ក្រុមកម្មករប្រមូលសំរាម បានប្រមូលស្នាមមេដៃត្រៀមដាក់លិខិតទៅរដ្ឋបាលរាជធានីភ្នំពេញ ដើម្បីសុំចរចារកដំណោះស្រាយជាថ្មីម្តងទៀត ខណៈរដ្ឋបាលរាជធានីប្រកាសជ្រើសរើសកម្មករថ្មី។
ក្រុមកម្មករជាង២ពាន់នាក់របស់ក្រុមហ៊ុនប្រមូលសំរាម ស៊ីនទ្រី បាននាំគ្នាធ្វើការតវ៉ាមិនចូលធ្វើការតាំងពីថ្ងៃទី២ ខែតុលា មកដល់បច្ចុប្បន្ន ដើម្បីទាមទារទៅថៅកែទូទាត់ប្រាក់អត្ថប្រយោជន៍៥ចំណុច រួមមាន ប្រាក់អតីតភាពការងារ ប្រាក់ជំងឺចិត្ត ប្រាក់ជួសឱ្យការជូនដំណឹងមុន ប្រាក់ដំណាច់ឆ្នាំដែលនៅសល់ និងប្រាក់ខែខុងក្រោយ ខណៈការគ្រប់គ្រងសំរាមនៅរាជធានីភ្នំពេញ កំពុងឈានទៅរកការបែងចែកឡើងវិញជាមួយក្រុមហ៊ុនថ្មីចំនួន២ទៀត។
លោក រ៉ង សារ៉ាយ អះអាងជាតំណាងកម្មករប្រមូលសំរាមក្រុមហ៊ុន ស៊ីនទ្រី ប្រាប់វីអូឌីនៅថ្ងៃអង្គារនេះថា វិវាទការងារនេះបានអូសបន្លាយរយៈពេលជិត២សប្តាហ៍មកហើយ នៅមិនទាន់មានដំណោះស្រាយនោះទេ ដែលករណីនេះ ក្រុមកម្មករកំពុងប្រមូលស្នាមមេដៃសម្រាប់ដាក់លិខិតមួយទៅរដ្ឋបាលរាជធានីភ្នំពេញ ដើម្បីសុំជួបចរចារកដំណោះស្រាយម្តងទៀត។
តំណាងកម្មកររូបនេះ បន្តថា ចំពោះការចរចារកដំណោះស្រាយកន្លងមក ខាងអាជ្ញាធរពាក់ព័ន្ធ ជាពិសេស រដ្ឋបាលរាជធានីភ្នំពេញ គ្រាន់តែសន្យា ប៉ុន្តែមិនបានធ្វើលិខិតបញ្ជាក់ពេលវេលានៃការដោះស្រាយច្បាស់លាស់ឡើយ ខណៈក្រុមកម្មករបារម្ភខ្លាចបាត់បង់អត្ថប្រយោជន៍ផ្សេងៗ បន្ទាប់ពីពួកគេត្រូវបែងចែកទៅក្រុមហ៊ុនថ្មី។
លោកបន្ថែមថា៖ «គាត់ [លោក ឃួង ស្រេង] គ្រាន់តែសន្យា អត់មានអីជាអំណះអំណាងច្បាស់លាស់ ដែលបងប្អូនយើងអាចទទួលយកបាន អីចឹងពួកគាត់នៅតែទាមទារ។ ពួកគាត់ចង់បានភាពជាក់លាក់ជាងនេះ ទឹកចិត្តបងប្អូនយើងនៅតែចង់ទាមទារអត្ថប្រយោជន៍៥ចំណុចដដែល»។
អភិបាលសាលារាជធានីភ្នំពេញ លោក ឃួង ស្រេង និងអ្នកនាំពាក្យ លោក ម៉េត មាសភក្តី បានបដិសេធអត្ថាធិប្បាយ ដោយប្រាប់ថា កំពុងជាប់រវល់ចុះជួយពលរដ្ឋដែលរងគ្រោះដោយសារទឹកជំនន់។
កាលពីថ្ងៃទី១២ ខែតុលានេះ រដ្ឋបាលរាជធានីភ្នំពេញ បានចេញសេចក្តីជូនដំណឹងមួយ ដោយលើកឡើងថា កម្មករបើកបរនិងកម្មករប្រមូលសំរាមរបស់ក្រុមហ៊ុន ស៊ីនទ្រី នៅតែបន្តធ្វើកូដកម្មខុសច្បាប់ មិនចេញប្រមូលសំរាមឡើយ លើកលែងតែកម្មករបោសសម្អាតផ្លូវតែប៉ុណ្ណោះ បានចូលធ្វើការងារវិញ កាលពីថ្ងៃទី១០ ខែតុលា។
ក្នុងសេចក្តីប្រកាសព័ត៌មានដដែល បានអំពាវនាវដល់កម្មករប្រមូលសំរាមទាំងអស់ឱ្យចូលធ្វើការងារវិញ ដើម្បីកុំឱ្យបាត់បង់អត្ថប្រយោជន៍ផ្សេងៗដែលច្បាប់បានកំណត់។
រដ្ឋបាលរាជធានីភ្នំពេញ បានឱ្យដឹងដែរថា ពាក់ព័ន្ធនឹងវិវាទការងារនេះ អាជ្ញាធរពាក់ព័ន្ធបានចុះសម្របសម្រួលដោះស្រាយជាច្រើនលើកច្រើនសារហើយ រហូតមានកិច្ចព្រមព្រៀងកាលពីថ្ងៃទី៧ ខែតុលា ប៉ុន្តែចុងក្រោយ ក្រុមកម្មករនៅតែមិនគោរពកិច្ចព្រមព្រៀងនោះ ហើយបន្តធ្វើកូដកម្មទាមទារអត្ថប្រយោជន៍ខុសច្បាប់ ដែលសាលារាជធានីភ្នំពេញមិនអាចដោះស្រាយជូនបានឡើយ។
ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជា លោក ទូច កុសល មានប្រសាសន៍ថា ក្រោយជួបចរចាជាមួយតំណាងរដ្ឋបាលរាជធានីភ្នំពេញ និងមន្ត្រីក្រសួងការងារ កាលពីថ្ងៃទី៧ ខែតុលារួចមក លោកក៏ចង់ឱ្យកម្មករចូលធ្វើការងារវិញដែរ ប៉ុន្តែកម្មករមិនព្រម។
ថ្នាក់ដឹកនាំសហជីពរូបនេះ ហាក់មិនមានជំនឿថា រដ្ឋបាលរាជធានីភ្នំពេញនឹងជួបចរចាម្តងទៀត ក្រៅពីជំរុញឱ្យកម្មករចូលធ្វើការងារធម្មតាវិញ ព្រោះក្នុងកិច្ចប្រជុំកាលពីសប្តាហ៍មុន រដ្ឋបាលរាជធានីភ្នំពេញបានបញ្ជាក់យ៉ាងច្បាស់ហើយថា ពេលដែលបែងចែកកម្មករទៅក្រុមហ៊ុនថ្មី នឹងមានការទូរទាត់អត្ថប្រយោជន៍ផ្សេងៗជូនកម្មករ។
លោកបន្ថែមថា៖ «កាលពីជួបប្រជុំកាលពីថ្ងៃទី៧ [ខែតុលា] ហ្នឹង លោក ឃួង ស្រេង បានបញ្ជាក់ច្បាស់ហើយថា ពេលដែលបញ្ចប់ទៅ អ្នកដែលទទួលខុសត្រូវទូរទាត់សំណងឱ្យបងប្អូនកម្មករ គឺម្ចាស់ក្រុមហ៊ុន ស៊ីនទ្រី ហើយសាលាក្រុងជាអ្នកដឹងឮថា ពេលដែលបញ្ចប់ទៅ ក្រុមហ៊ុន ស៊ីនទ្រី ត្រូវតែទូរទាត់ជូនបងប្អូនកម្មករ»។
ពាក់ព័ន្ធការតវ៉ា កម្មករប្រមូលសំរាមរបស់ក្រុមហ៊ុន ស៊ីនទ្រី នេះ កាលពីថ្ងៃទី៨ ខែតុលា ក្រសួងការងារ និងបណ្ដុះបណ្ដាលវិជ្ជាជីវៈ បានចេញលិខិតមួយព្រមានទៅលោក ទូច កុសល ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជា ដោយចោទថា បានដឹកនាំកម្មករប្រមូលសំរាមធ្វើកូដកម្មខុសច្បាប់ ប៉ុន្តែត្រូវបានលោក ទូច កុសល ច្រានចោលការចោទប្រកាន់នេះ៕