គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានប្រកាសលទ្ធផលបណ្ដោះអាសន្ននៃការចុះឈ្មោះនិងពិនិត្យបញ្ជីឈ្មោះបោះឆ្នោតនៅឆ្នាំនេះ ដោយនិយាយថា ពលរដ្ឋគ្រប់អាយុបោះឆ្នោតថ្មីដល់ទៅជាង៨៩ភាគរយ បានទៅចុះឈ្មោះបោះឆ្នោត។
ក្នុងសេចក្ដីប្រកាសព័ត៌មាននៅថ្ងៃនេះ គ.ជ.ប. បាននិយាយថា អ្នកចុះឈ្មោះបោះឆ្នោតថ្មីមានចំនួន២៦៨ ៥៥៣នាក់ ឬស្មើនឹង៨៩,៤០ភាគរយនៃចំនួនពលរដ្ឋគ្រប់អាយុបោះឆ្នោតថ្មីដែលមានចំនួនសរុប៣០០ ៣៩០នាក់នៅក្នុងឆ្នាំនេះ។
ដំណើរការចុះឈ្មោះនិងពិនិត្យបញ្ជីឈ្មោះបោះឆ្នោតនៅឆ្នាំនេះ បានចាប់ផ្ដើមចាប់ពីថ្ងៃទី១ មុននឹងបិទបញ្ចប់នៅថ្ងៃទី១៩ ខែតុលានេះ។
គ.ជ.ប. បានចាត់ទុកដំណើរការនៃការចុះឈ្មោះនិងពិនិត្យបញ្ជីឈ្មោះបោះឆ្នោតនៅឆ្នាំនេះថា «លទ្ធផលល្អប្រសើរនិងគួរឱ្យកោតសរសើរ» បន្ទាប់ពីពលរដ្ឋគ្រប់អាយុបោះឆ្នោតនៅអាយុ១៨ឆ្នាំ និងអ្នកមិនទាន់បានចុះឈ្មោះបោះឆ្នោតពីមុន និងពលរដ្ឋបានទៅផ្ទៀងឈ្មោះយ៉ាងច្រើនកុះករ។
បើតាម គ.ជ.ប. ពលរដ្ឋដល់ទៅ១៥២ ០០៤នាក់ ត្រូវបានលុបឈ្មោះចេញពីបញ្ជីឈ្មោះបោះឆ្នោត ខណៈពលរដ្ឋដល់ទៅ៩២ ៩២២នាក់ បានស្នើសុំកែប្រែទិន្នន័យក្នុងបញ្ជី ហើយពលរដ្ឋដល់ទៅ៨៨ ៨៤៦នាក់ទៀត បានផ្លាស់ប្ដូរទីកន្លែងបោះឆ្នោតរបស់ខ្លួនទៅកាន់ឃុំឬសង្កាត់ថ្មី។
គ.ជ.ប. ប្រកាសទៀតថា ពលរដ្ឋដល់ទៅជាង៨ ៨៣៤ ៧៥២នាក់ ត្រូវបានចុះឈ្មោះក្នុងបញ្ជីឈ្មោះបោះឆ្នោតនៅតាមឃុំ-សង្កាត់រួចរាល់នៅទូទាំងប្រទេសក្នុងឆ្នាំនេះ ពោលគឺបានកើនឡើងពីចំនួនជាង៨លាន៦២ម៉ឺននាក់ កាលពីឆ្នាំ២០១៩កន្លងមក៕
