សហរដ្ឋអាមេរិក សម្រេចហាមឃាត់ការនាំចូលផលិតផលមួយចំនួនពីតំបន់ហ្សិនជាំងប្រទេសចិន ដោយថា ផលិតផលទាំងនោះបានមកពីការបង្ខិតបង្ខំជនមូស្លីម Uighur ជាង១លាននាក់ក្នុងជំរំប្រមូលផ្ដុំ ឱ្យផលិត។
សារព័ត៌មាន Washingtonexaminer បានដកស្រង់ប្រសាសន៍របស់អនុរដ្ឋលេខាធិការនៃក្រសួងមហាផ្ទៃអាមេរិក លោក Ken Cuccinelli ដែលបានលើកឡើងក្នុងសន្និសីទសារព័ត៌មានកាលពីថ្ងៃចន្ទថា មន្ត្រីគយនិងប៉ូលិសព្រំដែនដែលមានតួនាទីក្នុងការត្រួតពិនិត្យការនាំចូលនៅតាមកំពង់ផែនិងព្រំដែនទាំងអស់ នឹងចាប់ផ្ដើមហាមឃាត់ផលិតផលដែលផលិតនៅតំបន់ហ្សិនជាំងនៃប្រទេសចិន មិនឱ្យចូលសហរដ្ឋអាមេរិកនោះទេ ដោយសារផលិតផលចេញពីតំបន់នោះពាក់ព័ន្ធនឹងការប្រើប្រាស់មនុស្សដោយបង្ខិតបង្ខំ។
លោកនិយាយថា៖ «វាមិនមែនជាមជ្ឈមណ្ឌលបណ្ដុះបណ្ដាលទេ! វាជាជំរំប្រមូលផ្ដុំមនុស្ស ជាកន្លែងដែលសាសនានិងជនជាតិភាគតិចជាគោលដៅនៃការបៀតបៀន និងប្រើឱ្យធ្វើការក្នុងលក្ខខណ្ឌដ៏សាហាវ ដោយគ្មានទទួលជំនួយនិងគ្មានសេរីភាព។ វាជាទាសភាពសម័យទំនើប។ លោកប្រធានាធិបតី ដូណាល់ ត្រាំ បានបញ្ជាក់យ៉ាងច្បាស់ហើយថា រដ្ឋបាលរបស់លោកនឹងមិនអត់ធ្មត់ចំពោះការរំលោភសិទ្ធិមនុស្សដ៏អាក្រក់របស់ចិននោះទេ»។
ការហាមឃាត់នោះ ត្រូវបានដកហូតការបញ្ជាទិញទាំងអស់នូវផលិតផលដែលមានដូចជា ក្រណាត់កាតុង គ្រឿងផ្គុំកុំព្យូទ័រ ផលិតផលធ្វើសក់ និងសម្លៀកបំពាក់។
ស្ថានទូតចិនប្រចាំសហរដ្ឋអាមេរិកបានប្រាប់សារព័ត៌មាន NBC ដោយដកស្រង់ប្រសាសន៍អ្នកនាំពាក្យការបរទេសចិន លោក Zhao Lijian កាលពីសប្ដាហ៍មុនថា ប្រទេសចិនបានបង្ហាញតម្លាភាពចំពោះអាមេរិកហើយទាំងចំនួនមនុស្សនិងបញ្ហាដែលប្រទេសចិនប្រឈម។ លោកបន្ថែមថា ការចាប់បញ្ជូនចិនមូស្លីម Uighur ទៅមណ្ឌលអប់រំឡើងវិញនៅតំបន់ហ្សិនជាំង គឺមិនមែនធ្វើឡើងដើម្បីបំពារបំពានសិទ្ធិមនុស្ស សិទ្ធិជនជាតិ ឬសាសនានោះទេ តែវាទាក់ទងនឹងការប្រឆាំងអំពើភេរវកម្មនិងការបំបែកខ្លួនរបស់ក្រុមទាំងនេះ។
លោកបានថ្លែងថា៖ «អ្វីដែលសហរដ្ឋអាមេរិកបារម្ភនោះ គឺមិនមែនសិទ្ធិមនុស្សទេ គឺប្រទេសនេះ គ្រាន់តែប្រើពាក្យសិទ្ធិមនុស្ស មកបិទបាំងការបំផ្លាញភាពនឹងនរនៃក្រុមហ៊ុនចិននៅហ្សិនជាំង និងព្យាយាមធ្វើឱ្យនយោបាយចិននៅហ្សិនជាំងកាន់តែអាប់អួប៉ុណ្ណោះ»។
ជនជាតិមូស្លីម Uighur គឺជនជាតិចិនដែលកាន់សាសនាឥស្លាមនៅតំបន់ហ្សិនជាំង ជាតំបន់នៅភាគពាយ័ព្យប្រទេសចិន មានព្រំដែនជាប់ប្រទេសប៉ាគីស្ថាន កាហ្សាក់ស្ថាន កៀហ្ស៊ីស៊ីស្ថាន រុស្ស៊ី និងម៉ុងហ្គោលី តំបន់នេះជាតំបន់ដែលសម្បូរធនធានធម្មជាតិជាងគេនៅប្រទេសចិនដែលរួមមាន ប្រេងកាត ឧស្ម័នធម្មជាតិ និងស្ពាន់ជាដើម។
ជនជាតិ Uighur នៅតំបន់ហ្សិនជាំងធ្លាប់បានទទួលឯករាជ្យម្ដងកាលពីឆ្នាំ១៩៤០ តែនៅឆ្នាំ១៩៤៩ ត្រូវបានចិនយកមកគ្រប់គ្រងវិញ។ រដ្ឋាភិបាលចិនបានលើកឡើងថា ការបញ្ជូនជនឥស្លាម Uighur ជាង១លាននាក់ទៅមណ្ឌលអប់រំកែប្រែ គឺដើម្បីបណ្ដុះបណ្ដាលអប់រំជនជាតិទាំងនោះ ក្នុងន័យការពារសន្ដិសុខប្រទេសខ្លួន ខណៈមានសេចក្តីរាយការណ៍ថា ក្នុងមណ្ឌលអប់រំកែប្រែទាំងនោះមានបង្កប់នូវការធ្វើទារុណកម្ម។
កាលពីខែតុលា ឆ្នាំ២០១៩ សហរដ្ឋអាមេរិក បានដាក់បម្រាមរាប់សិបមុខទំនិញនាំចូល មិនឱ្យចូលប្រទេសខ្លួន ដោយថា ប្រទេសនេះមិនអាចទទួលយកបានទេនូវទំនិញដែលបានមកពីការរួមចំណែកនៃការធ្វើពលកម្មអ្នកទោស ពលកម្មកុមារ និងការធ្វើការបែបទាសករ៕