ក្រសួងអប់រំកម្ពុជាបានសម្រេចឱ្យមន្ត្រីអប់រំថ្នាក់ជាតិធ្វើការតាមផ្ទះរៀងៗខ្លួន ដើម្បីទប់ស្កាត់ការឆ្លងរីករាលដាលនៃវីរុសកូរ៉ូណា បន្ទាប់ពីមានក្ដីបារម្ភអំពីការរីករាលដាលនៃវីរុស ពាក់ព័ន្ធនឹងដំណើរទស្សនកិច្ចប្រតិភូហុងគ្រីកាលពីសប្ដាហ៍មុន។
ក្នុងសេចក្ដីណែនាំនៅថ្ងៃនេះ រដ្ឋមន្ត្រីក្រសួងអប់រំ យុវជន និងកីឡា លោកបណ្ឌិត ហង់ជួន ណារ៉ុន បានសម្រេចឱ្យមន្ត្រីអប់រំទាំងអស់ ធ្វើការតាមផ្ទះរៀងៗខ្លួនតាមប្រព័ន្ធអនឡាញ និងផ្អាកការត្រួតពិនិត្យអវត្តមានមន្ត្រី។
ក្រសួងក៏បានណែនាំឱ្យបំពេញការងារតាមប្រព័ន្ធបច្ចេកវិទ្យានិងបណ្ដាញទំនាក់ទំនងសង្គម ដើម្បីរក្សាដំណើរការការងារនៃអង្គភាពអប់រំនៅទូទាំងប្រទេស។
រដ្ឋមន្ត្រីអប់រំ លោកបណ្ឌិត ហង់ជួន ណារ៉ុន ថែមទាំងបានណែនាំឱ្យអនុវត្តតាមវិធានការអនាម័យរបស់ក្រសួងសុខាភិបាល និងតាមដានសុខភាពមន្ត្រីអប់រំជាប្រចាំផងដែរ។
ក្រសួងអប់រំបានសម្រេចបែបនេះ បន្ទាប់ពីកម្ពុជាស្ថិតក្នុងក្ដីបារម្ភអស់រយៈពេល១សប្ដាហ៍មកហើយ ក្រោយពីព្រឹត្តិការណ៍ ៣វិច្ឆិកា ដែលសំដៅទៅដល់ដំណើរបំពេញទស្សនកិច្ចរបស់រដ្ឋមន្ត្រីការបរទេស និងពាណិជ្ជកម្មហុងគ្រី លោក ភីធ័រ ស៊ីចាតូ នៅក្នុងប្រទេសកម្ពុជា។
ប្រមុខការទូតហុងគ្រីរូបនេះ ត្រូវបានធ្វើតេស្តសុខភាព ហើយរកឃើញផ្ទុកវីរុសកូរ៉ូណា នៅពេលលោកធ្វើដំណើរទៅដល់ប្រទេសថៃ បន្ទាប់ពីបញ្ចប់ដំណើរទស្សនកិច្ចនិងចាកចេញពីប្រទេសកម្ពុជា នៅក្នុងថ្ងៃទី៣ ខែវិច្ឆិកានោះ។
អស់រយៈពេល១សប្ដាហ៍មកហើយ កម្ពុជាបានរកឃើញមនុស្ស៤នាក់ឆ្លងវីរុសកូរ៉ូណា បន្ទាប់ពីពួកគេបានប្រាស្រ័យទាក់ទងជាមួយគណៈប្រតិភូហុងគ្រី អំឡុងដំណើរទស្សនកិច្ចមួយថ្ងៃនោះ។
ទន្ទឹមគ្នានេះ កម្ពុជាបានប្រមូលមនុស្សដល់ទៅជិត១ ៥០០នាក់ហើយ ដើម្បីធ្វើតេស្តពិនិត្យសុខភាព បន្ទាប់ពីពួកគេជាប់ពាក់ព័ន្ធដោយផ្ទាល់និងដោយប្រយោលជាមួយនឹងព្រឹត្តិការណ៍ ៣វិច្ឆិកា៕