ក្រសួងពាក់ព័ន្ធនិងអង្គការសង្គមស៊ីវិល ប្រកាសដាក់ឱ្យប្រើប្រាស់ជាផ្លូវការនូវគំរូលក្ខន្តិកៈថ្មី និងបទបញ្ជាផ្ទៃក្នុងសម្រាប់ការចុះបញ្ជីដីសមូហភាពសហគមន៍ជនជាតិដើមភាគតិចនៅកម្ពុជា ដើម្បីជំរុញដល់ការចុះបញ្ជីដីធ្លីសហគមន៍ជនជាតិដើមភាគតិច ឱ្យបានឆាប់រហ័សនិងមានប្រសិទ្ធភាព។
ការប្រកាសនេះ បានធ្វើឡើងនៅក្នុងសិក្ខាសាលាផ្សព្វផ្សាយនិងប្រកាសដាក់ឱ្យប្រើប្រាស់ជាផ្លូវការនូវគំរូលក្ខន្តិកៈនិងបទបញ្ជាផ្ទៃក្នុងសម្រាប់ការចុះបញ្ជីដីសមូហភាពសហគមន៍ជនជាតិដើមភាគតិចនៅកម្ពុជា នៅរាជធានីភ្នំពេញ នៅថ្ងៃចន្ទនេះ។
នាយកប្រតិបត្តិ វេទិកានៃអង្គការមិនមែនរដ្ឋាភិបាលស្តីពីកម្ពុជា លោក តឹក វណ្ណារ៉ា ថ្លែងថា កន្លងមក ក្រសួងអភិវឌ្ឍន៍ជនបទ ក្រសួងមហាផ្ទៃ ក្រសួងដែនដី និងអង្គការសង្គមស៊ីវិល បានទទួលសំណូមពរជាច្រើនពីសហគមន៍ជនជាតិដើមភាគតិចនិងអ្នកពាក់ព័ន្ធនានា ឱ្យធ្វើការកែសម្រួលនីតិវិធីក្នុងដំណើរការចុះបញ្ជីដីសមូហភាពសហគមន៍ជនជាតិដើមភាគតិច ធ្វើយ៉ាងណាឱ្យមានលក្ខណៈខ្លី ខ្លឹម ងាយយល់ និងងាយអនុវត្ត ដើម្បីអនុវត្តការងារឱ្យមានភាពឆាប់រហ័ស ចំណេញពេល និងមានប្រសិទ្ធភាពខ្ពស់។
លោកបន្តថា ជាការឆ្លើយតប ក្រសួងពាក់ព័ន្ធទាំង៣បានសហការជាមួយអង្គការពាក់ព័ន្ធ ធ្វើការពិភាក្សានិងកែសម្រួលលក្ខន្តិកៈនិងបទបញ្ជាផ្ទៃក្នុងសហគមន៍ជនជាតិដើមភាគតិច ដោយបង្កើតនូវទម្រង់ឯកសារថ្មីដែលងាយស្រួលអនុវត្ត ក្នុងគោលដៅពន្លឿនដល់ការចុះបញ្ជីដីសមូហភាពសម្រាប់ជនជាតិដើមភាគតិច ដើម្បីសម្រេចបានតាមការចង់បានរបស់ជនជាតិដើមភាគតិចនិងស្របតាមគោលនយោបាយរបស់រាជរដ្ឋាភិបាល។
លោកថា៖ «សូមចូលរួមអបអរសាទរជាមួយនឹងប្អូនជនជាតិដើមភាគតិចទាំងអស់ ក្រសួងមហាផ្ទៃនិងក្រសួងអភិវឌ្ឍន៍ជនបទ ដែលសម្រេចបាននូវសមិទ្ធផលថ្មីដ៏មានសារៈសំខាន់នេះ សម្រាប់ដាក់ជូនដល់បងប្អូនជនជាតិដើមភាគតិច ក៏ដូចជាអ្នកពាក់ព័ន្ធនានាក្នុងការប្រើប្រាស់ជាផ្លូវការក្នុងការចុះបញ្ជីដីសមូហភាពជនជាតិដើមភាគតិចនៅកម្ពុជា»។
ប្រធាននាយកដ្ឋានអភិវឌ្ឍន៍ជនជាតិដើមភាគតិច នៃក្រសួងអភិវឌ្ឍន៍ជនបទ លោក សុត សឿង មានប្រសាសន៍ក្នុងពិធីនោះថា គំរូលក្ខន្តិកៈនិងបទបញ្ជាផ្ទៃក្នុងថ្មីនេះ ត្រូវបានក្រសួងមហាផ្ទៃនិងក្រសួងអភិវឌ្ឍន៍ជនបទ រួមនឹងអង្គការសង្គមស៊ីវិល បានធ្វើការពិភាក្សានិងកែសម្រួលរយៈពេលជិត១ឆ្នាំមកហើយ មុននឹងមានការប្រកាសដាក់ឱ្យប្រើប្រាស់ជាផ្លូវការនៅថ្ងៃនេះ។
ជាមួយគ្នានេះដែរ លោកថា ក្រសួងនឹងបន្តជំរុញការកំណត់អត្តសញ្ញាណជនជាតិដើមភាគតិច ឱ្យបានឆាប់រហ័សផងដែរ។
លោកបន្ថែមថា៖ «យើងនឹងជំរុញឱ្យការកំណត់អត្តសញ្ញាណឱ្យបានរួចរាល់ក្នុងពេលឆាប់ៗនេះ បានន័យថា នៅសល់៣០០ភូមិទៀត គឺមិនអាចពន្យារដល់រាប់សិបឆ្នាំតទៀតទេ អ៊ីចឹងកំពុងរកយុទ្ធសាស្ត្រឬវិធីសាស្ត្រយ៉ាងណាដើម្បីជំរុញ៣០០ភូមិនេះឱ្យហើយ»។
បើតាមរបាយការណ៍របស់អង្គការសង្គមស៊ីវិល រហូតមកដល់ដំណាច់ឆ្នាំ២០១៩ សហគមន៍ជនជាតិដើមភាគតិចនៅកម្ពុជា មានចំនួន៥០១សហគមន៍ ក្នុងនោះមានសហគមន៍ប្រមាណ១៥០ ត្រូវបានទទួលស្គាល់ស្វ័យអត្តសញ្ញាណពីក្រសួងអភិវឌ្ឍន៍ជនបទ ១៥០សហគមន៍ទៀត ត្រូវបានចុះបញ្ជីជានីតិបុគ្គលនៅក្រសួងមហាផ្ទៃ និងសហគមន៍ចំនួន៣០ បានទទួលបណ្ណកម្មសិទ្ធិសមូហភាពពីក្រសួងរៀបចំដែនដី នគរូបនីយកម្ម និងសំណង់។
របាយការណ៍ដដែលបន្តថា កម្ពុជាមានជនជាតិដើមភាគតិចចំនួន២៤ក្រុមដែលកំពុងរស់នៅតាមខេត្តចំនួន១៥ រួមមាន៖ ព្នង កួយ ទំពួន ចារាយ គ្រឹង ព្រៅ កាវែត ស្ទៀង ក្រោល មិល កាចក់ ព័រ ខោញ ជង សួយ ថ្មូន លុន ស្អូច រដែ ខិ រអង ស្ពុង ល្អឺន សំរែ ប្រមាណជា ១,៣៤% នៃប្រជាជនសរុប។
ជនជាតិទាំងនោះរស់នៅក្នុងខេត្តដូចជា៖ រតនគិរី មណ្ឌលគិរី ក្រចេះ ព្រះវិហារ កំពង់ធំ ស្ទឹងត្រែង ឧត្តរមានជ័យ ត្បូងឃ្មុំ ពោធិ៍សាត់ កំពង់ស្ពឺ កោះកុង បាត់ដំបង ព្រះសីហនុ បន្ទាយមានជ័យ និងសៀមរាប៕
