របាយការណ៍របស់អាជ្ញាធរបានឱ្យដឹងថា មនុស្សដល់ទៅ១៧នាក់ហើយបានស្លាប់ពាក់ព័ន្ធនឹងទឹកជំនន់នៅក្នុងខេត្តបន្ទាយមានជ័យ បន្ទាប់ពីខេត្តនេះបានរងទឹកជំនន់ល្វឹងល្វើយ ក្រោយការបាក់ទំនប់ទឹកមួយនៅក្នុងប្រទេសថៃ។
រដ្ឋបាលខេត្តបន្ទាយមានជ័យ បានប្រកាសនៅលើទំព័រហ្វេសប៊ុករបស់ខ្លួននៅព្រឹកថ្ងៃនេះថា ទំនប់ទឹកខៃដនដែលស្ថិតនៅក្រុងប៉ោយប៉ែត បានបាក់ប្រវែង១៥ម៉ែត្រ ហើយធ្លាយទឹកហូរកាត់ផ្លូវជាតិលេខ៥។
ក្នុងរបាយការណ៍របស់ខ្លួន រដ្ឋបាលខេត្តបន្ទាយមានជ័យប្រកាសថា ទឹកជំនន់នៅខេត្តមួយនេះ បានជន់លិចស្រុក-ក្រុងទាំង៩របស់ខេត្តនេះ ហើយប៉ះពាល់ប្រជាពលរដ្ឋជិត២ម៉ឺន៧ពាន់គ្រួសារ។
អាជ្ញាធរខេត្តនេះ អះអាងថា ប្រជាពលរដ្ឋដល់ទៅចំនួន៤ ២២២គ្រួសារ ឬស្មើនឹងជាង១ម៉ឺន៦ពាន់នាក់ ត្រូវបានជម្លៀសទៅកាន់ទីទួលសុវត្ថិភាព។
រដ្ឋបាលខេត្តនេះក៏បានឱ្យដឹងផងដែរថា មនុស្ស១៧នាក់បានស្លាប់ពាក់ព័ន្ធនឹងទឹកជំនន់ចាប់តាំងពីដើមខែតុលានេះ។
បើតាមរបាយការណ៍ដដែល ទឹកជនន់ដែលហូរធ្លាក់មកពីប្រទេសថៃចាប់តាំងពីថ្ងៃទី១៧ ខែតុលានោះ បានជន់លិចស្រូវស្រែទំហំជាង៦ម៉ឺន២ពាន់ហិកតា ដំឡូងមីជិត១ម៉ឺនហិកតា និងដំណាំរួមផ្សំផ្សេងទៀតដល់ទៅ៥៤៣ហិកតា៕
