និយ័តករទូរគមនាគមន៍កម្ពុជា ដែលជាអាជ្ញាធររបស់រដ្ឋត្រួតពិនិត្យទៅលើក្រុមហ៊ុនផ្គត់ផ្គង់សេវាទូរសព្ទនិងអ៊ីនធឺណិតនៅកម្ពុជា បានក្រើនរំឭកទៅប្រតិបត្តិករផ្គត់ផ្គង់សេវាទូរគមនាគមន៍ទាំងអស់ ឱ្យបង្កើនគុណភាពសេវាទូរសព្ទចល័តរបស់ខ្លួនអំឡុងថ្ងៃឈប់សម្រាកជិតមួយសប្ដាហ៍ខាងមុខនេះ។
អាជ្ញាធរគ្រប់គ្រងលើប្រព័ន្ធទូរគមនាគមន៍កម្ពុជា បានក្រើនរំឭកបែបនេះនៅក្នុងសេចក្ដីជូនដំណឹងមួយចេញនៅថ្ងៃនេះ ដែលផ្អែកតាមភាពចាំបាច់នោះ។
និយ័តករទូរគមនាគមន៍ បានក្រើនរំឭកទៅក្រុមហ៊ុនផ្គត់ផ្គង់សេវាទូរសព្ទចល័តបែបនេះ តែ២ថ្ងៃប៉ុណ្ណោះក្រោយពីលោកនាយករដ្ឋមន្ត្រី ហ៊ុន សែន បានលើកឡើងបញ្ហាគុណភាពសេវាទូរសព្ទចល័តដែលផ្គត់ផ្គង់ដោយប្រតិបត្តិករនៅកម្ពុជា។
កម្ពុជានឹងត្រូវឈប់សម្រាករហូតដល់៥ថ្ងៃចាប់ពីថ្ងៃស្អែកនេះរហូតដល់ថ្ងៃចន្ទសប្ដាហ៍ក្រោយ ដើម្បីរំឭកខួបថ្ងៃឡើងគ្រងរាជសម្បត្តិរបស់ព្រះមហាក្សត្រ ព្រះករុណា នរោត្ដម សីហមុនី និងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក។
ពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលត្រូវរៀបចំធ្វើរយៈពេល៣ថ្ងៃចាប់ពីថ្ងៃទី៣០ ខែតុលា ដល់ថ្ងៃទី១ ខែវិច្ឆិកា ត្រូវបានរដ្ឋាភិបាលសម្រេចផ្អាកទៅវិញ ដោយសារក្ដីបារម្ភអំពីការឆ្លងរីករាលដាលនៃជំងឺកូវីដ១៩ និងស្ថានភាពទឹកទន្លេដែលនៅតែបន្តហូរពីទន្លេមេគង្គចូលទៅបឹងទន្លេសាប៕