រដ្ឋាភិបាលបានសម្រេចលុបចោលនិងព្យួរអាជ្ញាប័ណ្ណប្រតិបត្តិករទូរគមនាគមន៍១៧ក្រុមហ៊ុន ដោយថា ក្រុមហ៊ុនទាំងនេះមិនដំណើរការអាជីវកម្មរបស់ពួកគេ។
សេចក្ដីសម្រេចបែបនេះរបស់រដ្ឋាភិបាល ត្រូវបានប្រកាសឱ្យដឹងនៅក្នុងសេចក្ដីប្រកាសព័ត៌មានមួយរបស់ក្រសួងប្រៃសណីយ៍ និងទូរគមនាគមន៍ ចុះថ្ងៃទី២០ ខែតុលា ម្សិលមិញនេះ។
ក្នុងសេចក្ដីប្រកាសព័ត៌មានដដែលនោះ ក្រសួងប្រៃសណីយ៍ និងទូរគមនាគមន៍ បាននិយាយថា ប្រតិបត្តិករទូរគមនាគមន៍មួយចំនួនបានគេចវេះមិនបង់ចំណូលដល់រដ្ឋ ខណៈក្រុមហ៊ុនខ្លះមិនដំណើរការអាជីវកម្មរបស់ខ្លួនឡើយ និងគ្មានសូម្បីបុគ្គលិកបម្រើ។
ជាងនេះទៀត ក្រសួងនិយាយថា ក្រុមហ៊ុនខ្លះទៀតថែមទាំងបានលាក់បាំងប្រាក់ចំណូលរបស់ខ្លួនពីមន្ត្រីអធិការកិច្ចរបស់ក្រសួងដែលចុះទៅត្រួតពិនិត្យប្រតិបត្តិការរបស់ក្រុមហ៊ុន។
ក្នុងសេចក្ដីប្រកាសព័ត៌មានដដែលនេះ ក្រសួងបានអះអាងថា ខ្លួនបានណែនាំទៅក្រុមហ៊ុនទាំងនោះឱ្យទូទាត់បំណុលដែលជំពាក់រដ្ឋ បំណុលជំពាក់ឯកជន បំណុលពន្ធដារ និងការទទួលខុសត្រូវលើអត្ថប្រយោជន៍របស់បុគ្គលិក ក្រោយពីប្រតិបត្តិករទាំងនេះត្រូវបានលុបចោលអាជ្ញាប័ណ្ណ។
តាមបញ្ជីឈ្មោះដែលបញ្ចេញដោយក្រសួង អាជ្ញាប័ណ្ណរបស់ប្រតិបត្តិករទូរគមនាគមន៍ចំនួន១៦ ដែលសុទ្ធតែជាក្រុមហ៊ុនផ្គត់ផ្គង់សេវាអ៊ីនធឺណិត ត្រូវបានលុបចោល ខណៈអាជ្ញាប័ណ្ណរបស់ក្រុមហ៊ុន១ទៀតត្រូវបានព្យួរ។
កញ្ញា ទន សុគន្ធា នាយិកាខុទ្ទកាល័យលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានប្រាប់វីអូឌីនៅថ្ងៃនេះថា ក្រសួងបានសម្រេចចាត់វិធានការបែបនេះ បន្ទាប់ពីក្រុមហ៊ុនទាំងនេះខកខានមិនបានទូទាត់បំណុលជូនរដ្ឋ។
មន្ត្រីរូបនេះឱ្យដឹងទៀតថា ក្រសួងកំពុងស្ថិតក្នុងដំណាក់កាលត្រួតពិនិត្យទៅលើប្រតិបត្តិករទូរគមនាគមន៍២៧ទៀត នៅក្នុងចំណោមក្រុមហ៊ុនសរុបចំនួន១២៧ ដែលកំពុងកាន់កាប់អាជ្ញាប័ណ្ណផ្គត់ផ្គង់សេវាទូរគមនាគមន៍នៅទូទាំងប្រទេស។
នៅពេលត្រូវបានសួរបន្ថែមថា តើក្រសួងនឹងចាត់វិធានការដូចម្ដេចទៀត ប្រសិនបើក្រុមហ៊ុននៅតែមិនទូទាត់បំណុលជូនរដ្ឋនោះ កញ្ញា សុគន្ធា ប្រាប់ថា អគ្គនាយកដ្ឋានពន្ធដារ នឹងអនុវត្តតាមនីតិវិធីច្បាប់តាមប្រព័ន្ធតុលាការដើម្បីដោះស្រាយបញ្ហានេះ។
វីអូឌីមិនអាចសុំការពន្យល់ពីអគ្គនាយកពន្ធដារ លោក គង់ វិបុល បានទេនៅថ្ងៃនេះ ដោយទូរសព្ទចូលមិនមានអ្នកទទួល។
ចំណែកអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន ប្រាប់ថា ទាក់ទងការដាក់ទណ្ឌកម្មព្យួរឬលុបអាជ្ញាប័ណ្ណ រួមទាំងការប្តឹងទាមទារឱ្យក្រុមហ៊ុនលក់ទ្រព្យសម្បត្តិឡាយឡុងទូទាត់ប្រាក់សងមករដ្ឋ គឺជាកាតព្វកិច្ចរបស់ក្រសួងប្រៃសណីយ៍ និងទូរគមនាគមន៍។
លោកអះអាងថា តួនាទីរបស់ក្រសួងសេដ្ឋកិច្ច និងហរិញ្ញវត្ថុ មានសិទ្ធិត្រឹមតែត្រួតពិនិត្យពីចំណូលចំណាយរបស់ក្រុមហ៊ុនដែលបង់ចូលទៅក្រសួងប្រៃសណីយ៍ និងទូរគមនាគមន៍តែប៉ុណ្ណោះ។
លោក មាស សុខសេនសាន ប្រាប់ថា៖ «យើងគ្រាន់តែគ្រប់គ្រងចំណូលចំណាយ។ បើពិនិត្យឃើញនីតិវិធីខុស យើងបញ្ជូនទៅក្រសួងសាម៉ីប្រតិបត្តិការបន្ត បើសិនជាពាក់ព័ន្ធមិនប្រក្រតី»។
ក្រុមហ៊ុនផ្គត់ផ្គង់សេវាអ៊ីនធឺណិត ATA Telecom គឺជាប្រតិបត្តិករមួយស្ថិតក្នុងចំណោមក្រុមហ៊ុន១៦ផ្សេងទៀត ដែលត្រូវរដ្ឋលុបចោលឬព្យួរអាជ្ញាប័ណ្ណ។
លោក ផាន ចិន្ដា អ្នកគ្រប់គ្រងទូទៅនៃ ATA Telecom ប្រាប់ថា ក្នុងអំឡុងកូវីដ១៩នេះ ក្រុមហ៊ុនរបស់លោកខកខានបង់ពន្ធកម្រៃអាជ្ញាប័ណ្ណប្រចាំខែ១០ភាគរយជូនរដ្ឋ ដែលមានទឹកប្រាក់សរុបប្រហែលជិត២ម៉ឺនដុល្លារអាមេរិក ដោយសារតែអតិថិជនរបស់ក្រុមហ៊ុនឈប់ប្រើប្រាស់សេវារបស់ក្រុមហ៊ុនប្រហែលជាជិត១០០នាក់។
លោក ចិន្តា បន្តថា បច្ចុប្បន្ននេះ ក្រុមហ៊ុនលោកនឹងទំនាក់ទំនងទៅក្រសួងដើម្បីសងលុយដែលជំពាក់ ហើយស្នើសុំឱ្យបើកដំណើរការប្រតិបត្តិការរបស់ខ្លួនឡើងវិញ។
លោក ផាន ចិន្ដា ប្រាប់ថា៖ «មួយរយៈមុនកូវីដ យើងបង់ទៀងទាត់ ប៉ុន្តែដោយសារតែមួយរយៈកូវីដនេះ យើងអត់បានផ្ញើរបាយការណ៍។ និយាយទៅ បំណុលនៅតែសង ប៉ុន្តែដោយសារតែមួយរយៈនេះ អត់មានលុយ ពួកខ្ញុំខានបង់ប្រហែលជាខ្ទង់ ១ម៉ឺន៩ពាន់ដុល្លារ ឬ ២ម៉ឺនដុល្លារ»៕
សេចក្ដីកែតម្រូវ៖ សូមធ្វើការកែតម្រូវកថាខណ្ឌទី៨និងទី៩ខាងលើ ទៅជា៖
មន្ត្រីរូបនេះឱ្យដឹងទៀតថា ក្រសួងបានចុះអធិការកិច្ចទៅលើប្រតិបត្តិករទូរគមនាគមន៍ចំនួន៣០ ហើយបានសម្រេចលុបនិងព្យួរអាជ្ញាប័ណ្ណក្រុមហ៊ុនចំនួន១៧នេះ បច្ចុប្បន្ន ក្រសួងកំពុងស្ថិតក្នុងដំណាក់កាលបន្តត្រួតពិនិត្យទៅលើប្រតិបត្តិករទូរគមនាគមន៍១៦ផ្សេងទៀត នៅក្នុងចំណោមក្រុមហ៊ុនសរុបចំនួន១២៧ដែលកំពុងកាន់កាប់អាជ្ញាប័ណ្ណផ្គត់ផ្គង់សេវាទូរគមនាគមន៍នៅទូទាំងប្រទេស។
នៅពេលត្រូវបានសួរបន្ថែមថា តើក្រសួងនឹងចាត់វិធានការដូចម្ដេចទៀត ប្រសិនបើក្រុមហ៊ុននៅតែមិនទូទាត់បំណុលជូនរដ្ឋនោះ កញ្ញា សុគន្ធា ប្រាប់ថា ក្រសួងនឹងអនុវត្តនីតិវិធីបន្តតាមច្បាប់ស្តីពីទូរគមនាគមន៍និងបទប្បញ្ញត្តិពាក់ព័ន្ធជាធរមាន ដើម្បីដោះស្រាយបញ្ហានេះ។
