មន្ត្រីជាន់ខ្ពស់ក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃនេះ ស្នើដល់អាជ្ញាធរមូលដ្ឋានពាក់ព័ន្ធ ពង្រឹងយន្តការសម្របសម្រួលទប់ស្កាត់ការរើសអើងនិងការប្រមាថលើជនមានពិការភាព។
ការស្នើនេះ បានធ្វើឡើងនៅក្នុងសិក្ខាសាលាផ្សព្វផ្សាយផែនការយុទ្ធសាស្ត្រជាតិ ស្តីពី ពិការភាពឆ្នាំ២០១៩-២០២៣ និងផ្សព្វផ្សាយលិខិតបទដ្ឋានបច្ចេកទេស ហេដ្ឋារចនាសម្ព័ន្ធរូបវន្ត បង្កលក្ខណៈងាយស្រួលសម្រាប់ជនមានពិការភាព នៅខេត្តបាត់ដំបង នៅថ្ងៃទី៥ ខែវិច្ឆិកា ឆ្នាំ២០២០នេះ។
រដ្ឋលេខាធិការក្រសួងសង្គមកិច្ច លោក ឯម ច័ន្ទមករា បានលើកឡើងក្នុងទំព័រហ្វេសប៊ុករបស់លោកថា រាជរដ្ឋាភិបាលកម្ពុជា មានចក្ខុវិស័យច្បាស់លាស់ធ្វើយ៉ាងណាឱ្យជនមានពិការភាពនិងក្រុមគ្រួសារមានគុណភាពជីវិតល្អ និងចូលរួមយ៉ាងសកម្មពេញលេញស្មើភាពគ្នាក្នុងសង្គមដែលមានការគោរពសិទិ្ធនិងសេចក្តីថ្លៃថ្នូរ ព្រមទាំងមានការធ្វើបរិយាបន្នពិការភាពក្នុងគ្រប់វិស័យនិងការអភិវឌ្ឍ។
លោកបន្តថា៖ «យើងមានបេសកកម្មរួមគ្នាមួយ គឺជំរុញការចូលរួមពីក្រសួងស្ថាប័ន ដៃគូអភិវឌ្ឍន៍ វិស័យឯកជន អង្គការសង្គមស៊ីវិល អង្គការជនមានពិការភាព អង្គការមិនមែនរដ្ឋាភិបាលនានា រួមទាំងជនមានពិការភាព ដើម្បីធ្វើបរិយាបន្នពិការភាពទៅក្នុងការអនុវត្តផែនការសកម្មភាពរបស់ខ្លួនឈានទៅសម្រេចបាននូវគុណភាពជីវិតរបស់ជនមានពិការភាពប្រកបដោយចីរភាព»។
ករណីនេះ លោក ឯម ច័ន្ទមករា បានស្នើដល់អាជ្ញាធរពាក់ព័ន្ធផ្តល់អាទិភាពដល់ជនមានពិការភាព និងកំណត់អត្តសញ្ញាណ ផែនទីស្នាក់នៅរបស់ជនមានពិការភាព ដើម្បីធានាថា រាល់ព័ត៌មានអំពីគ្រោះហានិភ័យត្រូវបានដឹងមុននិងត្រូវបានសង្គ្រោះប្រកបដោយសុវត្ថិភាព។ លោកក៏បានស្នើដល់អាជ្ញាធរមូលដ្ឋានពាក់ព័ន្ធ ពង្រឹងយន្តការសម្របសម្រួលទប់ស្កាត់ការរើសអើងនិងការប្រមាថលើជនមានពិការភាពផងដែរ។
កាលពីថ្ងៃទី២១ ខែតុលា ឆ្នាំ២០២០ លោកនាយករដ្ឋមន្ត្រី ហ៊ុន សែន ធ្លាប់បានប្រកាសពីបំណងចង់បង្កើត «សមាគមការពារសេចក្តីថ្លៃថ្នូរជនពិការ» ដើម្បីការពារជនពិការពីការប្រមាថនានា ដែលធ្វើឱ្យប៉ះទង្គិចអារម្មណ៍និងសេចក្តីថ្លៃថ្នូររបស់ពួកគាត់។
លោកនាយករដ្ឋមន្ត្រី ហ៊ុន សែន បានបន្តថា កន្លងមក មានការប្រមាថមួយចំនួនទៅលើជនពិការ រួមទាំងរូបលោកផងដែរ ដែលករណីនេះ លោកមិនអាចអត់ឱនឱ្យបានទេ។ លោកបានអំពាវនាវឱ្យមានការយោគយល់និងយកចិត្តទុកដាក់បន្ថែមលើជនពិការ និងចៀសវាងការប្រមាថទៅលើជនពិការ។
លោកមានប្រសាសន៍ថា៖ «ខ្ញុំសូមអំពាវនាវ សូមមេត្តាយោគយល់ចំពោះជនពិការ បើទោះបីមិនបានផ្តល់អ្វីឱ្យជនពិការទេ សូមមេត្តាកុំប្រមាថជនពិការ ដូចជាការហៅគ្នា អាកំបាក់ អាកំប៉ុត»៕
