តួលេខរបស់អាជ្ញាធរខេត្តបន្ទាយមានជ័យ បង្ហាញថា ទឹកជំនន់លិចលង់ខេត្តនេះ បានសម្លាប់មនុស្សដល់ទៅ២៣នាក់ហើយគិតត្រឹមថ្ងៃសៅរ៍កន្លងមកនេះ ខណៈពលរដ្ឋដល់ទៅជាង៤ម៉ឺនគ្រួសារ បានរងផលប៉ះពាល់ពីទឹកជំនន់ប៉ុន្មានសប្ដាហ៍ចុងក្រោយនេះ។
របាយការណ៍ផ្ដល់ឱ្យដោយរដ្ឋបាលខេត្តបន្ទាយមានជ័យ ឱ្យដឹងថា ទឹកជំនន់ដែលបង្កឡើងដោយទឹកភ្លៀងធ្លាក់និងទឹកហូរធ្លាក់ពីប្រទេសថៃនោះ បានប៉ះពាល់ប្រជាពលរដ្ឋ៤១ ៩២៧គ្រួសារ ឬស្មើនឹងមនុស្សជិត១៧ម៉ឺននាក់។
បើតាមតួលេខដដែលនេះ ប្រជាពលរដ្ឋដល់ទៅជាង៥ពាន់គ្រួសារ ឬស្មើនឹងជិត២ម៉ឺននាក់ ត្រូវបានជម្លៀសចេញទៅកាន់ទីទួលសុវត្ថិភាពដោយសារទឹកជំនន់។
រដ្ឋបាលខេត្តបន្ទាយមានជ័យបានឱ្យដឹងទៀតថា ទឹកជំនន់ក៏ប៉ះពាល់ស្រូវស្រែដល់ទៅជាង៦ម៉ឺនហិកតាផងដែរ ខណៈដំឡូងមីទំហំជាង១ម៉ឺន២ពាន់ហិកតា និងដំណាំរួមផ្សំទំហំ៦៣០ហិកតាទៀត ក៏ត្រូវរងផលប៉ះពាល់ផងដែរ។
តួលេខបង្ហាញទៀតថា ទឹកជំនន់ក៏ប៉ះពាល់ដល់សាលារៀន១៩១កន្លែង វត្តអារាម៦៩កន្លែង និងប៉ះពាល់ផ្លូវថ្នល់សរុបជាង៦៤៨គីឡូម៉ែត្រនៅទូទាំងខេត្តមួយនេះ៕
