គិតមកដល់ត្រឹមម៉ោង១០ព្រឹកថ្ងៃព្រហស្បតិ៍នេះ លទ្ធផលនៃការបោះឆ្នោតប្រធានាធិបតីអាមេរិក នៅមិនទាន់ដាច់ស្រេចនៅឡើយទេថា នរណាជាអ្នកឈ្នះសម្រាប់ឈានទៅកាន់តំណែងដឹកនាំសេតវិមាននាពេលខាងមុខនេះ។
ប៉ុន្តែលទ្ធផលបណ្ដោះអាសន្នបានបង្ហាញឱ្យឃើញថា បេក្ខជនមកពីបក្សប្រជាធិបតេយ្យ លោក ចូ បៃដិន កំពុងតែស្ថិតលើផ្លូវកាន់តែកៀកទៅនឹងជ័យជម្នះហើយ ក្រោយពីទទួលបានសន្លឹកឆ្នោតគាំទ្រឡើងដល់២៦៤សំឡេងហើយនោះ ខណៈគូប្រជែងរបស់លោក គឺប្រធានាធិបតីអាមេរិកបច្ចុប្បន្ន លោក ដូណាល់ ត្រាំ ទើបតែទទួលបានសន្លឹកឆ្នោតគាំទ្រតែ២១៤សំឡេងប៉ុណ្ណោះ។
នៅសហរដ្ឋអាមេរិក បេក្ខជនម្នាក់ត្រូវទទួលបានសន្លឹកឆ្នោតគាំទ្រយ៉ាងតិច២៧០សំឡេង នៅក្នុងចំណោមសន្លឹកឆ្នោតសរុប៥៣៨សំឡេង ដែលបោះដោយប្រតិភូជាតំណាងឱ្យពលរដ្ឋនៅតាមបណ្ដារដ្ឋនានានៅទូទាំងប្រទេស។
តាមរយៈលទ្ធផលបណ្ដោះអាសន្ននេះ លោក បៃដិន ខ្វះតែសន្លឹកឆ្នោតគាំទ្រត្រឹមតែ៦ទៀតប៉ុណ្ណោះ ដើម្បីប្រកាសថា លោកនឹងឈ្នះការបោះឆ្នោតនៅឆ្នាំនេះ ហើយធ្វើដំណើរទៅកាន់សេតវិមាន។
ទីភ្នាក់ងារព័ត៌មាន AP បានរាយការណ៍ថា នេះជាលើកដំបូងនៅក្នុងប្រវត្តិសាស្ត្រអាមេរិកហើយ ដែលលទ្ធផលចាញ់ឈ្នះនៃការបោះឆ្នោតនេះនៅតែមិនទាន់ដឹងនៅឡើយ ក្រោយការបោះឆ្នោតកន្លងផុតទៅមួយថ្ងៃហើយនោះ។
ការបោះឆ្នោតប្រធានាធិបតីអាមេរិកនៅឆ្នាំនេះ មានដំណើរការយឺតយ៉ាវ ក៏ព្រោះតែវិបត្តិសុខភាពសកលដែលបណ្ដាលមកពីការឆ្លងរីករាលដាលនៃវីរុសកូរ៉ូណា ជាពិសេសនៅសហរដ្ឋអាមេរិកផ្ទាល់តែម្ដង។
សារព័ត៌មាន BBC បានចុះផ្សាយថា ពលរដ្ឋអាមេរិករាប់លាននាក់បានជ្រើសរើសការបោះឆ្នោតតាមរយៈការផ្ញើសន្លឹកឆ្នោតតាមប្រៃសណីយ៍ ហើយរដ្ឋខ្លះមិនអនុញ្ញាតឱ្យមានការបោះឆ្នោតមុននោះឡើយ។
នីតិវិធីនៃការបោះឆ្នោតនៅអាមេរិក បានអនុញ្ញាតឱ្យពលរដ្ឋរបស់ខ្លួនអាចបោះឆ្នោតមុនថ្ងៃកំណត់បាន ប្រសិនបើពលរដ្ឋណាម្នាក់ជាប់បំពេញការងារឬភារកិច្ចចាំបាច់ខានមិនបាននោះ៕