មន្ត្រីជាន់ខ្ពស់នគរបាលជាតិ បានឱ្យដឹងថា មន្ត្រីនគរបាលសក្តិ៥មួយរូបដែលត្រូវបានប្ដឹងពីបទគំរាមកំហែងដោយកាំភ្លើងខ្លីនោះ ត្រូវបានថ្នាក់ដឹកនាំនគរបាលជាតិសម្រេចដកព្យួរឋានន្តរសក្តិនិងតួនាទី ដើម្បីបើកផ្លូវឱ្យតុលាការបន្តនីតិវិធី។
ប្រធានការិយាល័យប្រឆាំងភេរវកម្មនៃនគរបាលជាតិ លោក ថ្លាង ភិនរ៉ា ត្រូវបានអគ្គស្នងការនគរបាលជាតិ លោក នេត សាវឿន បញ្ជាឱ្យហៅសាកសួរ ក្រោយពីរងបណ្ដឹងដែលចោទថា បានយកកាំភ្លើងខ្លីភ្ជង់និងគំរាមកំហែងលើថៅកែភោជនីយដ្ឋានអង្គរជុំ នៅខណ្ឌទួលគោក អំឡុងពេលផឹកស៊ីកាលពីថ្ងៃអាទិត្យចុងសប្ដាហ៍កន្លងមកនេះ។
អគ្គស្នងការរងនគរបាលជាតិ លោក អ៊ី សុខឃី បានប្រាប់វីអូឌីនៅថ្ងៃនេះថា ថ្នាក់ដឹកនាំនៃអគ្គស្នងការនគរបាលជាតិ បានសម្រេចដកហូតកាំភ្លើងខ្លីពីលោក ថ្លាង ភិនរ៉ា ហើយក៏បានព្យួរតួនាទីរបស់លោកផងដែរ ដើម្បីបើកផ្លូវឱ្យតុលាការអនុវត្តនីតិវិធីបន្ត។
លោក អ៊ី សុខឃី ប្រាប់ថា៖ «យើងបានអនុវត្តវិន័យទៅលើគាត់ហើយ ដោយដកហូតអាវុធនិងព្យួរការងារ។ […] ព្យួរការងារ បានន័យថា គាត់រក្សាភាពនៅទំនេរ ដើម្បីទុកលទ្ធភាពខាងតុលាការ លោកចាត់ការ»។
នគរបាលជាន់ខ្ពស់រូបនេះ បានបញ្ជាក់បន្ថែមថា ថ្នាក់ដឹកនាំអគ្គស្នងការនគរបាលជាតិ នឹងធ្វើសេចក្ដីសម្រេចថា នឹងត្រូវដកហូតលោក ថ្លាង ភិនរ៉ា ពីក្របខណ្ឌនគរបាលជាតិឬយ៉ាងណា បន្ទាប់ពីការអនុវត្តនីតិវិធីដោយតុលាការ។
លោក អ៊ី សុខឃី ប្រាប់បន្ថែមថា៖ «អគ្គស្នងការនគរបាលជាតិ នឹងរង់ចាំលទ្ធផលនៃការអនុវត្តនីតិវិធីច្បាប់របស់តុលាការ យើងនឹងបន្តសម្រេចចិត្តបន្ថែមទៀត។ […] ពេលតុលាការលោកសម្រេចហើយ យើងនឹងបន្តអនុវត្តវិន័យបន្ថែមទៀត»។
អគ្គស្នងការរងនគរបាលជាតិរូបនេះ បានបញ្ជាក់ថា ថ្នាក់ដឹកនាំនគរបាលជាតិបានសម្រេចបែបនេះ បន្ទាប់ពីថ្នាក់ដឹកនាំអង្គភាពចុះទៅសួរសុខទុក្ខជនរងគ្រោះនិងបានសុំទោសចំពោះអ្វីដែលបានកើតឡើងផងដែរ។
ម្ចាស់ភោជនីយដ្ឋានអង្គរជុំ លោក ជុយ សុខហេង បានប្ដឹងលោក ថ្លាង ភិនរ៉ា ទៅរដ្ឋមន្ត្រីក្រសួងមហាផ្ទៃ លោក ស ខេង សាលាដំបូងរាជធានីភ្នំពេញ និងគណៈមេធាវីកម្ពុជា ជាស្ថាប័នដែលលោក ភិនរ៉ា មានតួនាទីជាសមាជិកផងដែរ។
ថៅកែហាងគុយទាវរូបនេះ បានលើកឡើងក្នុងពាក្យបណ្ដឹងថា លោក ថ្លាង ភិនរ៉ា បានចូលរួមផឹកស៊ីដោយគ្មានការអញ្ជើញជាមួយមិត្តភក្តិមួយចំនួនកាលពីថ្ងៃអាទិត្យចុងសប្ដាហ៍កន្លងមកនេះ នៅភោជនីយដ្ឋានរបស់លោកដែលបានផ្អាកអាជីវកម្មអំឡុងពេលឈប់សម្រាកភ្ជុំបិណ្ឌ។
លោក សុខហេង រៀបរាប់បន្តថា មន្ត្រីនគរបាលប្រឆាំងភេរវកម្មរូបនេះ បានផឹកស៊ីស្រវឹង បញ្ចេញអាការច្រងេងច្រងាងនិងប្រើភាសាគំរាមកំហែង មុននឹងដកកាំភ្លើងខ្លីពីចង្កេះភ្ជង់ទៅលើរូបលោកនិងភរិយា។
លោក សុខហេង បានទាមទាររកយុត្តិធម៌សម្រាប់គ្រួសារលោក ហើយបានទាមទារសំណងជំងឺចិត្តជាទឹកប្រាក់ចំនួន១០ម៉ឺនដុល្លារផងដែរ។
អ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង បានប្រាប់វីអូឌីកាលពីថ្ងៃពុធថា តុលាការបានទទួលបណ្ដឹងរបស់ថៅកែភោជនីយដ្ឋានអង្គរជុំរួចហើយ ហើយបានរៀបចំបញ្ជូនបន្តផងដែរ។
ប្រសិនបើត្រូវបានតុលាការផ្ដន្ទាទោស មន្ត្រីនគរបាលរូបនេះត្រូវប្រឈមមុខទោសជាប់ពន្ធនាគារពី៦ខែទៅ២ឆ្នាំ និងពិន័យប្រាក់ចន្លោះពី១លានរៀលដល់៤លានរៀល ក្រោមមាត្រា២៣៣នៃក្រមព្រហ្មទណ្ឌ៕