មន្ត្រីការទូតអាមេរិក បានចោទសួរជាថ្មីទៀតជុំវិញព័ត៌មានដ៏ចម្រូងចម្រាសដែលចោទថា កម្ពុជាបានយល់ព្រមអនុញ្ញាតឱ្យយោធាចិននូវសិទ្ធិផ្ដាច់មុខចូលទៅប្រើប្រាស់មូលដ្ឋានកងទ័ពជើងទឹកស្ថិតនៅខេត្តព្រះសីហនុ ភាគខាងត្បូងរាជធានីភ្នំពេញ។
ក្នុងសេចក្ដីរាយការណ៍របស់ខ្លួនកាលពីឆ្នាំមុន កាសែតអាមេរិក The Wall Street Journal បានចុះផ្សាយថា កម្ពុជានិងចិនបានចុះហត្ថលេខាជាសម្ងាត់លើកិច្ចព្រមព្រៀងមួយកាលពីឆ្នាំមុន ដែលអនុញ្ញាតឱ្យចិនមានសិទ្ធិផ្ដាច់មុខចូលទៅប្រើប្រាស់មូលដ្ឋានកងទ័ពជើងទឹករាមក្នុងរយៈពេល៣០ឆ្នាំ ដោយអាចបន្តឡើងវិញនៅរៀងរាល់១០ឆ្នាំម្ដង ហើយអនុញ្ញាតឱ្យចិនដាក់«ពង្រាយបុគ្គលិកយោធា រក្សាទុកសព្វាវុធ និងអនុញ្ញាតឱ្យនាវាចម្បាំងចិនចូលចត»។
ប៉ុន្តែកម្ពុជាបានច្រានចោលការចោទប្រកាន់នេះ ដោយចាត់ទុកថាជា«ព័ត៌មានក្លែងក្លាយ» ហើយក៏បានរៀបចំឱ្យអ្នកសារព័ត៌មានមួយក្រុមចូលទៅទស្សនាមូលដ្ឋានកងទ័ពជើងទឹករាមផងដែរកាលពីខែកក្កដាឆ្នាំមុន។
ក្រោយពីការបកស្រាយរបស់កម្ពុជាអស់រយៈពេលជាង១ឆ្នាំមក មន្ទិលសង្ស័យជុំវិញមូលដ្ឋានកងទ័ពជើងទឹករាមនេះ ត្រូវបាននាំយកមកជជែកឡើងវិញនៅក្នុងជំនួបរវាងរដ្ឋមន្ត្រីការពារជាតិកម្ពុជា លោក ទៀ បាញ់ និងអគ្គរដ្ឋទូតអាមេរិកប្រចាំទីក្រុងភ្នំពេញ លោក Patrick Murphy កាលពីថ្ងៃចន្ទកន្លងមកនេះ ដែលពិភាក្សាអំពីទំនាក់ទំនងយោធារវាងប្រទេសទាំងពីរ។
ក្នុងអត្ថបទចេញផ្សាយលើវេបសាយរបស់ខ្លួន នាយកដ្ឋានព័ត៌មានរបស់ក្រសួងការពារជាតិកម្ពុជា បានផ្សាយថា លោក Patrick Murphy បានចោទសួរបញ្ហានេះជាថ្មី ហើយប្រមុខការពារជាតិកម្ពុជា លោក ទៀ បាញ់ បកស្រាយថា ការអភិវឌ្ឍមូលដ្ឋានកងទ័ពជើងទឹករាមដែលស្ថិតនៅក្នុងខេត្តព្រះសីហនុ គឺ«សម្រាប់កងទ័ពជើងទឹកកម្ពុជាប្រើប្រាស់តែប៉ុណ្ណោះ»។
អ្នកនាំពាក្យស្ថានទូតអាមេរិកប្រចាំកម្ពុជា លោក Arend Swartjez បានប្រាប់តាមអ៊ីម៉ែលកាលពីថ្ងៃម្សិលមិញថា លោក Patrick Murphy បានជជែកពីកិច្ចសហប្រតិបត្តិការខាងយោធារវាងប្រទេសទាំងពីរជាមួយលោក ទៀ បាញ់ ប៉ុន្តមន្ត្រីនាំពាក្យរូបនេះមិនបានផ្ដល់ព័ត៌មានលម្អិតបន្ថែមថា ហេតុអ្វីបានជាបញ្ហាមូលដ្ឋានកងទ័ពជើងទឹករាម ត្រូវបានមន្ត្រីការទូតអាមេរិកលើកឡើងជាថ្មីនោះឡើយ។
អ្នកនាំពាក្យក្រសួងការពារជាតិ លោក ឈុំ សុជាតិ ប្រាប់ថា លោកក៏មិនបានដឹងពីមូលហេតុជុំវិញការលើកឡើងនូវបញ្ហានេះនៅក្នុងជំនួបនោះដែរ ប៉ុន្តែលោកមានប្រសាសន៍ថា៖
«សម្រាប់អ្នកដែលគេឆ្ងល់ គេចេះតែសួរទៅ ហើយយើងក៏ចេះតែឆ្លើយពន្យល់គេទៅ»។
លោក ទៀ បាញ់ ត្រូវបានដកស្រង់សម្ដីដែលអះអាងថា កំពង់ផែកងទ័ពជើងទឹករាម នឹងទទួលស្វាគមន៍គ្រប់នាវាមកពីបណ្ដាប្រទេសនានា និងមិនត្រូវបានយកធ្វើជាមូលដ្ឋានកងទ័ពបរទេសនោះឡើយ ក្រោយពីត្រូវបានអភិវឌ្ឍរួចរាល់នាពេលអនាគត។
ជំនួបរវាងមន្ត្រីការទូតអាមេរិកនិងប្រមុខការពារជាតិកម្ពុជា បានកើតឡើងមួយសប្ដាហ៍ក្រោយពីរដ្ឋាភិបាលអាមេរិកសម្រេចដាក់ទណ្ឌកម្មលើក្រុមហ៊ុនចិន Union Development Group (UDG) ដែលកំពុងដំណើរការសាងសង់គម្រោងអភិវឌ្ឍន៍មានតម្លៃជិត៤ពាន់លានដុល្លារនៅក្នុងស្រុកបទុមសាគរ និងគីរីសាគរ ក្នុងខេត្តកោះកុង ជាខេត្តជាប់មួយខេត្តព្រះសីហនុផងដែរ។
ក្រុមហ៊ុន UDG ដែលត្រូវបានរាយការណ៍ថា ស្ថិតក្រោមការកាន់កាប់របស់ក្រុមហ៊ុនរដ្ឋចិន Tianjin Union Development Group Co.,Ltd ត្រូវបានចោទថា បានរំលោភដីធ្លីប្រជាពលរដ្ឋ ប៉ះពាល់បរិស្ថាន និងគ្រោងយកធ្វើជាមូលដ្ឋានយោធានាពេលអនាគត ប៉ុន្តែកម្ពុជាក៏បានច្រានចោលទៅវិញ។
នៅពេលត្រូវបានសួរថា តើទណ្ឌកម្មថ្មីៗនេះត្រូវបាននាំយកទៅជជែកឬយ៉ាងណានោះ លោក ឈុំ សុជាតិ ប្រាប់ថា គ្មានការលើកឡើងអំពីបញ្ហានេះទេ ហើយលោកក៏មិនបានដឹងទេថា តើជំនួបនេះត្រូវបានគ្រោងទុកមុនមានទណ្ឌកម្មកើតឡើងឬយ៉ាងណានោះ។
កម្ពុជានិងសហរដ្ឋអាមេរិក បានផ្ដួចផ្ដើមឱ្យមានកិច្ចសហប្រតិបត្តិការវិស័យយោធាតាមរយៈការធ្វើសមយុទ្ធយោធាប្រចាំឆ្នាំហៅថា «ឆ្មាំអង្គរ» ប៉ុន្តែសមយុទ្ធនេះត្រូវបានផ្អាកទៅវិញចាប់តាំងពីដើមឆ្នាំ២០១៧ នៅពេលកម្ពុជាបានជូនដំណឹងពីការលុបចោលសមយុទ្ធយោធារួមមួយនេះ។ ផ្ទុយទៅវិញ កម្ពុជានិងចិនបានធ្វើសមយុទ្ធយោធារួមគ្នាដែលហៅថា «នាគមាស» ចាប់តាំងពីឆ្នាំ២០១៦មក៕