ស្ថានទូតកម្ពុជាប្រចាំសហរដ្ឋអាមេរិក បានប្រតិកម្មតបទៅនឹងក្រុមមេដឹកនាំជាន់ខ្ពស់បក្សប្រឆាំងរស់នៅនិរទេសខ្លួនឯងនៅក្រៅប្រទេស ដែលបានចោទស្ថានតំណាងកម្ពុជាមួយនេះថា បម្រើផលប្រយោជន៍ឱ្យបក្សកាន់អំណាច។
ក្នុងវីដេអូបង្ហោះនៅលើទំព័រហ្វេសប៊ុកអ្នកស្រី មូរ សុខហួរ កាលពីថ្ងៃម្សិលមិញនេះ អនុប្រធានគណបក្សសង្គ្រោះជាតិ លោក អេង ឆៃអ៊ាង ដែលកំពុងរស់នៅនិរទេសខ្លួនឯងនៅឯក្រៅប្រទេសនោះ បានថ្លែងថា លោកសោកស្ដាយ ក្រោយពីគ្មានមន្ត្រីរូបណានៅស្ថានទូតកម្ពុជាប្រចាំនៅរដ្ឋធានីវ៉ាស៊ីងតោន ចេញមកទទួលលិខិតឬផ្ដល់ព័ត៌មានដល់ពួកគេនោះ។
លោក អេង ឆៃអ៊ាង ថ្លែងថា៖ «ពួកយើងខ្ញុំសោកស្ដាយដែរ! ធម្មតា ឯកអគ្គរាជទូតត្រូវតែធ្វើកិច្ចការសម្រាប់ប្រជាជាតិខ្មែរ មិនត្រូវគិតពីរឿងនយោបាយទេ។ ពួកយើងខ្ញុំបានជូនដំណឹងមុនហើយថា ពួកយើងខ្ញុំនឹងយកលិខិតមកដាក់តាមរយៈឯកអគ្គរាជទូត»។
លោក ឆៃអ៊ាង បានថ្លែងបន្តថា៖ «អ៊ីចឹង ទូតហ្នឹងត្រូវតែដោះស្រាយនូវដំណើររបស់យើងខ្ញុំ។ កាលណាទូតអត់ទទួលខ្ញុំ តើឱ្យប្រជាពលរដ្ឋខ្មែររស់នៅសហរដ្ឋអាមេរិកហ្នឹង សង្ឃឹមលើអី?»
ប៉ុន្តែក្នុងសេចក្ដីថ្លែងការណ៍របស់ខ្លួនចេញថ្ងៃម្សិលមិញដែរនោះ អ្នកនាំពាក្យស្ថានទូតកម្ពុជាប្រចាំសហរដ្ឋអាមេរិក បានអះអាងថា ស្ថានតំណាងកម្ពុជាមួយនេះបានធ្វើការយ៉ាងជិតស្និទ្ធជាមួយពលរដ្ឋខ្មែរទូទៅ លើកលែងតែ«បុគ្គលក្រៅច្បាប់»តែប៉ុណ្ណោះ។
អ្នកនាំពាក្យស្ថានទូតកម្ពុជានិយាយថា៖ «ហេតុការណ៍ដែលបានកើតឡើងនៅមុខស្ថានទូតនៅព្រឹកថ្ងៃទី១០ ខែវិច្ឆិកា ឆ្នាំ២០២០ […] ពុំអាចត្រូវបានប្រើប្រាស់សម្រាប់ការចោទប្រកាន់ថា ស្ថានទូតមិនទទួលជួបពលរដ្ឋខ្មែរនោះឡើយ»។
ក្រុមមេដឹកនាំជាន់ខ្ពស់បក្សប្រឆាំង១១រូប ដែលកំពុងរស់នៅនិរទេសខ្លួនឯងនៅឯក្រៅប្រទេសចាប់តាំងពីបក្សប្រឆាំងដ៏ធំមួយនេះត្រូវបានតុលាការកំពូលរំលាយចោលកាលពីចុងឆ្នាំ២០១៧ បានព្យាយាមដាក់លិខិតមួយច្បាប់ទៅស្ថានទូតកម្ពុជាប្រចាំនៅរដ្ឋធានីវ៉ាស៊ីងតោនកាលពីថ្ងៃម្សិលមិញ ដើម្បីស្នើសុំទៅរដ្ឋមន្ត្រីក្រសួងមហាផ្ទៃ លោក ស ខេង ឱ្យផ្ដល់សុពលភាពលើលិខិតឆ្លងដែនរបស់ពួកគេឡើងវិញ។ ក្រុមមេដឹកនាំជាន់ខ្ពស់បក្សប្រឆាំង បានបញ្ជាក់នៅក្នុងលិខិតនោះថា ពួកគេមានបំណងវិលត្រឡប់មកកាន់កម្ពុជាវិញ។
វីដេអូរយៈពេល៥២នាទីដែលត្រូវបានបង្ហោះលើទំព័រហ្វេសប៊ុកអ្នកស្រី មូរ សុខហួរ កាលពីថ្ងៃម្សិលមិញ បង្ហាញឱ្យឃើញអនុប្រធានគណបក្សសង្គ្រោះជាតិ អ្នកស្រី មូរ សុខហួរ និងលោក អេង ឆៃអ៊ាង រួមជាមួយថ្នាក់ដឹកនាំជាន់ខ្ពស់២រូបទៀត បានកាន់លិខិតមួយច្បាប់ដើរទៅកាន់ច្រកចូលនៃស្ថានទូតកម្ពុជាប្រចាំនៅសហរដ្ឋអាមេរិក។
ក្នុងវីដេអូដដែលនោះ អ្នកស្រី មូរ សុខហួរ បានចុចកន្ដឹងទ្វាររបងស្ថានទូតចំនួន៣ដង ប៉ុន្តែគ្មាននរណាម្នាក់បើកទ្វារចេញមកផ្ដល់ព័ត៌មានឬឆ្លើយតបនឹងក្រុមមេដឹកនាំជាន់ខ្ពស់បក្សប្រឆាំងទាំងនោះទេ។
អ្នកស្រី មូរ សុខហួរ បានថ្លែងក្នុងវីដេអូនោះថា ក្រុមមេដឹកនាំជាន់ខ្ពស់ទាំង១១រូប មានបំណងវិលត្រឡប់មកកម្ពុជាវិញ ដើម្បីចូលរួមក្នុងសវនាការទៅតាមការកោះហៅរបស់តុលាការកម្ពុជា។
អ្នកស្រី មូរ សុខហួរ ថ្លែងថា៖ «បើយើងអត់មានអ្វីនឹងទៅផ្ទះវិញ មាតុភូមិយើងវិញ តើយើងទៅតាមផ្លូវណា? អ៊ីចឹងមិនគេនិរទេសយើង! អាហ្នឹងផ្ទុយស្រឡះនឹងមាត្រា៣៣ នៃរដ្ឋធម្មនុញ្ញកម្ពុជា»។
អ្នកស្រី សុខហួរ និងថ្នាក់ដឹកនាំជាន់ខ្ពស់បក្សប្រឆាំង៦០រូប ក្នុងនោះមានទាំងលោក សម រង្ស៊ី ផងដែរ ត្រូវបានសាលាដំបូងរាជធានីកោះហៅឱ្យចូលបំភ្លឺនៅថ្ងៃនេះ និងនៅថ្ងៃទី២៦ ខែវិច្ឆិកាខាងមុខនេះ ក្រោមការចោទប្រកាន់ពីបទ«រួមគំនិតក្បត់» «ញុះញង់ឱ្យប្រព្រឹត្តបទល្មើស» និងបទចោទ«ឧបឃាត» ឬប៉ុនប៉ងធ្វើរដ្ឋប្រហារ។
អ្នកស្រី សុខហួរ ថ្លែងបន្តថា៖ «នៅប្រទេសជាតិណាក៏គេត្រូវឱ្យពលរដ្ឋគេទៅស្រុកគេវិញ ហើយឱ្យស្ថានទូតហ្នឹងទទួលយកបណ្ដឹងក្ដី ការកង្វល់ក្ដីដែលពលរដ្ឋនៅក្រៅប្រទេសហ្នឹងគេមកពឹង។ ស្ថានទូតហ្នឹងតាមរយៈអគ្គរាជទូតហ្នឹង ត្រូវតែឆ្លើយតប។ អ៊ីចឹងថ្ងៃហ្នឹង ហេតុអីបានបិទទ្វារ?»
វីអូឌីមិនអាចស្វែងរកការបកស្រាយពីស្ថានទូតកម្ពុជាប្រចាំនៅឯសហរដ្ឋអាមេរិកបានទេ ហើយអ្នកនាំពាក្យក្រសួងការបរទេស លោក កុយ គួង បដិសេធបកស្រាយបន្ថែម ហើយប្រាប់ឱ្យយោងទៅលើខ្លឹមសារសេចក្ដីថ្លែងការណ៍ចេញដោយស្ថានទូតកម្ពុជាប្រចាំនៅរដ្ឋធានីវ៉ាស៊ីងតោន។
វីអូឌីក៏បានស្វែងរកការបកស្រាយពីអ្នកនាំពាក្យក្រសួងមហាផ្ទៃ លោក ខៀវ សុភ័គ ផងដែរ ប៉ុន្តែលោកមិនលើកទូរសព្ទ ខណៈអ្នកនាំពាក្យរដ្ឋាភិបាល លោក ផៃ ស៊ីផាន បានប្រាប់ឱ្យសាកសួរទៅអ្នកនាំពាក្យក្រសួងការបរទេស លោក កុយ គួង វិញ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ការស្នើសុំសុពលភាពលិខិតឆ្លងដែនឡើងវិញ ដើម្បីចូលរួមសវនាការនៅកម្ពុជានោះ ក្រសួងការបរទេសជាអ្នកសម្រេច។ ប៉ុន្តែលោកជឿថា រដ្ឋាភិបាលមិនអនុញ្ញាតិនោះទេ ដោយសារអ្នកទាំងនោះជាអ្នកប្រព្រឹត្តខុសច្បាប់ ហើយមិនទទួលស្គាល់រដ្ឋាភិបាលស្របច្បាប់ផងដែរ។
លោក សុខ ឥសាន ប្រាប់៖ «កុំថ្នាំងថ្នាក់អី ដែលស្ថានទូតនៅសហរដ្ឋអាមេរិកដែលគេបិទទ្វារ គេមិនទទួលពាក្យនោះ។ វារឿងធម្មតា អ្នកត្រូវច្បាប់មិនស្វាគមន៍អ្នកខុសច្បាប់ទេ ហើយអ្នកឯងពូកែ អ្នកឯងមិនទទួលស្គាល់រាជរដ្ឋាភិបាល មូលហេតុអ្វីអ្នកឯងលូនទៅរកស្ថានទូតរដ្ឋាភិបាលនៅបរទេស»។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា មានប្រសាសន៍ថា ដំណាក់កាលនេះ ស្ថានទូតកម្ពុជាពិបាកក្នុងការសម្រេចផ្តល់សុពលភាពលិខិតឆ្លងដែនឱ្យអតីតមន្ត្រីបក្សប្រឆាំង។ ប៉ុន្តែលោកថា បើមេដឹកនាំអាមេរិកថ្មីប្រកាន់គោលការណ៍ប្រជាធិបតេយ្យ នោះអាមេរិកអាចរកវិធីដោះស្រាយបញ្ហានេះជូនប្រជាពលរដ្ឋខ្មែរដែលរស់នៅអាមេរិក ដើម្បីឱ្យទទួលបានសេរីភាពពេញលេញ។
លោក ឯម សុវណ្ណរ៉ា មានប្រសាសន៍ថា៖ «ខ្ញុំគិតថា រដ្ឋាភិបាលអាមេរិក លោក បៃដិន ឡើងកាន់អំណាចនៅអាមេរិក បើកលំហសេរីភាពប្រជាធិបតេយ្យ យន្តការអាចដោះស្រាយបានហើយជាមួយកម្ពុជា។ ជាទូទៅ កម្ពុជាត្រូវឈរលើគោលការណ៍ប្រជាធិបតេយ្យ មិនអាចឈរគោលការណ៍ដូចបច្ចុប្បន្នទេ មានន័យថា បិទសិទ្ធិពលរដ្ឋណាមួយ កាលណាលុបប៉ាស្ព័រ [លិខិតឆ្លងដែន]ណាមួយ ឬក៏រដ្ឋាភិបាលអាមេរិកចាប់បញ្ជូន [មន្ត្រីបក្សប្រឆាំង]មកស្រុកខ្មែរ អាចប្រឈមនឹងកត្តារិះគន់ឬក៏ចរន្តនៃសង្គមប្រជាធិបតេយ្យហើយ»៕