លោកនាយករដ្ឋមន្ត្រី ហ៊ុន សែន បានសម្រេចដាក់ឱ្យប្រើប្រាស់ជាបណ្ដោះអាសន្ននូវស្ពានអាកាសរង្វង់មូលចោមចៅចាប់ពីថ្ងៃនេះ បន្ទាប់ពីដំណើរការសាងសង់បានបញ្ចប់រួចរាល់ហើយនោះ។
លោកនាយករដ្ឋមន្ត្រីបានប្រកាសបែបនេះក្នុងពិធីបើកការដ្ឋានស្ពានតភ្ជាប់តំបន់កោះនរា ស្ថិតក្នុងខណ្ឌច្បារអំពៅ មកតំបន់កោះពេជ្រ ស្ថិតក្នុងខណ្ឌចំការមន នៅព្រឹកថ្ងៃនេះ។
លោក ហ៊ុន សែន ថ្លែងថា៖ «អ៊ីចឹង! ខ្ញុំសូមយកឱកាសនេះប្រកាសជម្រាបជូននិងប្រកាសដាក់ឱ្យប្រើប្រាស់ជាបណ្ដោះអាសន្នចាប់ពីថ្ងៃនេះតទៅ»។
ស្ពានអាកាសរង្វង់មូលចោមចៅដែលមានតម្លៃដល់ទៅ២២លានដុល្លារ ត្រូវបានចាប់ផ្ដើមដំណើរការសាងសង់កាលពីពាក់កណ្ដាលឆ្នាំ២០១៨កន្លងមក ហើយគ្រោងបញ្ចប់នៅចុងខែធ្នូ ឆ្នាំ២០២០នេះ។
គម្រោងស្ពានអាកាសមួយនេះដែលរួមបញ្ចូលទាំងផ្លូវក្រោមដីផងនោះ ត្រូវបានសាងសង់ដោយក្រុមហ៊ុនវិនិយោគអណិកជនក្រៅប្រទេស (OCIC) របស់លោកឧកញ៉ា ពុង ឃាវសែ៕