ក្រសួងធនធានទឹក និងឧតុនិយម បានប្រកាសថា ទឹកទន្លេមេគង្គនឹងហក់ឡើងកាន់តែខ្ពស់ថែមទៀតនៅក្នុងរយៈពេលប៉ុន្មានថ្ងៃខាងមុខនេះ ក្រោយពីអាងទន្លេមេគង្គលើទទួលរងទឹកភ្លៀងធ្លាក់ច្រើន។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងប្រកាសថា ប្រទេសឡាវនិងបណ្ដាខេត្តនៅតំបន់ភាគឦសានប្រទេសកម្ពុជា កំពុងទទួលរងភ្លៀងធ្លាក់យ៉ាងច្រើនដោយសារតែប្រព័ន្ធសម្ពាធទាប។
ក្រសួងធនធានទឹក និងឧតុនិយម ប្រកាសថា កម្រិតទឹកទន្លេមេគង្គនៅខេត្តស្ទឹងត្រែង នឹងហក់ឡើងដល់កម្ពស់៩ម៉ែត្រកន្លះនៅថ្ងៃសៅរ៍ខាងមុខនេះ ហើយកម្រិតទឹកទន្លេមេគង្គនៅខេត្តក្រចេះ នឹងហក់ឡើងដល់កម្ពស់២០ម៉ែត្រនៅថ្ងៃអាទិត្យចុងសប្ដាហ៍នេះ។
បើតាមការព្យាកររបស់ក្រសួង កម្រិតទឹកទន្លេមេគង្គនៅខេត្តកំពង់ចាម នឹងហក់ឡើងដល់កម្ពស់១៤,១០ម៉ែត្រនៅថ្ងៃចន្ទសប្ដាហ៍ក្រោយ។
ប៉ុន្តែក្រសួងអះអាងថា កម្ពស់ទឹកទន្លេមេគង្គផ្នែកខាងលើនៅមានកម្រិតទាបជាងកម្រិតប្រកាសអាសន្ននៅឡើយទេ។
ទោះជាយ៉ាងណា ក្រសួងបានណែនាំទៅប្រជាពលរដ្ឋនិងអាជ្ញាធរដែនដីនៅតាមដងទន្លេមេគង្គផ្នែកខាងលើ ឱ្យបង្កើនការប្រុងប្រយ័ត្នខ្ពស់ ដើម្បីបញ្ចៀសគ្រោះថ្នាក់ផ្សេងៗ៕