ក្រសួងអប់រំ យុវជន និងកីឡា បានលើកឡើងថា ការបើកដំណើរការសាលារៀនឡើងវិញក្នុងដំណាក់កាលទី២នេះ បានប្រព្រឹត្តទៅដោយរលូននិងមានការចូលរួមពីគ្រប់ភាគីពាក់ព័ន្ធក្នុងការអនុវត្តនូវវិធានការសុវត្ថិភាពសុខភាព។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានមានប្រសាសន៍ថា សិស្សថ្នាក់ទី៩និងទី១២នៅទូទាំងប្រទេស បានចាប់ផ្តើមចូលរៀនឡើងវិញនៅថ្ងៃចន្ទនេះសម្រាប់ដំណាក់កាលទី២ ខណៈការអនុញ្ញាតឱ្យសិស្សគ្រប់កម្រិតចូលរៀនឡើងវិញ មានសម្រាប់តែទីរួមខេត្តក្រចេះ ស្ទឹងត្រែង រតនគិរី និងមណ្ឌលគិរី។
លោកបានបន្តថា ក្រៅពីនេះ គ្រឹះស្ថានសិក្សាឯកជនប្រមាណ៣០០កន្លែងពីកម្រិតមត្តេយ្យដល់ឧត្តមសិក្សា ក៏បាននិងកំពុងចាប់ផ្តើមបើកដំណើរការឡើងវិញ សម្រាប់ដំណាក់កាលទី២ ចាប់ពីថ្ងៃចន្ទនេះ ក្រោយពីក្រសួងបានចុះពិនិត្យនិងវាយតម្លៃដោយផ្ទាល់ដល់ទីតាំងសាលា អំពីការអនុវត្តវិធានការណ៍សុវត្ថិភាពសុខភាព។
លោកបានគូសបញ្ជាក់ថា៖ «ដំណើរការបើកសាលារៀនឡើងវិញនៅដំណាក់កាលទី២ កំពុងប្រព្រឹត្តទៅដោយរលូន ដោយមានការចូលរួមពីគ្រប់ភាគីពាក់ព័ន្ធ។ ជាក់ស្តែង មាតាបិតាបានរៀបចំនំចំណី ទឹកស្អាតឱ្យកូនៗយកមកតាមខ្លួន។ ចំណែកឯគណ:គ្រប់គ្រងសាលារៀនបានអនុវត្តការរៀបចំតាមការណែនាំរបស់ក្រសួង»។
អ្នកនាំពាក្យរូបនេះបានបន្ថែមថា ក្រសួងក៏នឹងពិនិត្យលទ្ធភាពជាក់ស្តែងក្នុងការបើកដំណើរការគ្រឹះស្ថានសិក្សាសាធារណៈនៅតាមរាជធានី-ខេត្តផ្សេងទៀត តាមទ្រង់ទ្រាយតូចនិងឆ្លាស់វេនគ្នា ក្នុងពេលឆាប់ៗនេះ។
នាយកវិទ្យាល័យជាស៊ីម បឹងកេងកង លោក នុត ងួនលី បានប្រាប់វីអូឌីឱ្យដឹងថា សាលានេះបានអនុវត្តយ៉ាងម៉ឺងម៉ាត់តាមការណែនាំាំរបស់ក្រសួងអប់រំនិងក្រសួងសុខាភិបាល ដើម្បីទប់ស្កាត់ការឆ្លងរាលដាលជំងឺកូវីដ១៩។
លោកនិយាយថា៖ «ជាគោលការណ៍ក្នុងការបើកចូលរៀននៅថ្ងៃទី០៧កញ្ញាហ្នឹង យើងមានការត្រៀមមុន យើងត្រៀមទីមួយគឺយើងសម្អាតបរិស្ថានសាលារៀន យើងសម្អាតបន្ទប់រៀនដោយមានការលាងទឹក បាញ់ទឹកសម្អាតបន្ទប់រៀន ជូតបន្ទប់រៀននីមួយៗឱ្យស្អាត ហើយបន្ទាប់មកទៀត យើងក៏មានការបាញ់ថ្នាំសម្លាប់មេរោគដែលថ្នាំហ្នឹងឧបត្ថម្ភដោយសាលារាជធានីភ្នំពេញ»។
លោកបានបន្តថា សម្រាប់ការបើកដំណើរការសិក្សាឡើងវិញនៅថ្ងៃនេះ ខាងសាលាបានចាត់តាំងគ្រូនិងសិស្សមួយចំនួនពិនិត្យនិងអប់រំណែនាំដល់សិស្សក្នុងសាលាពីការប្រយុទ្ធប្រឆាំងនឹងជំងឺកូវីដ១៩ ដោយការពាក់ម៉ាស់ វាស់កម្ដៅ និងសម្អាតដៃជាប្រចាំដោយប្រើសាប៊ូឬអាល់កុល។
ចំពោះសិស្សានុសិស្សណាដែលមានកម្តៅលើសពី៣៨អង្សា លោកថា គ្រូដែលទទួលបន្ទុកនឹងទំនាក់ទំនងទៅអាណាព្យាបាល ដើម្បីមកទទួលសិស្សនោះយកទៅព្យាបាល។
អ្នកស្រី គុយ មុំ គ្រូបង្រៀនថ្នាក់ទី៩ នៃវិទ្យាល័យជាស៊ីម បឹងកេងកង បានប្រាប់វីអូឌីថា ក្រៅពីការរៀបចំបរិស្ថានក្នុងថ្នាក់រៀនឱ្យមានអនាម័យល្អនិងផាសុកភាព អ្នកស្រីក៏សង្កេតឃើញសិស្សានុសិស្សមានការទទួលខុសត្រូវចំពោះខ្លួនពួកគេផ្ទាល់ដែរ ដោយពួកគេបានពាក់ម៉ាសនិងលាងដៃជាមួយអាល់កុលជាញឹកញាប់។
សិស្សឈ្មោះ អេង ស្រីនិច ជាសិស្សរៀនថ្នាក់ទី១២នៅវិទ្យាល័យនេះ បាននិយាយថា សាលាបានរៀបចំសិស្សក្នុងមួយថ្នាក់ចន្លោះពី១៥ទៅ២០នាក់ រក្សានូវគម្លាតសុវត្ថិភាពនិងមានការវាស់កម្តៅឱ្យសិស្សជាដើម។
កញ្ញាថា៖ «ខ្ញុំគិតថាប៉ុណ្ណឹងគឺទទួលយកបាន នៅក្នុងការរបៀបថារក្សាសុវត្ថិភាពនៅក្នុងពេលជំងឺកូវីដ១៩ហ្នឹង គឺសាលាខ្ញុំរបៀបថា គេគ្រប់គ្រងបានអីចឹងហ្អាស៎»។
គួរបញ្ជាក់ថា រដ្ឋាភិបាល ក៏ដូចជាក្រសួងអប់រំ យុវជន និងកីឡា បានសម្រេចផ្អាកដំណើរការសាលារៀនទាំងអស់នៅកម្ពុជា កាលពីថ្ងៃទី១៦ ខែមីនា ដែលមានរយៈពេលប្រមាណ៦ខែមកហើយ ដើម្បីបង្ការការឆ្លងរាលដាលនៃជំងឺកូវីដ១៩។
តែយ៉ាងណា ក្រសួងបានដាក់ចេញនូវយន្តការសិក្សាពីចម្ងាយនិងការសិក្សាតាមប្រព័ន្ធអនឡាញ សម្រាប់សិស្សានុសិស្សនិងនិស្សិតទាំងអស់ ក្នុងអំឡុងពេលផ្អាកដំណើរការសាលារៀននេះផងដែរ៕