ប្រទេសចិននិងឥណ្ឌា បាននិយាយថា ពួកគេបានព្រមព្រៀងគ្នាក្នុងការដកកងទ័ពរៀងៗខ្លួនចេញពីតំបន់ព្រំដែនភ្នំហិម៉ាល័យជាកន្លែងដែលភាគីទាំងពីរមានជម្លោះ ដែលការដកថយរៀងខ្លួននេះ ដើម្បីកាត់បន្ថយភាពតានតឹង។
កិច្ចព្រមព្រៀងនេះបានកើតឡើងនៅក្នុងកិច្ចប្រជុំថ្នាក់រដ្ឋមន្ត្រីការបរទេសនៃប្រទេសទាំងពីរនៅក្នុងទីក្រុងមូស្គូ ប្រទេសរុស្ស៊ី កាលពីថ្ងៃព្រហស្បតិ៍ម្សិលមិញ។
ប្រទេសទាំងពីរបានថ្លែងក្នុងសេចក្តីថ្លែងការណ៍រួមមួយ រដ្ឋមន្ត្រីការបរទេសចិន លោក វ៉ាងយី និងរដ្ឋមន្ត្រីការបរទេសឥណ្ឌា អេស ជេហ្សានកា ដែលបានព្រមព្រៀងលើចំណុចចំនួន៥ ក្នុងនោះមានទាំងការដកថយកងទ័ពរៀងខ្លួនដើម្បីបន្ថយភាពតានតឹង។
ក្រោយការផ្ទុះអាវុធភ្លាមៗ កាលពីថ្ងៃចន្ទដើមសប្តាហ៍នេះ ចិននិងឥណ្ឌា បានប្រជុំរកដំណោះស្រាយដែរ ក្រោមការសម្របសម្រួលពីកិច្ចសហប្រតិបត្តិការសៀងហៃ ប៉ុន្តែកិច្ចប្រជុំនោះមិនមានការឯកភាពគ្នាទេ។
ប្រទេសចិននិងឥណ្ឌា បានចោទប្រកាន់គ្នាទៅវិញទៅមកនូវការបាញ់ទៅលើអាកាសក្នុងពេលប្រឈមមុខដាក់គ្នា ដែលជាការរំលោភលើពិធីសារដែលប្រកាន់ខ្ជាប់ជាយូរមកហើយមិនឱ្យប្រើអាវុធនៅលើព្រំដែនដ៏រសើប។
លោក វ៉ាង ថ្លែងប្រាប់ភាគីឥណ្ឌានៅក្នុងកិច្ចប្រជុំក្នុងទីក្រុងម៉ូស្គូ ឱ្យបញ្ឈប់និងដកទ័ពចេញជាបន្ទាន់ពីតំបន់ដែលឯកភាពគ្នាមិនឱ្យមានការផ្ទុះអាវុធនៅព្រំដែននោះ។ ការអត្ថាធិប្បាយនេះហាក់ផ្ទុយពីការបង្ហាញកម្លាំងរបស់យោធាចិនកាលពីពេលថ្មីៗនេះ។
កាសែត Global Times របស់ចិន ដែលជាកាសែតមានឥទ្ធិពល ចេញផ្សាយដោយកាសែតផ្លូវការរបស់បក្សកុម្មុយនីស្តចិន បានរាយការណ៍កាលពីថ្ងៃពុធថា កងទ័ពរំដោះប្រជាជនចិន (PLA) កំពុងរំកិលទាហាន សព្វាវុធ និងរថពាសដែកចូលព្រំដែន។
នៅដើមសប្តាហ៍នេះ ប្រទេសចិនក៏បានដាក់ពង្រាយយន្តហោះចម្បាំងដែលមានលទ្ធភាពបាញ់មីស៊ីលបានចម្ងាយ២៥០០គីឡូម៉ែត្រ ដាក់នៅជិតព្រំដែនរបស់ខ្លួនជាប់ជាមួយប្រទេសឥណ្ឌា ចំពេលដែលកម្លាំងប្រដាប់អាវុធនៃប្រទេសទាំងពីរមានការប៉ះទង្គិចគ្នាទ្រង់ទ្រាយធំជាថ្មីទៀត។
នៅក្នុងរូបថតដែលត្រូវបានចេញផ្សាយកាលពីថ្ងៃអង្គារ នៅលើគណនីប្រព័ន្ធផ្សព្វផ្សាយសង្គមផ្លូវការនៃបញ្ជាការដ្ឋានភាគកណ្ដាលរបស់កងទ័ពរំដោះប្រជាជនចិន បានឱ្យដឹងថា យន្តហោះទម្លាក់គ្រាប់បែកប្រភេទ Xian H-6 ចំនួន៣គ្រឿង និងយន្តហោះដឹកកងទ័ពប្រភេទ Xian Y-20 ចំនួន១គ្រឿងទៀត ត្រូវបានដាក់បង្ហាញនៅអាកាសយានដ្ឋានមួយ ដែលត្រូវបានគេគិតថា ស្ថិតនៅក្នុងតំបន់ស្វយ័តទីបេ៕
