រោយមក លោក សួង សុភ័ណ្ឌ ប្រធានគណបក្សខ្មែរឈ្នះ ក៏ត្រូវបានសាលាដំបូងរាជធានីភ្នំពេញ ចោទប្រកាន់ពីបទ «ញុះញង់បំភ្លៃការពិតលើបញ្ហាព្រំដែន និងការចោទប្រកាន់មួលបង្កាច់ទម្លាក់កំហុសមកលើគណៈកម្មាធិការចម្រុះកិច្ចការព្រំដែនកម្ពុជាថាប្រព្រឹត្តបទល្មើសក្បត់ជាតិលើរឿងព្រំដែនកម្ពុជា-វៀតណាម» ក្រោយពីលោកបានចុះទៅពិនិត្យបង្គោលព្រំដែនរវាងកម្ពុជា-វៀតណាម ដែលបោះរួចនៅស្រុកពញាក្រែក ខេត្តត្បូងឃ្មុំ។
កាលពីថ្ងៃទី២៥ ខែសីហា ឆ្នាំ២០២០ លោកនាយករដ្ឋមន្ត្រី ហ៊ុន សែន បានបញ្ជាទៅលោក វ៉ា គឹមហុង ឱ្យចុះទៅជួបប្រជាពលរដ្ឋមួយចំនួននៅខេត្តត្បូងឃ្មុំ ដែលអះអាងថា បាត់ដីក្រោយពីការបោះបង្គោលព្រំដែនរវាងកម្ពុជានិងវៀតណាម។
ពាក់ព័ន្ធនឹងករណីនេះ លោក វ៉ា គឹមហុង ប្រធានគណៈកម្មាធិការចម្រុះកិច្ចការព្រំដែនកម្ពុជា បានបញ្ជាក់ប្រាប់អ្នកសារព័ត៌មាននៅព្រឹកនេះថា លោកនឹងដឹកនាំក្រុមការងារចុះទៅដោយផ្ទាល់ ដើម្បីជួបជាមួយប្រជាពលរដ្ឋទាំងនោះក្នុងពេលឆាប់ៗខាងមុខ។
លោកបន្តថា៖ «ប៉ុន្តែមុននឹងចុះ រង់ចាំឱ្យអាជ្ញាធរខេត្តស្រង់ស្ថិតិប្រជាពលរដ្ឋឱ្យបានជាក់លាក់ជាមុនសិនថា ប្រជាពលរដ្ឋណាគាត់មានដីនៅទីនោះ ហើយប្រជាពលរដ្ឋណាបាត់ដី។ យើងដឹងហើយកន្លែងនោះ មានគេសម្តែងឆាកល្ខោន ដឹកនាំពីមួយទៅមួយ ទៅស្រែកនៅមុខអេក្រង់ទូរទស្សន៍ ដើម្បីធ្វើឆាកល្ខោន យើងដឹងទាំងអស់»។
ជាមួយគ្នានេះដែរ លោកបញ្ជាក់ថា តាមទិន្នន័យដែលលោកទទួលបាន គឺមានប្រជាពលរដ្ឋតែ១៨នាក់ប៉ុណ្ណោះដែលបានបាត់ដី ពុំមែនរាប់សិបគ្រួសារដូចការលើកឡើងរបស់មនុស្សមួយចំនួនតូចនោះទេ។
លោក វ៉ា គឹមហ៊ុង ក៏បានជំរុញប្រជាពលរដ្ឋដែលបានអះអាងថាបាត់ដីទាំងនោះ ដាក់ឯកសារមកក្រុមការងារជំនាញបើសិនជាមាន ដើម្បីឱ្យមន្ត្រីជំនាញស្វែងរកដំណោះស្រាយជូន៕