ក្រុមហ៊ុនសាំសុង (SamSung) ត្រូវប្រឈមមុខនឹងផ្លូវច្បាប់របស់ប្រទេសកូរ៉េខាងត្បូងម្ដងទៀត បន្ទាប់ពីអ្នកស្នងមរតកក្រុមហ៊ុន លោក លី ជេយ៉ុង (Lee Jae-yong) ត្រូវបានចោទប្រកាន់ពាក់ព័ន្ធនឹងរឿងចម្រូងចម្រាសនៃការច្របាច់បញ្ចូលគ្នារវាងក្រុមហ៊ុន SamSung C&T និង ឧស្សាហកម្ម Cheil នៅឆ្នាំ២០១៥។
យោងតាមសារព័ត៌មាន Yonhap របស់ប្រទេសកូរ៉េខាងត្បូង ឱ្យដឹងថា រដ្ឋអាជ្ញានៃប្រទេសកូរ៉េខាងត្បូង បានចោទប្រកាន់លោក លី ពីបទរំលោភទីផ្សារមូលធននិងរំលោភលើទំនុកចិត្តលើការងារ បន្ទាប់ពីបានស៊ើបអង្កេតលើការរួមបញ្ចូលគ្នារវាងក្រុមហ៊ុន SamSung C&T និង ឧស្សាហកម្ម Cheil កាលពីឆ្នាំ២០១៥។ ទោះជាយ៉ាងណា លោក លី មិនត្រូវបានបញ្ជូនខ្លួនទៅឃុំឃាំងនោះទេ។
រដ្ឋអាជ្ញាកូរ៉េសង្ស័យថា លោក លី និងថ្នាក់ដឹកនាំកំពូលរបស់ក្រុមហ៊ុនសាំសុង បានចូលរួមក្នុងគម្រោងទម្លាក់តម្លៃក្រុមហ៊ុន Samsung C&T មុនការច្របាច់បញ្ចូលគ្នាជាមួយឧស្សាហកម្ម Cheil ដើម្បីសម្រួលដល់ការគ្រប់គ្រងរបស់លោក លី បន្ទាប់ពីឪពុកលោក។
ទោះជាយ៉ាងណា ក្រុមហ៊ុនសាំសុងបានបដិសេធចំពោះការចោទប្រកាន់នេះ ដោយថា លោក លី មិនបានចូលរួមនៅក្នុងដំណើរការនៃការសម្រេចចិត្តណាមួយទាក់ទងនឹងការរួមបញ្ចូលគ្នាឆ្នាំ ២០១៥ និងថា គ្មានការកេងចំណេញតម្លៃភាគហ៊ុនឬការធ្វើពាណិជ្ជកម្មអយុត្តិធម៌ឡើយ។
ការចោទប្រកាន់ចុងក្រោយនេះ គឺបានបន្ថែមបន្ទុកមួយទៀតដល់ក្រុមហ៊ុនសាំសុង ខណៈពេលដែលលោក លី កំពុងដោះស្រាយរឿងក្តីសូកប៉ាន់ដែលធ្វើឱ្យគាត់ជាប់ពន្ធនាគារកាលពីឆ្នាំ២០១៧ ពាក់ព័ន្ធនឹងបទសូកប៉ាន់ការទុកចិត្តពីអតីតប្រធានាធិបតី ផាក គឿនហេ ជាថ្នូរនឹងការគាំទ្ររដ្ឋបាលរបស់លោកស្រី ដើម្បីឱ្យការរួមបញ្ចូលគ្នារវាង SamSung C&T និង ឧស្សាហកម្ម Cheil ឆ្នាំ២០១៥ បានសម្រេច។
គាត់ត្រូវបានដោះលែងនៅខែកុម្ភៈ ឆ្នាំ២០១៨ បន្ទាប់ពីការកាត់ទោសរបស់គាត់ត្រូវបានព្យួរដោយសាលាឧទ្ធរណ៍ ប៉ុន្តែតុលាការជាន់ខ្ពស់កាលពីឆ្នាំមុន បានបញ្ជាឱ្យមានការជំនុំជម្រះឡើងវិញ៕
