អគ្គលេខាធិការក្រុមប្រឹក្សាសកម្មភាពជនពិការ ស្នើអង្គការសហប្រជាជាតិប្រចាំនៅកម្ពុជា ជួយដល់សមាគមនិងអង្គការជនពិការមួយចំនួនដែលកំពុងខ្វះខាតធនធាន ក្នុងអំឡុងពេលដែលកម្ពុជាកំពុងជួបបញ្ហាជំងឺកូវីដ១៩។
ការស្នើនេះ បានធ្វើឡើងនៅក្នុងជំនួបរវាងលោក ឯម ច័ន្ទមករា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអគ្គលេខាធិការក្រុមប្រឹក្សាសកម្មភាពជនពិការ ជាមួយលោក នីក បេរេដហ្វត តំណាងកម្មវិធីអភិវឌ្ឍន៍នៃអង្គការសហប្រជាជាតិប្រចាំនៅកម្ពុជា នៅទីស្តីការក្រសួងសង្គមកិច្ច នៅព្រឹកថ្ងៃទី១៣ ខែតុលា ឆ្នាំ២០២០។
លោក ឯម ច័ន្ទមករា បានលើកឡើងក្នុងទំព័រហ្វេសប៊ុករបស់លោកថា កន្លងមក ភាគច្រើនជនមានពិការភាពតែងតែរៀនជំនាញម៉ាស្សា សិល្បៈតន្ត្រី ប៉ុន្តែដោយសារមានបញ្ហាជំងឺកូវីដ១៩ ការងារម៉ាស្សាត្រូវបានផ្អាកមួយរយៈ ដែលបានប៉ះពាល់ដល់ជីវភាពរស់នៅរបស់ពួកគាត់។
ក្នុងជំនួបនោះ លោកបានស្នើដល់អង្គការសហប្រជាជាតិប្រចាំនៅកម្ពុជា ពិនិត្យលទ្ធភាពជួយដល់សមាគមនិងអង្គការជនពិការដែលកំពុងប្រឈមបញ្ហាកូវីដ-១៩ ហើយត្រូវការធនធានសម្រាប់ដំណើរការអង្គភាព។
លោកបានគូសបញ្ជាក់ថា៖ «ខ្ញុំស្នើសុំតំណាងអង្គការសហប្រជាជាតិប្រចាំនៅកម្ពុជា ជួយពិចារណាធ្វើយ៉ាងណាឱ្យអង្គការសមាគមដឹកនាំដោយជនមានពិការភាព ទទួលបានផលប្រយោជន៍ពិតប្រាកដ»។
រដ្ឋលេខាធិការក្រសួងសង្គមកិច្ចរូបនេះ បានបន្ថែមទៀតថា៖ «ការផ្តល់អំណោយបែបសប្បុរសធម៌ជាការល្អម្យ៉ាង ប៉ុន្តែសម្រាប់សម្រួលតែក្នុងរយៈពេលខ្លីប៉ុណ្ណោះ។ ប្រសិនបើយើងផ្តល់ទីប្រឹក្សាបច្ចេកទេសជួយដល់សមាគម-អង្គការដែលដឹកនាំដោយជនមានពិការភាព ហើយបណ្ដុះបណ្ដាលគាត់ពីជំនាញផ្នែកដឹកនាំ ផ្នែកយុទ្ធសាស្ត្រ ផ្នែកសរសេរគម្រោងជាដើម ពេលនោះគាត់អាចមានសមត្ថភាពដឹកនាំនិងដាក់សំណើទៅដៃគូអភិវឌ្ឍន៍ ដើម្បីមានលទ្ធភាពធ្វើការជាដៃគូសហការល្អជាមួយរដ្ឋាភិបាល»។
លោក ឯម ច័ន្ទមករា បានឱ្យដឹងទៀតថា លោក នីក បេរេដហ្វ តំណាងប្រចាំប្រទេសកម្មវិធីអភិវឌ្ឍន៍នៃអង្គការសហប្រជាជាតិប្រចាំនៅកម្ពុជា បានស្វាគមន៍សំណើរបស់លោក ហើយអង្គការសហប្រជាជាតិដែលធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជា នឹងអនុវត្តតាមអាទិភាពដែលរដ្ឋាភិបាលកំណត់។
លោក នីក បេរេដហ្វ ត្រូវបានស្រង់ប្រសាសន៍បន្តថា៖ «កម្មវិធីអភិវឌ្ឍន៍នៃអង្គការសហប្រជាជាតិប្រចាំនៅកម្ពុជា មានឆន្ទៈខ្ពស់ក្នុងការជួយដល់រាជរដ្ឋាភិបាលកម្ពុជាក្នុងវិស័យពិការភាព ធ្វើយ៉ាងណាឱ្យជនមានពិការភាពទទួលបានសុខុមាលភាព សិទ្ធិទទួលបានការពារ មានជីវិតរស់នៅសមរម្យ»។
លោក នីក បានបន្តទៀតថា បញ្ហាជំងឺកូវីដ១៩ បានបង្កផលប៉ះពាល់ដល់ប្រជាជនទាំងមូលនៅប្រទេសកម្ពុជា ក្នុងនោះ ជនមានពិការភាពបានរងផលប៉ះពាល់ខ្លាំងជាងគេ ដែលករណីនេះ ទាមទារឱ្យមានការគិតគូរបន្ថែមទៅដល់ពួកគាត់ ដើម្បីធ្វើយ៉ាងណាឱ្យពួកគាត់មានលទ្ធភាពបង្កើនចំណូលឱ្យពួកគាត់ឡើងវិញ៕