ពលរដ្ឋរស់នៅតំបន់រង្វង់មូលកួរស្រូវ បានវិលត្រលប់ទៅផ្ទះនិងកន្លែងរកស៊ីរបស់ខ្លួនវិញជាបណ្ដើរៗ បន្ទាប់ពីទឹកជំនន់ដែលហូរចេញពីស្ទឹងព្រែកត្នោតបានស្រកចុះ។ បន្ទាប់ពីត្រលប់មកវិញ ពួកគាត់បានរៀបរាប់ពីទំហំនៃការខូចខាតនៅផ្ទះរបស់គាត់រៀងៗខ្លួន និងថា មិនចង់ឃើញមានគ្រោះទឹកជំនន់បែបនេះនៅឆ្នាំក្រោយៗទៀតនោះទេ។
បន្ទាប់ពីត្រលប់មកផ្ទះវិញកាលពីថ្ងៃអង្គារ ទី៣ ខែវិច្ឆិកា អ្នកស្រី វណ្ណា អាយុ៤២ឆ្នាំ បានចាប់ផ្ដើមបើកតូបកាហ្វេរបស់គាត់ឡើងវិញ នៅក្នុងបុរីវីអាយភី (VIP) ក្នុងសង្កាត់ស្ពានថ្ម ខណ្ឌដង្កោ រាជធានីភ្នំពេញ កាលពីថ្ងៃទី៤ ខែវិច្ឆិកា បន្ទាប់ពីបិទជាងកន្លះខែដោយសារទឹកជំនន់កន្លងទៅ។
អ្នកស្រីមានប្រសាសន៍ថា សម្ភារក្នុងផ្ទះអ្នកស្រីដែលមានដូចជា តុ ទូ កៅអី ទូរទឹកកក រួមទាំងតូបកាហ្វេរបស់អ្នកស្រីផង ត្រូវបានទឹកលិចបំផ្លាញខូចស្ទើរទាំងស្រុង ដែលគិតជាទឹកប្រាក់មិនតិចជាង៥០០ដុល្លារនោះទេ។
អ្នកស្រីមានប្រសាសន៍ថា៖ «សរុបជាលុយ គ្រាន់តែទូរទឹកកកមួយ៣០០ជាង តុបាយមួយក៏ខូចអស់! វាចូលតែ៤ ទៅ៥ ទៅ៦រយហ្នឹង! ទូរលក់កាហ្វេទៀត គ្រូឯងមកមើលមើ! របើកអស់! តែមិនដឹងធ្វើម៉េច! ផ្ទះអ្នកផ្សេងៗខូចខាត ដូចផ្ទះនោះអី គ្នារបើកការ៉ូអស់ហើយ ខ្ញុំសុទ្ធតែកៅអី មើលមើ! ស្លែឡើងញ៉ុកអស់ អាហ្នឹងសុទ្ធតែដុសសាប៊ូ នៅតែអ៊ីចឹង វាមិនខូច?»
បុរសវ័យ៣២ឆ្នាំមួយរូបទៀត លោក នេត្រ ភឿន ដែលមានផ្ទះនៅក្នុងបុរីរតនៈ សង្កាត់ស្ពានថ្ម ខណ្ឌដង្កោ រាជធានីភ្នំពេញ បានឱ្យដឹងថា ផ្ទះរបស់លោកបានរងនូវការជន់លិចដោយជំនន់ទឹកភ្លៀង ដែលធ្វើឱ្យលោកត្រូវបង្ខំចិត្តនាំសមាជិកគ្រួសារទៅស្នាក់នៅជាបណ្តោះអាសន្នឯស្រុកកំណើតក្នុងខេត្តព្រៃវែង។
គ្រួសារលោក នេត្រ ភឿន បានវិលត្រលប់មកលំនៅដ្ឋាននៅរាជធានីភ្នំពេញវិញកាលពីសប្តាហ៍មុន បន្ទាប់ទឹកបានស្រក។ លោកបន្តថា ផ្ទះរបស់លោករងការខូចខាតតិចតួចប៉ុណ្ណោះ ខណៈលោកវាយតម្លៃថា អស់ត្រឹមប្រមាណ១០០ដុល្លារ។
ទោះជាយ៉ាងណា លោកមិនបន្ទោសករណីជន់លិចនេះទៅលើអ្នកណានោះទេ ដោយថា វាជារឿងចៃដន្យដែលមិនអាចទប់ស្កាត់បាន។
លោក ភឿន និយាយថា៖ «រាល់ឆ្នាំមិនដែលលិចទេ ទើបតែឆ្នាំនេះទេដែលលិច ដោយសារបាក់ទំនប់ វាចំពេក ដល់អញ្ចឹងគេទប់ម៉េចទាន់! បើបាក់មកហើយដល់អញ្ចឹង គ្នាទប់ម៉េចទាន់! ខ្លះគេចេះតែខ្លាចក្រែង ក្រែង[កន្លែង]ហ្នឹងខ្ពស់ហើយ! បុរីនេះ គេចាក់ខ្ពស់ហើយ វាលិចបានត្រឹមហ្នឹង»។
នៅតាមផ្លូវមួយចំនួនក្នុងខណ្ឌដង្ហោ នៅតែមានទឹកនៅប្របនៅតាមផ្លូវដដែល ដែលផ្លូវខ្លះត្រូវទឹកកាត់ផ្ដាច់ទៀតផង។ ថ្វីត្បិតតែទឹកបានស្រកចុះក្ដី តែវានៅតែបន្សល់ស្នាមលិចនៅតាមផ្ទះនីមួយៗមិនតិចជាងកន្លះម៉ែត្រនោះទេ។
សម្រាប់ពលរដ្ឋដែលរស់នៅក្នុងសង្កាត់ព្រែកថ្មី បានឱ្យដឹងថា ទឹកពេលដែលឡើងខ្ពស់បំផុតគឺដល់ដើមទ្រូងឯណោះ ហើយមានកន្លែងខ្លះជ្រៅដល់ផុតក្បាលមនុស្សទៀតផង។
បន្ទាប់ពីបាយថ្ងៃត្រង់រួច អ្នកបោះដុំភេសជ្ជៈនៅជិតផ្សារព្រែកជ្រៃ លោក យ៉ង់ យឿន អាយុ៥៧ឆ្នាំ បានឱ្យអ្នកយកព័ត៌មាន VOD ដឹងថា កន្លែងផ្ទុកសម្ភាររបស់លោក ត្រូវទឹកលិចត្រឹមដើមទ្រូងមនុស្ស បណ្តាលឱ្យខូចខាតអស់ជាច្រើន ដែលគិតជាលុយមិនតិចជាង៣ពាន់ដុល្លារនោះទេ។
លោកថា៖ «Pocarisweat [ភេសជ្ជៈ] អីវ៉ិន! ឥលូវមិនដឹងនៅឯណាទេ ព្រោះអីវាអណ្ដែតច្រឡូកច្រឡំគ្នាទៅ មិនដឹងទៅណាទៅណី! ហើយហ្នឹងអាណាស្រង់បានណា! ហើយអាណាស្រង់មិនបាន អ្ហែងអណ្ដែតទៅណាទៅៗ ព្រោះពេលយើងបើកទ្វារមិនបានប្រុងប្រយ័ត្ន វាចេញមកតែម្ដង ហើយយើងចាប់បានក៏បោះចូលវិញទៅ អាណាចាប់មិនទាន់ ក៏ទៅៗ។ វាខូចៗអាគ្រឿងដែក ដូចជា កំប៉ុងទឹកដោះគោ កេសទឹកដោះគោអីវ៉ិនហ្នឹង! កាលណាតែច្រែសគឺគេអត់ទិញយើងទេ ហើយក្រុមហ៊ុនក៏មិនទទួលយកវិញដែរ ដល់អញ្ចឹងពូខ្ជិល ពូបោះចោលតែម្ដង! អាណាដែលខូច មានច្រែសមានអី បោះចោលហ្មងទៅ»។
ក្រៅពីអីវ៉ាន់ដែលខូចបោះចោល លោក យ៉ង់ យឿន ក៏ត្រូវបកកេសស្រាបៀរដែលត្រូវទឹកសើមនិងលាងសំបកកំប៉ុង ដើម្បីរង់ចាំច្រកដាក់កេសថ្មីផងដែរ។
បើទោះបីរងផលប៉ះពាល់បែបនេះក្ដី ក៏ពលរដ្ឋដែល VOD សម្ភាស បាននិយាយថា គាត់មិនចង់បានជំនួយអ្វីនោះទេ ដោយគ្រាន់តែចង់ឱ្យរដ្ឋបាលរាជធានីភ្នំពេញ រៀបចំប្រព័ន្ធរំដោះទឹកឱ្យប្រសើរ ដើម្បីបញ្ចៀសទឹកកុំឱ្យជោរជន់ដូចឆ្នាំនេះតទៅទៀត។
ទឹកជំនន់ស្ទឹងព្រែកត្នោតក្នុងខណ្ឌដង្កោ បានជន់ឡើងខ្លាំងកាលពីយប់ថ្ងៃទី១៣ ខែតុលា និងបានហូរច្រាលខ្លាំងទៅតំបន់កួរស្រូវក្នុងខណ្ឌដង្កោ នៅថ្ងៃទី១៤ ខែតុលា ក្រោយពីទំនប់ចម្ការតែ នៅខ្នងភ្នំគិរីរម្យដែលស្តុកទឹក៥លានម៉ែត្រគូប បានបាក់ ស្របពេលដែលមានភ្លៀងធ្លាក់ច្រើនដោយសារឥទ្ធិពលព្យុះ។
រដ្ឋបាលរាជធានីភ្នំពេញ និងកម្លាំងសង្គ្រោះ បានចេញប្រតិបត្តិការសង្គ្រោះជាបន្តបន្ទាប់ ខណៈរដ្ឋបាលរាជធានី ឱ្យដឹងថា ទឹកជំនន់នេះបានបង្កផលប៉ះពាល់ដល់ប្រជាពលរដ្ឋប្រមាណជាង៥ ០០០គ្រួសារ ក្នុងខណ្ឌដង្កោ ក្នុងនោះពលរដ្ឋប្រមាណជាង៣ពាន់គ្រួសារ ត្រូវបានជម្លៀសទៅកាន់កន្លែងមានសុវត្ថិភាព។
អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្ដី មានប្រសាសន៍ប្រាប់ VOD យ៉ាងខ្លីថា នៅពេលនេះ សាលារាជធានីកំពុងវាយតម្លៃពីផលប៉ះពាល់នៃទឹកជំនន់នេះ ខណៈមិនទាន់អាចបញ្ជាក់លម្អិតបាននោះទេ ដោយលោកជាប់ប្រជុំ។
ចំណែកអ្នកនាំពាក្យក្រសួងសាធារណការ និងដឹកជញ្ជូន លោក គង់ វិមាន មានប្រសាសន៍ថា នៅពេលនេះ មន្ត្រីជំនាញរបស់ក្រសួងបានសហការជាមួយក្រសួងពាក់ព័ន្ធ ដើម្បីស្រង់ទិន្នន័យពីការខូចខាតដោយជំនន់ទឹកភ្លៀងនៅតំបន់កួរស្រូវ និងរៀបចំផែនការអភិវឌ្ឍន៍ប្រព័ន្ធរំដោះទឹកនៅក្នុងតំបន់នោះហើយ។
ទោះយ៉ាងណា លោកមិនទាន់អាចបញ្ជាក់លម្អិតនៅឡើយទេ ដោយរង់ចាំការពិភាក្សានិងវាយតម្លៃចប់សិន។
លោកបានថ្លែងថា៖ «តាមពិតមាននៅក្នុងផែនការមេរបស់ក្រសួងហើយ ក្នុងផែនការសាងសង់របស់យើង គឺគ្មានអ្វីប្រែប្រួលទេ ប៉ុន្តែទន្ទឹមនឹងនោះ យើងក៏ពិនិត្យពីលទ្ធភាពជាក់ស្តែងដែលកើតមាននៅក្នុងឆ្នាំនេះ ដើម្បីឱ្យយើងធ្វើការកែតម្រូវលើហេដ្ឋារចនាសម្ព័ន្ធ ជាពិសេស ស្ពាន លូទឹក តែម្តង។ អញ្ចឹងពាក់ព័ន្ធនឹងបញ្ហានេះ យើងត្រូវសិក្សារួមគ្នាជាមួយក្រសួងធនធានទឹកបន្តទៀត»។
ក្នុងផែនការអភិវឌ្ឍន៍ទីក្រុងនិរន្តរភាពសម្រាប់រាជធានីភ្នំពេញ ឆ្នាំ២០១៨ដល់២០៣០ ដែលចេញផ្សាយដោយក្រុមប្រឹក្សាជាតិអភិវឌ្ឍន៍ដោយចីរភាព ក្រសួងបរិស្ថាន សាលារាជធានីភ្នំពេញ និងវិទ្យាស្ថានបៃតងសកល បានលើកឡើងថា រាជធានីភ្នំពេញស្ថិតក្នុងភាពរងគ្រោះខ្លាំងចំពោះការជន់លិច ដោយសារទីក្រុងនេះស្ថិតក្នុងតំបន់ទំនាបដីល្បាប់មេគង្គ ប្រព័ន្ធរំដោះទឹកជំនន់មានភាពស្មុគស្មាញ ហើយវាកាន់តែធ្ងន់ធ្ងរពីការជន់លិចទៀតដោយសារការអភិវឌ្ឍអចលនទ្រព្យដែលគ្មានការត្រួតពិនិត្យលើហេដ្ឋារចនាសម្ព័ន្ធលូ និងប្រព្រឹត្តិកម្មទឹកកខ្វក់មិនគ្រប់គ្រាន់។
ក្នុងរបាយការណ៍នោះលើកឡើងថា៖ «ការជន់លិចក្លាយជាបញ្ហាកាន់តែធ្ងន់ធ្ងរឡើងនៅរាជធានីភ្នំពេញ។ ក្នុងរយៈពេល៥ឆ្នាំចុងក្រោយនេះ ការជន់លិចដែលមានសភាពធ្ងន់ធ្ងរ បានកើតឡើងប្រហែល៥ឆ្នាំម្ដង។ ការជន់លិចកាន់តែធ្ងន់ធ្ងរបែបនេះ គឺដោយសារការអភិវឌ្ឍពាណិជ្ជកម្មវិស័យឯកជននៅក្នុងតំបន់ដែលពីមុនមកគឺជាលំហបែតងសាធារណៈ បឹងធម្មជាតិ ឬតំបន់ដីសើម និងដែលកន្លងមកវាជាប្រព័ន្ធគ្រប់គ្រងទឹកជំនន់ធម្មជាតិ និងប្រព័ន្ធគ្រប់គ្រងទឹកកខ្វក់។ ក្នុងអំឡុងឆ្នាំ២០០៣ ដល់២០១៥ គេបានប៉ាន់ស្មានថា តំបន់វាលភក់ បឹង និងតំបន់ដីសើមនៅរាជធានីភ្នំពេញ បានថយចុះ៥០%»។
អ្នកស្រាវជ្រាវការអភិវឌ្ឍសង្គម លោកបណ្ឌិត មាស នី មានប្រសាសន៍ថា បញ្ហាជំនន់នៅតំបន់កួរស្រូវ គឺជាមេរៀនមួយដែលបង្ហាញថា ការអភិវឌ្ឍគឺចាំបាច់ត្រូវគិតពីប្រព័ន្ធបង្ហូរទឹកជាសំខាន់។
លោកបន្តថា ករណីនេះមិនអាចបន្ទោសតែទៅលើធម្មជាតិបាននោះទេ តែត្រូវចេះបញ្ចៀសនិងការពារខ្លួនពីគ្រោះធម្មជាតិ។
លោកថា៖ «កាលណាយើងឃើញថា វាលិច ហើយជន់យូរថ្ងៃ អាហ្នឹងកំហុស ចង់មិនចង់ វាបណ្ដាលមកពី ទី១ វាអាចមកពីការអភិវឌ្ឍទីក្រុងហ្នឹង វាអត់មានផែនការច្បាស់លាស់។ យើងចេះតែបណ្ដោយឱ្យអ្នកវិនិយោគទុនផ្ទះល្វែងចេះតែធ្វើទៅ ហើយអត់ដឹងថា ធ្វើហើយដាក់មនុស្សចំនួនប៉ុន្មានពាន់នាក់នៅកន្លែងហ្នឹង ហើយត្រូវការប្រព័ន្ធលូហ្នឹងប៉ុណ្ណា ដើម្បីឱ្យលូហ្នឹងវាហូរចេញទៅទាន់ពេលវេលា។ ទាំងអស់ហ្នឹង វាសុទ្ធតែជាកាតព្វកិច្ចរបស់អ្នករៀបចំអភិវឌ្ឍន៍ទីក្រុង»។
សម្រាប់ពលរដ្ឋដែលរងគ្រោះពីទឹកជំនន់នៅតំបន់កួរស្រូវវិញ ស្នើដល់រដ្ឋបាលរាជធានីភ្នំពេញ គួរជ្រើសរើសក្រុមហ៊ុនសាងសង់ណាមួយដើម្បីកសាងច្រាំងស្ទឹងព្រែកត្នោត ដោយថា ដើម្បីអាចធ្វើឱ្យវិធានការបញ្ចៀសជំនន់ស្ទឹងមានប្រសិទ្ធភាព។
លោក យ៉ង់ យឿន មានប្រសាសន៍ថា៖ «គ្រាន់តែឮគម្រោងទេ! ឮថា ឆ្នាំក្រោយហ្នឹង អាចនឹងធ្វើក្រវ៉ាត់សណ្ដរស្ទឹងហ្នឹង ចាក់បេតុងវិញ ព្រោះការធ្វើមុនៗគ្រាន់តែចាក់ថែមបន្ដិចៗ វាមិនបានស្ដង់ដារ ដល់លើកនេះឮគេថា ធ្វើយកស្ដង់ដារ។ តែនិយាយរួមទៅ ខ្ញុំមិនចោទប្រកាន់លើរដ្ឋាភិបាលយើងទេ បើក្រុមហ៊ុនធ្វើ វាល្អជាងរដ្ឋយើងធ្វើ។ រដ្ឋយើងធ្វើ ខ្ញុំឃើញដូចលំៗ តែបើក្រុមហ៊ុន គេមានកុងត្រាអី គេធ្វើបានល្អជាង»៕
