គណបក្សប្រជាធិបតេយ្យមូលដ្ឋាន បង្ហាញការព្រួយបារម្ភថា ប្រទេសជាតិនឹងជួបហានិភ័យដូចពីអតីតកាល បើរដ្ឋសភារបស់បក្សកាន់អំណាចមិនពិចារណាឡើងវិញទៅលើការទទួលស្គាល់ច្បាប់នានាពាក់ព័ន្ធទៅនឹងការបោះបង្គោលព្រំដែនជាមួយវៀតណាម ទាំងមិនមានការឯកភាពផ្ទៃក្នុងជាតិនៅឡើយនោះ។
កាលពីថ្ងៃចន្ទ រដ្ឋសភាកម្ពុជាបានអនុម័តសេចក្តីព្រាងច្បាប់ស្តីពីការអនុម័តយល់ព្រមលើពិធីសារខណ្ឌសីមា និងការបោះបង្គោលព្រំដែនគោករវាងកម្ពុជានិងវៀតណាម ដោយសំឡេង១១៦ក្នុងចំណោមសមាជិក១១៦រូបដែលមានវត្តមានក្នុងសភា។
គណបក្សប្រជាធិបតេយ្យមូលដ្ឋានដែលមិនមានអាសនៈនៅក្នុងសភាសូម្បីតែមួយនោះ បានបង្ហាញការព្រួយបារម្ភតាមរយៈសេចក្តីថ្លែងការណ៍របស់ខ្លួនកាលពីថ្ងៃម្សិលមិញថា ស្ថាប័នជាតិកំពូលមួយនេះ មិនគួរយល់ព្រមលើកិច្ចព្រមព្រៀងកំណត់ខ្សែបន្ទាត់ព្រំដែនជាមួយប្រទេសជិតខាងទេ ខណៈកម្ពុជាមិនមានឯកភាពជាតិនោះ។
អ្នកនាំពាក្យគណបក្សនេះ លោក ឡឹក សុធា ប្រាប់ថា កម្ពុជាអាចនឹងជួបហានិភ័យនៃជម្លោះផ្ទៃក្នុងដូចពីអតីតកាល បើរដ្ឋសភាមិនពិចារណាឡើងវិញពីការផ្តល់សច្ចាប័នលើច្បាប់នានាពាក់ព័ន្ធទៅនឹងការកំណត់ខ្សែបន្ទាត់ព្រំដែនកម្ពុជា-វៀតណាម ដោយរង់ចាំការឯកភាពជាតិជាមុនសិន។
អ្នកនាំពាក្យរូបនេះរំឭកថា ប្រវត្តិសាស្ត្របានបង្ហាញហើយថា ក្រុមលោក លន់ នល់ ទម្លាក់សម្តេចព្រះនរោត្តម សីហនុ ហើយបន្ទាប់មកក្រុមខ្មែរក្រហមទម្លាក់ក្រុមលោក លន់ នល់ ដើមចមចេញពីការអះអាងដូចគ្នាថា ក្រុមអ្នកគ្រប់គ្រងរដ្ឋាភិបាលឃុបឃិតឬកាត់ទឹកដីឱ្យទៅវៀតណាម។
លោក ឡឹក សុធា ប្រាប់ថា៖ «ហើយម្យ៉ាង វាជាមរតកល្អនិងមិនល្អសម្រាប់គណបក្សប្រជាជនកម្ពុជា ដែលជាអ្នកដឹកនាំរឿងហ្នឹងផង ហើយប្រសិនបើការងារនេះបង្កជាគ្រោះមហន្តរាយទៅថ្ងៃអនាគត នាំឱ្យមានការបែកបាក់ជាតិស្អីនោះ គណបក្សប្រជាជនកម្ពុជានឹងទទួលខុសទាំងស្រុង»។
មួយវិញទៀត លោកថា វាជាហានិភ័យជាតិដូចគ្នា បើរដ្ឋាភិបាលបង្កើតព្រំដែនសន្តិភាពជាមួយប្រទេសជិតខាង តែមិនបានដោះស្រាយជម្លោះផ្ទៃក្នុងជាតិនោះ។
អ្នកនាំពាក្យរដ្ឋសភា លោក ឡេង ប៉េងឡុង បានច្រានចោលការទាមទារនេះ ដោយលោកថា ការកំណត់ព្រំដែនជាមួយប្រទេសជិតខាងជាការទទួលខុសត្រូវរបស់គណបក្សប្រជាជន ហើយថា សមិទ្ធផលព្រំដែនបច្ចុប្បន្ន ជាភាពគង់រង្សរបស់ជាតិ។
លោក ឡេង ប៉េងឡុង ប្រាប់ថា៖ «តាមភាពជាក់ស្តែង ព្រំដែនប៉ុណ្ណឹង គឺថា វាត្រឹមត្រូវ វាសមរម្យ ដែលយើងអាចទទួលយកបានហើយ។ យើងថា នេះជាសមិទ្ធផលមួយដែលពលរដ្ឋយើងទទួលយកជាភាពសុខសាន្តនិងគង់វង្សរបស់ប្រជាជាតិទៅថ្ងៃក្រោយ»។
ប្រធានក្រុមអ្នកនាំពាក្យរដ្ឋាភិបាល លោក ផៃ ស៊ីផាន មានប្រសាសន៍ថា ការបោះបង្គោលព្រំដែនជាមួយវៀតណាម មិនមែនបង្កឱ្យមានជម្លោះផ្ទៃក្នុងទេ តែថា ជាដំណើរការប្រព្រឹត្តទៅដោយបច្ចេកទេស។ លោកចាត់ទុកការលើកឡើងនេះជាវោហារសាស្ត្រនយោបាយ ដើម្បីទាក់ទាញការចាប់អារម្មណ៍។
លោក ផៃ ស៊ីផាន ប្រាប់ថា៖ «ការបារម្ភរបស់គាត់ បារម្ភកន្លែងត្រង់ណា ហើយគាត់យកឯកសារអីមកជំនួស ដូចដែលឯកសារ [រដ្ឋាភិបាល] មានសព្វថ្ងៃ។ អាហ្នឹងគាត់និយាយហ្នឹងជាវោហារសាស្ត្រនយោបាយ ដើម្បីឱ្យគេចាប់អារម្មណ៍ខ្លួនគាត់ទេ»។
គណបក្សសង្គ្រោះជាតិដែលតុលាការបានរំលាយចោលនោះ បាននិយាយក្នុងសេចក្តីថ្លែងការណ៍របស់ខ្លួន ចុះថ្ងៃទី២ ខែវិច្ឆិកា ថាការអនុម័តនេះ «គឺជាការយល់ព្រមកាត់ទឹកដីខ្មែរទៅឱ្យប្រទេសវៀតណាមជាផ្លូវការ»។
បក្សប្រឆាំងមួយនេះបានគូសបញ្ជាក់ថា ខ្លួននឹងសើរើឡើងវិញនូវរាល់ច្បាប់និងសន្ធិសញ្ញាខុសច្បាប់ទាំងឡាយដែលធ្វើឡើងដោយបក្សកាន់អំណាចបច្ចុប្បន្ន ជាមួយនឹងប្រទេសវៀតណាម ពាក់ព័ន្ធនឹងបូរណភាពទឹកដីនិងការបោះបង្គោលព្រំដែនកម្ពុជា-វៀតណាមនាពេលកន្លងទៅ នៅពេលដែលគណបក្សខ្លួនបានដឹកនាំរដ្ឋាភិបាល។
ប្រធានក្រុមប្រឹក្សាឃ្លាំមើលកម្ពុជា និងសមាជិកក្រុមប្រឹក្សាភិបាលនៃចលនានិស្សិត លោក ម៉ែន ណាត មានប្រសាសន៍ថា ការកំណត់ខ្សែបន្ទាត់ព្រំដែនកម្ពុជា-វៀតណាម មានភាពចម្រូងចម្រាសតាំងពីការចេញដំណើរនៃការធ្វើសន្ធិសញ្ញាព្រំដែនឆ្នាំ១៩៨៥ អំឡុងវៀតណាមគ្រងគ្រង់កម្ពុជាម៉្លេះ។
លោកថា បញ្ហាវានឹងបន្សល់ទុកជាជម្លោះប្រវត្តិសាស្ត្រដល់ក្មេងជំនាន់ក្រោយ បើរដ្ឋាភិបាលមិនងាកមករកការឯកភាពជាតិ ដើម្បីប្រឆាំងនឹងមហិច្ឆតាឈ្លានពានប្រទេសជាតិខាងនោះ។
លោក ម៉ែន ណាត ប្រាប់ថា៖ «រឿងព្រំដែននេះ វាអត់អាចបញ្ចប់បានទេ ពីព្រោះវាអត់មានការឯកភាពជាតិ នៅក្នុងការមូលមតិគ្នាក្នុងការការពារបូរណភាពទឹកដីខ្លួនឯង។ បន្ទាប់ពីមេដឹកនាំបច្ចុប្បន្នហ្នឹងទៅ វាត្រូវតែសើរើ ពីព្រោះបើយើងគិតពីប្រវត្តិសាស្ត្រ ជ័យជេដ្ឋាទី២អី អត់ទាន់មានច្បាប់អីរឹងមាំទេ ប៉ុន្តែសម័យបច្ចុប្បន្ននេះ វាជាសម័យដែលមានច្បាប់អន្តរជាតិរឹងមាំហើយ»។
កម្ពុជាមានព្រំប្រទល់ដីគោកជាប់ប្រទេសវៀតណាមប្រវែង១ ២៧០គីឡូម៉ែត្រ ដែលបច្ចុប្បន្នភាគីទាំងពីរបានឯកភាពគ្នាបោះបាន៨៤ភាគរយហើយ។
រដ្ឋាភិបាលធ្លាប់អះអាងថា ការបោះបង្គោលព្រំដែននេះ កម្ពុជានឹងចំណេញដីជិត២ពាន់ហិកតា បើធៀបនឹងផ្ទៃដីកម្ពុជាទំហំ១៨១ ០៣៥គីឡូម៉ែត្រការ៉េ។
ប៉ុន្តែក្រុមអ្នកនយោបាយមកពីគណបក្សប្រឆាំង ធ្លាប់អះអាងថា ការបោះបង្គោលព្រំដែនក្រោមការដឹកនាំរបស់លោកនាយករដ្ឋមន្ត្រី ហ៊ុន សែន កម្ពុជាបានបាត់បង់ទឹកដីមួយផ្នែកទៅប្រទេសវៀតណាម។
ទោះជាយ៉ាងណា អ្នកដែលធ្លាប់រិះគន់ ដូចជា អតីតតំណាងរាស្ត្របក្សប្រឆាំង លោក ហុង សុខហួរ និងលោក អ៊ុំ សំអាន ជាដើម ត្រូវរដ្ឋាភិបាលប្តឹងរហូតជាប់ពន្ធនាគារ ជាប់ចោទពីបទញុះញង់បង្កឱ្យមានចលាចលសង្គម៕
