ថ្នាក់ដឹកនាំក្រសួងអប់រំ យុវជន និងកីឡា បង្ហាញការព្រួយបារម្ភនិងជំរុញដល់អាជ្ញាធរពាក់ព័ន្ធ រួមនឹងគណៈគ្រប់គ្រងសាលាទាំងអស់ដែលបើកឡើងវិញនៅក្នុងដំណាក់កាលទី៣ នាព្រឹកថ្ងៃចន្ទនេះ ត្រូវពង្រឹងការត្រួតពិនិត្យនិងការពារការឆ្លងរាលដាលនៃជំងឺកូវីដ១៩ឱ្យមានប្រសិទ្ធភាព។
ថ្លែងប្រាប់អ្នកសារព័ត៌មានបន្ទាប់ពីចុះត្រួតពិនិត្យការបើកសាលារៀនឡើងវិញក្នុងដំណាក់កាលទី៣ នៅវិទ្យាល័យ ជាស៊ីម សន្ធរម៉ុក នៅព្រឹកនេះ រដ្ឋមន្ត្រីក្រសួងអប់រំ លោក ហង់ ជួនណារ៉ុន បានថ្លែងថា បើទោះជាមានការបើកឱ្យសិស្សចូលរៀនវិញនៅតាមសាលារៀនគ្រប់កម្រិតថ្នាក់ក្តី ប៉ុន្តែលោកនៅតែមានការព្រួយបារម្ភពីលទ្ធភាពនៃការចម្លងជំងឺកូវីដ១៩។
លោកថា៖ «យើងក៏មានការព្រួយបារម្ភផងដែរថា ការបើកដំណើរការឡើងវិញនេះ វាអាចមានហានិភ័យ»។
លោកបានបន្ថែមថា៖ «ទោះបីមាន១ករណីឬ២ករណី ហើយមិនទាន់មាននៅក្នុងសាលារៀនយើង នឹងមិនបិទទេ! ប៉ុន្ដែប្រសិនបើមានករណីកើតក្នុងសាលារៀន គឺយើងនឹងធ្វើការពិភាក្សាជាមួយក្រសួងសុខាភិបាលថា ត្រូវបិទសាលាមួយ ឬបិទមួយក្រុង ឬយ៉ាងម៉េច ដូច្នេះតាមភាពជាក់ស្ដែង។ ខ្ញុំសូមអំពាវនាវឱ្យអាជ្ញាធរ ក៏ដូចជាគណៈគ្រប់គ្រងសាលារៀនទាំងអស់ ទាំងរដ្ឋនិងឯកជន សូមបន្តអនុវត្តឱ្យបានម៉ឺងម៉ាត់នូវវិធានការដែលក្រសួងបានដាក់ចេញ ដើម្បីធានានូវសុវត្ថិភាពនិងអនាម័យ»។
ក្នុងសេចក្ដីណែនាំស្ដីពីការបើកដំណើរការគ្រឹះស្ថានសិក្សាសាធារណៈក្នុងដំណាក់កាលទី៣ ចុះថ្ងៃទី២៧ ខែតុលាកន្លងទៅ រដ្ឋមន្ត្រីអប់រំ លោក ហង់ ជួនណារ៉ុន បានអនុញ្ញាតឱ្យគ្រឹះស្ថានសិក្សាទាំងអស់ រាប់ចាប់ពីថ្នាក់មត្តេយ្យដល់ថ្នាក់វិទ្យាល័យ ចាប់អនុវត្តផ្ដល់ការអប់រំនៅក្នុងថ្នាក់ឡើងវិញ ដោយថ្នាក់មត្តេយ្យសិក្សា៥ថ្ងៃក្នុងមួយសប្ដាហ៍ ហើយកំណត់ចំនួនសិស្សមិនលើសពី២៥នាក់ក្នុងមួយថ្នាក់ ខណៈថ្នាក់បឋមសិក្សានិងវិទ្យាល័យ រៀនក្នុងថ្នាក់៣ថ្ងៃក្នុងមួយសប្ដាហ៍ ដោយកំណត់ចំនួនសិស្សមិនលើសពី៣០នាក់។
ក្រៅពីនោះ សេវាដើម្បីបម្រើដល់ការអប់រំ រួមមាន សេវារថយន្តដឹកសិស្ស បណ្ណាល័យ សកម្មភាពអប់រំកាយនិងកីឡា សកម្មភាពសិល្បៈ និងសេវាអាហារដ្ឋាន ក៏អនុញ្ញាតឱ្យបើកឡើងវិញផងដែរ តែត្រូវប្រតិបត្តិតាមគោលការណ៍ស្ដង់ដារសុវត្ថិភាព។
ក្នុងសេចក្ដីណែនាំនោះបញ្ជាក់ផងដែរថា៖ «ក្នុងករណីមានការសង្ស័យ ត្រូវរាយការណ៍និងទាក់ទងជាបន្ទាន់ជាមួយមន្ទីរពេទ្យបង្អែក មណ្ឌលសុខភាព និងអាជ្ញាធរអប់រំគ្រប់លំដាប់ថ្នាក់»។
ទាក់ទិននឹងការបើកសាលាឡើងវិញដំណាក់កាលទី៣នេះ ពលរដ្ឋដែលរស់នៅរាជធានីភ្នំពេញ លោក ចក់ ចំរើន ដែលមានកូនទើបនឹងចូលរៀនថ្នាក់មតេ្តយ្យ បានបង្ហាញអារម្មណ៍រីករាយ លាយឡំជាមួយក្ដីបារម្ភថា៖
«ទោះបីជាមានវិធានការយ៉ាងណាក៏ដោយ ក៏ខ្ញុំនៅតែមានការព្រួយបារម្ភ ព្រោះថា ជំងឺនេះវាងាយឆ្លង! ហើយក៏ចង់ឱ្យសាលាមានវិធានការតឹងរ៉ឹងនិងហ្មត់ចត់ចំពោះវិធានការដែលបានដាក់ចេញ»។
គិតត្រឹមព្រឹកថ្ងៃទី០២ ខែវិច្ឆិកា ឆ្នាំ២០២០ កម្ពុជារកឃើញអ្នកឆ្លងកូវីដ-១៩ មានសរុបចំនួន២៩២នាក់ ក្នុងនោះ ព្យាបាលជាសះស្បើយចំនួន២៨៣នាក់ ហើយនៅសល់ចំនួន០៩នាក់ទៀតកំពុងសម្រាកព្យាបាលនៅមន្ទីរពេទ្យ។
នាយកប្រចាំប្រទេសនៃអង្គការ Aide et Action លោក វន សំភាស់ អបអរសាទរចំពោះការបើកសាលាឡើងវិញនេះ ដោយលោកជំរុញដល់ភាគីពាក់ព័ន្ធទាំងអស់ រួមមាន មាតាបិតា អាណាព្យាបាល គណៈគ្រប់គ្រងសាលា និងអាជ្ញាធរមូលដ្ឋាន ចូលរួមទាំងអស់គ្នាក្នុងការការពារនិងប្រឆាំងជំងឺកូវីដ-១៩ពីសាលារៀន។
លោកមានប្រសាសន៍ថា៖ «ក្នុងនាមជាគណៈគ្រប់គ្រងសាលា ក៏ដូចជាអាជ្ញាធរមូលដ្ឋាន ត្រូវធ្វើឱ្យប្រាកដថា សុខភាពអនាម័យ ការវាស់កម្ដៅ ការលាងដៃ ការបាញ់ថ្នាំសម្លាប់មេរោគនៅតាមថ្នាក់រៀន នៅតាមសាលារៀន ត្រូវបានអនុវត្ត។ ហើយក្នុងថ្នាក់រៀនមួយៗ ត្រូវរក្សាឱ្យបាននូវគម្លាត អនាម័យ ក៏ដូចជាចំនួនសិស្សអីជាដើម។ អ៊ីចឹងការងារទាំងអស់ហ្នឹង មិនអាចអាស្រ័យតែលើក្រសួងអប់រំតែម្យ៉ាងទេ ក្រសួងសុខាភិបាល ឪពុកម្ដាយ និងអាជ្ញាធរពាក់ព័ន្ធត្រូវរួមចំណែកក្នុងការងារនេះ»។
បន្ទាប់ពីរកឃើញជំងឺកូវីដ១៩ជាបន្តបន្ទាប់នៅដើមឆ្នាំ២០២០ រាជរដ្ឋាភិបាលកម្ពុជាបានសម្រេចនៅថ្ងៃទី១៦ ខែមីនា ឱ្យបិទសាលារៀនទាំងអស់ទូទាំងប្រទេស ដោយថា ដើម្បីទប់ស្កាត់ការឆ្លងរីករាលដាលជំងឺកូវីដ១៩។
ទិន្នន័យពីក្រសួងអប់រំ ឆ្នាំសិក្សា២០១៩ បង្ហាញថា កម្ពុជាមានគ្រឹះស្ថានអប់រំចំណេះទូទៅនិងមត្តេយ្យសាធារណៈចំនួនជាង១៣ ៣០០កន្លែង ក្នុងនោះ សាលារៀននៅតំបន់ទីប្រជុំជនមាន១ ៤២២កន្លែង និងសាលារៀននៅទីជនបទមាន១១ ៨៧៨កន្លែង ដែលមានសិស្សសិក្សាជាង ៣លាន១សែន៨ម៉ឺននាក់ (៣ ១៨៩ ១៧២នាក់) និងមានបុគ្គលិកបង្រៀនជាង៩ម៉ឺននាក់ (៩៣ ៧០៣នាក់) និងបុគ្គលិកមិនបង្រៀនជាង១ម៉ឺន៩ពាន់នាក់ (១៩ ០៦៦នាក់)៕
