ប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើងសម្រាប់ឆ្នាំ២០២១ ត្រូវបានរដ្ឋាភិបាលតំឡើង២ដុល្លារបន្ថែមលើប្រាក់ឈ្នួលគោលបច្ចុប្បន្ន ខណៈដែលពិភពលោកកំពុងជួបបញ្ហាសុខភាពសកល ហើយកម្ពុជាត្រូវបានកាត់ផ្តាច់មួយផ្នែក នៃប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ឬ EBA ពីសហភាពអឺរ៉ុប។
នៅម៉ោងប្រមាណ១២ថ្ងៃត្រង់ កម្មករ-កម្មការិនីរាប់ពាន់នាក់របស់រោងចក្រនានាស្ថិតក្នុងតំបន់សួនឧស្សាហកម្ម វឌ្ឍនៈ បានចេញទិញនិងញ៉ាំបាយនៅមុខរោងចក្រដែលពួកគេបម្រើការងារ។
កម្មការិនីម្នាក់ក្នុងចំណោមកម្មករ-កម្មការិនីរាប់ពាន់នាក់ដែលកំពុងអង្គុយញ៉ាំបាយជុំគ្នាជាមួយកម្មករ-កម្មការិនីផ្សេងទៀតប្រហែល៥ទៅ៦នាក់នៅក្រោមដើមឈើមុខរោងចក្រ អ្នកស្រី ទូច ស្រីនិច បានឆ្លៀតពេលជជែកជាមួយអ្នកយកព័ត៌មានវីអូឌីបណ្តើរញ៉ាំបាយបណ្តើរ។
កម្មការិនីបម្រើការងារនៅរោងចក្រ ម៉ាកាឡូតវ័ន ហ្កាមិន ជាង១០ឆ្នាំ អ្នកស្រី ទូច ស្រីនិច មិនទាន់បានដឹងនៅឡើយទេថា នៅឆ្នាំ២០២១ខាងមុខនេះ ប្រាក់ឈ្នួលគោលរបស់កម្មកររោងចក្រឡើងបាន២ដុល្លារនោះ។
កម្មការិនី វ័យ២៩ឆ្នាំ មកពីខេត្តស្វាយរៀងរូបនេះ ហាក់មានការភ្ញាក់ផ្អើលនៅពេលដែលអ្នកសារព័ត៌មានវីអូឌីប្រាប់ថា ប្រាក់ឈ្នួលគោលកម្មករនៅឆ្នាំក្រោយឡើងបាន២ដុល្លារ។
អ្នកស្រីបន្ថែមថា៖ «២ដុល្លារតិចណាស់ ទំនិញឥលូវក៏ថ្លៃ។ បើតំឡើងបានដូចឆ្នាំមុនៗ អាចទទួលយកបាន តែនេះតិចណាស់»។
កម្មការិនីផ្នែកដេររូបនេះ បានរៀបរាប់ថា ប្រាក់ឈ្នួលដែលអ្នកស្រីទទួលបានពីការធ្វើការងាររោងចក្របច្ចុប្បន្ននេះ គឺត្រូវចំណាយទៅលើការបង់ថ្លៃបន្ទប់ជួល ទឹកភ្លើង ហូបចុកប្រចាំថ្ងៃ ផ្ញើឱ្យកូនរៀននៅស្រុក និងត្រូវបង់សងធនាគារមួយខែជាង១០០ដុល្លារផងដែរ។
អ្នកស្រីបន្ថែមថា៖ «យើងមិនពេញចិត្ត ក៏មិនដឹងធ្វើយ៉ាងម៉េចបាន បើថ្នាក់លើគេកំណត់អញ្ចឹងហើយ»។
ប្រាប់វីអូឌីក្រោយញ៉ាំបាយថ្ងៃត្រង់រួច កម្មការិនីម្នាក់ទៀតមានស្រុកកំណើតនៅខេត្តពោធិ៍សាត់កញ្ញា ម៉ាប់ ភ័ក្ត្រា បម្រើការងារនៅរោងចក្រ ម៉ាកាឡូត ៤ឆ្នាំ បាននិយាយថា កញ្ញាមិនពេញចិត្តចំពោះការតំឡើងប្រាក់ឈ្នួលចំនួន២ដុល្លារសម្រាប់ឆ្នាំ២០២១នេះទេ ប៉ុន្តែកម្មការិនី វ័យ២២ឆ្នាំរូបនេះ ក៏បារម្ភពីការបាត់បង់ការងារធ្វើផងដែរ។
កញ្ញាបន្ថែមថា៖ «បើយើងទាមទារច្រើន ថៅកែគ្មានលទ្ធភាព ថៅកែអាចបិទរោងចក្រ យើងក៏ពិបាកដែរ។ អីចឹងយើងខ្លាចអត់ការងារធ្វើដែរ។ បើអត់ការងារធ្វើ មានតែទៅនៅផ្ទះ មានលុយណាចាយ! អ្នកខ្លះជំពាក់ធនាគារ បានលុយពីណាបង់សងគេ»។
កំពុងសម្រាករយៈពេល២ខែដោយសារខាងរោងចក្រព្យួរការងារ អ្នកស្រី ជា សុខា បម្រើការងារ៧ឆ្នាំ នៅរោងចក្រW&D ស្ថិតក្នុងខណ្ឌមានជ័យ បាននិយាយថា កម្មករសម្រេចទទួលការតំឡើងប្រាក់ឈ្នួលគោល២ដុល្លារទាំងបង្ខំចិត្តដោយគ្មានការតវ៉ានេះ គឺពួកគេក៏បានបារម្ភពីការបាត់បង់ការរងារធ្វើដែរ ខណៈរោងចក្រដែលអ្នកស្រីធ្វើការនោះ មិនសូវមានការងារធ្វើនិងកំពុងព្យួរការងារកម្មករជិត១ពាន់នាក់ផងនោះ។
អ្នកស្រីបន្ថែមថា៖ «វាពាក់ព័ន្ធជាមួយជំងឺកូវីដនេះផងដែរ។ អីចឹងវាធ្វើឱ្យទឹកចិត្តរបស់កម្មករមួយចំនួនដែលគាត់គិតថា បើមិនទទួលយក២ដុល្លារនោះទេ គាត់ខ្លាចបាត់បង់ការងារ។ អីចឹងការយល់ព្រមទទួលយកនេះ គឺព្រមទទួលយកទាំងបង្ខំចិត្តទេ»។
កម្មការិនីផ្នែកដេររូបនេះបន្តថា កាលណាតែប្រាក់ឈ្នួលកម្មករឡើង គឺបន្ទប់ជួលនិងទំនិញទីផ្សារក៏ឡើងថ្លៃតាមនោះដែរ។
អ្នកស្រីបន្ថែមថា៖ «ប្រាក់ឈ្នួលកម្មករឡើង មិនមែនផ្ទះជួលនិងទំនិញជុំវិញខ្លួនយើងនៅដដែលណា! ពេលដែលប្រាក់ខែកម្មករឡើង របស់របរក៏ឡើងថ្លៃដែរ។ អីចឹង បើសិនជាឱ្យខ្ញុំជ្រើសរើសបាន ខ្ញុំយកប្រាក់ឈ្នួលពីមុនវិញ ហើយឱ្យទំនិញទីផ្សារថោកដូចពីមុនដែរ»។
រដ្ឋមន្ត្រីក្រសួងការងារ លោក អ៊ិត សំហេង ប្រាប់អ្នកសារព័ត៌មានក្រោយកិច្ចប្រជុំពិភាក្សាប្រាក់ឈ្នួលអប្បបរមាកាលពីថ្ងៃទី១០ ខែកញ្ញាថា ការដំឡើងចំនួន២ដុល្លារនេះ គឺដោយផ្អែកលើការរីករាលដាលនៃជំងឺកូវីដ១៩ ដែលធ្វើឱ្យប៉ះពាល់ទៅដល់ខ្សែចង្វាក់ផលិតកម្ម ការផ្គត់ផ្គង់ ការនាំចេញ និងលំហូរសាច់ប្រាក់របស់រោងចក្រនីមួយៗ ប៉ុន្តែលោកថា ការដកប្រព័ន្ធអនុគ្រោះពន្ធ(EBA) ២០ភាគរយរបស់សហភាពអឺរ៉ុប គឺមិនប៉ះពាល់ខ្លាំងនោះទេ។
ក្រុមប្រឹក្សាជាតិប្រាក់ឈ្នួលអប្បបរមា ដែលប្រមូលផ្ដុំដោយភាគីតំណាងកម្មករ ភាគីតំណាងថៅកែរោងចក្រ និងភាគីរដ្ឋាភិបាល បានជួបប្រជុំចរចាគ្នាចុងក្រោយនៅថ្ងៃទី១០ ខែកញ្ញា ដោយភាគីតំណាងកម្មករស្នើដំឡើង១២,៣៥ដុល្លារ ខណៈភាគីថៅកែស្នើដក១៧,៣៩ដុល្លារ និងភាគីរដ្ឋាភិបាលស្នើដក៤ដុល្លារនៃប្រាក់ឈ្នួលគោលបច្ចុប្បន្ន១៩០ដុល្លារ។
ដោយសារតែតួលេខនេះមានភាពខុសគ្នាខ្លាំង ក្រុមប្រឹក្សាជាតិប្រាក់ឈ្នួលអប្បបរមាបានសម្រេចជារួមកំណត់យកតួលេខ១៩០ដុល្លារ ជាប្រាក់ឈ្នួលទាបបំផុតសម្រាប់កម្មករក្នុងវិស័យកាត់ដេរសម្រាប់ឆ្នាំ២០២១ ហើយលោកនាយករដ្ឋមន្ត្រី ហ៊ុន សែន សម្រេចបន្ថែម២ដុល្លារទៀត ដែលធ្វើឱ្យប្រាក់ឈ្នួលគោលរបស់កម្មករនៅឆ្នាំថ្មី ឡើងដល់១៩២ដុល្លារសម្រាប់កម្មករពេញសិទ្ធ និង១៨៧ដុល្លារសម្រាប់កម្មករស្ថិតក្នុងដំណាក់កាលសាកល្បងការងារ។
បើតាមរដ្ឋមន្ត្រីក្រសួងការងារ លោក អ៊ិត សំហេង ប្រាប់អ្នកសារព័ត៌មានក្រោយកិច្ចប្រជុំ គឺមានរោងចក្រកាត់ដេរប្រមាណ៨០បានបិទទ្វារ និងប្រមាណ៤០០បានព្យួរការងារ។ លោកថា បច្ចុប្បន្នមានចន្លោះពី៦ទៅ៧ម៉ឺននាក់ប៉ុណ្ណោះដែលកំពុងអត់ការងារធ្វើ៕