ក្រសួងធនធានទឹក និងឧតុនិយម បន្តអំពាវនាវដល់ប្រជាពលរដ្ឋឱ្យប្រុងប្រយ័ត្នចំពោះជំនន់ទឹកភ្លៀងចាប់ពីថ្ងៃទី១៨ ដល់ថ្ងៃទី២០ ខែតុលាខាងមុខនេះ។
សេចក្ដីជូនដំណឹងចេញផ្សាយនៅថ្ងៃទី១៣ ខែតុលានេះ ក្រសួងធនធានទឹក និងឧតុនិយម ឱ្យដឹងថា ព្យុះទី១៦ ឈ្មោះ ណាងកា (Nangka) និងព្យុះទី១៧ ឈ្មោះ សូដែល (Saudel) ដែលមានកម្លាំងខ្លាំង នឹងមានឥទ្ធិពលលើផ្នែកខ្លះនៃប្រទេសវៀតណាម រួចបន្ថយឥទ្ធិពលជាបន្តបន្ទាប់ ដោយបន្តឆ្លងកាត់ចូលប្រទេសកម្ពុជាតាមខេត្តរតនគិរី ចាប់ពីថ្ងៃទី១៨-១៩ ខែតុលា ក្នុងកម្លាំងជាវិសម្ពាធនិងសម្ពាធទាប។
ក្រសួងបន្តថា ប្រព័ន្ធសម្ពាធទាបនេះនឹងបន្តលាតសន្ធឹងលើប្រទេសកម្ពុជា ដែលនាំឱ្យមានភ្លៀងធ្លាក់លាយឡំខ្យល់បក់ខ្លាំងនិងរលកសមុទ្រខ្ពស់ៗ ចាប់ពីថ្ងៃទី១៦-២០ ខែតុលា ឆ្នាំ២០២០។
ករណីនេះ ក្រសួងធនធានទឹក បានអំពាវនាវដល់ប្រជាពលរដ្ឋដែលរស់នៅទីទំនាប ក្បែរផ្លូវទឹក ជាប់តំបន់ភ្នំ និងជួរភ្នំ ត្រូវមានការប្រុងប្រយ័ត្នចំពោះជំនន់ទឹកភ្លៀង បាតុភូតផ្គរ រន្ទះ ខ្យល់កន្ត្រាក់ ចាប់ពីថ្ងៃទី១៨ ដល់ថ្ងៃទី២០ ខែតុលា ឆ្នាំ២០២០។
បើតាមគណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងកាលពីថ្ងៃម្សិលមិញថា ចាប់តាំងពីថ្ងៃទី១ ដល់ថ្ងៃទី១២ ខែតុលានេះ ជំនន់ទឹកភ្លៀងបានបង្កផលប៉ះពាល់ដល់រាជធានី-ខេត្តចំនួន១៦ និងបានសម្លាប់មនុស្ស១០នាក់ ខណៈប្រជាពលរដ្ឋជាង១ម៉ឺននាក់ ត្រូវបានជម្លៀសទៅកាន់ទីទួលសុវត្ថិភាព៕
