មនុស្សចំនួន២៣នាក់បានបាត់បង់ជីវិតនិងរាប់សិបនាក់ទៀតបានបាត់ខ្លួន បន្ទាប់ពីទឹកជំនន់បានជន់លិចផ្ទះជាច្រើន និងទូកនេសាទមួយចំនួនត្រូវបានវាយពន្លិចដោយរលកធំៗនៅភាគកណ្តាលប្រទេសវៀតណាម។
រូបភាពដែលបង្ហោះក្នុងប្រព័ន្ធផ្សព្វផ្សាយរដ្ឋ បានបង្ហាញពីទិដ្ឋភាពភូមិទាំងមូលនៃខេត្តក្វាងទ្រី និងក្វាងណាម ត្រូវបានលិចលង់ដោយទឹកជំនន់ ខណៈទីក្រុងហ៊ូ និងតំបន់ទេសចរណ៍ផ្សេងទៀត ក៏ត្រូវបានរងឥទ្ធិពលទឹកជំនន់ដូចគ្នា។
អាជ្ញាធរគ្រប់គ្រងគ្រោះមហន្តរាយវៀតណាម បាននិយាយថា ផ្ទះជាងមួយសែនខ្នងត្រូវបានជន់លិចដោយទឹកជំនន់ ស្របពេលដែលមនុស្សជិត៤៦ ០០០នាក់ត្រូវបានជម្លៀសចេញ។
តាមប្រភពសារព័ត៌មាន Channel News Asia បានបង្ហាញថា យោធាវៀតណាមបានប្រើប្រាស់ឧទ្ធម្ភាគចក្រក្នុងការស្វែងរកអ្នកនេសាទចំនួន៦នាក់ដែលត្រូវបានទឹកសមុទ្រកួចយកទៅ នៅខេត្ត Quang Tri ។
ប្រភពដដែលបានបន្ថែមថា ក្នុងចំណោមអ្នកនេសាទទាំង៦នាក់នោះ ត្រូវបានរកឃើញថា មានអ្នកនេសាទ៣នាក់ត្រូវបានស្លាប់និង៣នាក់ទៀតកំពុងបាត់ខ្លួន។
ប្រទេសវៀតណាមកំពុងតែត្រៀមលក្ខណៈការពារភ្លៀងធ្លាក់ខ្លាំងម្តងទៀត ដែលបង្កពីព្យុះមួយ ដែលមានប្រភពពីសមុទ្រចិនខាងត្បូង។
ទីភ្នាក់ងារអាកាសធាតុជាតិវៀតណាម បាននិយាយកាលពីថ្ងៃចន្ទថា ព្យុះណានកា នឹងបង្កឱ្យមានភ្លៀងធ្លាក់ខ្លាំងរហូតដល់៤០០មីលីម៉ែត្រ នៅតំបន់ខ្លះនៃភាគខាងជើងនិងភាគកណ្តាលប្រទេសវៀតណាមចាប់ពីថ្ងៃពុធដល់ថ្ងៃសុក្រ។
តំបន់ឆ្នេរផ្នែកកណ្តាលរបស់វៀតណាម ជាតំបន់ងាយរងគ្រោះបំផុត ក្នុងអំឡុងខែមិថុនានិងវិច្ឆិកា ស្របពេលដែលប្រទេសវៀតណាម តែងតែទទួលរងអាកាសធាតុដ៏អាក្រក់នេះជាញឹកញាប់ ក៏ព្រោះតែប្រទេសនេះមានឆ្នេរសមុទ្រវែង។ គ្រោះមហន្តរាយធម្មជាតិភាគច្រើនជាទឹកជំនន់និងការបាក់ដី ដែលបង្កឡើងដោយព្យុះ បានសម្លាប់មនុស្ស១៣២នាក់ និងរងរបួស២០៧នាក់ផ្សេងទៀតនៅក្នុងប្រទេសនេះកាលពីឆ្នាំមុន៕
