មន្ទីរសាធារណការ និងដឹកជញ្ជូនខេត្តកណ្តាល បានជូនដំណឹងពីការបិទចរាចរណ៍រថយន្តដឹកទំនិញធុនធំគ្រប់ប្រភេទ នៅលើកំណា់តផ្លូវជាតិធំតូចក្នុងភូមិសាស្ត្រខេត្តកណ្តាលចំនួន៩ខ្សែ ជាបណ្ដោះអាសន្ន ក្រោយពីរងផលប៉ះពាល់ដោយទឹកជំនន់។
សេចក្តីជូនដំណឹងរបស់មន្ទីរសាធារណការខេត្ត កាលពីថ្ងៃម្សិលមិញ បានឱ្យដឹងថា ផ្លូវជាតិតូចធំ ដែលបានបិទចរាចរណ៍រថយន្តធុនធ្ងន់ជាបណ្តោះអាសន្ននោះ រួមមាន ផ្លូវជាតិលេខ ២, ៣, ៤, ៥, ២០, ២០អា, ២១, ២១អា និងផ្លូវជាតិលេខ ២១បេ។
មន្ទីរសាធារណការ បន្តថា ការប្រកាសបិទចរាចរណ៍លើផ្លូវទាំងនេះ គឺដោយសារស្ថានភាពជំនន់ទឹកភ្លៀងបាននិងកំពុងជន់ឡើងយ៉ាងខ្លាំង ដែលបានបណ្ដាលឱ្យទឹកលិចកំណាត់ផ្លូវមួយចំនួននៅក្នុងខេត្ត ហើយស្ថានភាពបែបនេះធ្វើឱ្យផ្លូវនិងស្ពានមិនអាចទ្រាំទ្រនឹងទម្ងន់រថយន្តដឹកទំនិញធុនធ្ងន់បាននោះទេ។
កាលពីយប់ថ្ងៃពុធម្សិលមិញ អភិបាលរាជធានីភ្នំពេញ លោក ឃួង ស្រេង ក៏បានបញ្ជាឱ្យក្រុមការងារបិទចរាចរណ៍យានយន្តគ្រប់ប្រភេទនៅលើកំណាត់ផ្លូវលេខ ២១៧ ក្បែររង្វង់មូលកួរស្រូវ ស្ថិតក្នុងខណ្ឌដង្កោ ជាបណ្តោះអាសន្នផងដែរ ដោយសារស្ថានភាពជំនន់ទឹកភ្លៀងទឹកស្ទឹងព្រែកត្នោត បានហូរកាត់ផ្លូវនេះខ្លាំង។
រដ្ឋបាលរាជធានីភ្នំពេញ បានស្នើពលរដ្ឋដែលឆ្លងកាត់ផ្លូវនេះ មេត្តាពង្វាងចរាចរណ៍ទៅកាន់ផ្លូវផ្សេង។
រដ្ឋមន្ត្រីក្រសួងសាធារណការ និងដឹកជញ្ជូន លោកទេសរដ្ឋមន្ត្រី ស៊ុន ចាន់ថុល មានប្រសាសន៍ពេលចុះត្រួតពិនិត្យស្ថានភាពទឹកជំនន់នៅក្នុងខណ្ឌដង្កោ រាជធានីភ្នំពេញ នៅថ្ងៃនេះថា ជំនន់ទឹកភ្លៀង បានបង្កផលប៉ះពាល់ដល់ផ្លូវចំនួន៨៧ខ្សែ ដែលមានប្រវែង២៤៣គីឡូម៉ែត្រ ស្មើនឹង១៩៩កំណាត់ នៅក្នុងខេត្តចំនួន១៣។
លោកបន្តថា ផ្លូវដែលរងផលប៉ះពាល់ក្នុងខេត្តទាំង១៣នោះ រួមមាន ខេត្តបន្ទាយមានជ័យ បាត់ដំបង ពោធិ៍សាត់ ត្បូងឃ្មុំ កំពង់ឆ្នាំង កំពង់ធំ កែប កំពង់ស្ពឺ ប៉ៃលិន កណ្ដាល ព្រៃវែង ឧត្តរមានជ័យ និងខេត្តសៀមរាប។
បើតាមលោករដ្ឋមន្ត្រី មកដល់ពេលនេះ ក្រុមការងារក្រសួងកំពុងបន្តចុះតាមដាននិងវាយតម្លៃស្ថានភាពផ្លូវដែលរងការខូចខាត ដើម្បីត្រៀមជួសជុលឡើងវិញក្រោយពេលជំនន់ទឹកភ្លៀងស្រកចុះវិញ៕
