ក្រសួងសុខាភិបាលព្រមានចាត់វិធានការផ្លូវច្បាប់ចំពោះម្ចាស់ក្រុមហ៊ុនផលិតផលិតផលវេជ្ជសាស្ត្រ និងម្ចាស់ឱសថស្ថាន ដែលលក់ម៉ាស់និងផលិតផលសម្លាប់មេរោគក្នុងតម្លៃខ្ពស់ នៅចំពេលដែលកម្ពុជាមានក្ដីបារម្ភពីការឆ្លងរីករាលដាលនៃវីរុសកូរ៉ូណា បន្ទាប់ពីព្រឹត្តិការណ៍ ៣វិច្ឆិកាកន្លងមកនេះ។
ក្នុងលិខិតផ្ញើទៅម្ចាស់ក្រុមហ៊ុនផលិតផលិតផលវេជ្ជសាស្ត្រ និងម្ចាស់ឱសថស្ថាននានាទូទាំងប្រទេសនៅថ្ងៃនេះ ក្រសួងសុខាភិបាលប្រាប់ទៅឱសថស្ថានទាំងនោះ ឱ្យចែកចាយ ឬលក់ម៉ាស់និងផលិតផលសម្លាប់មេរោគដែលមានការបញ្ជាក់ពីក្រសួង។
ក្រសួងក៏បានណែនាំឱ្យលក់ម៉ាស់និងផលិតផលសម្លាប់មេរោគ រួមមាន ទឹកអាល់កុលឬជែលលាងដៃជាដើម នៅក្នុងតម្លៃថោកសមរម្យ ដើម្បីឱ្យប្រជាពលរដ្ឋមានលទ្ធភាពទិញយកទៅប្រើប្រាស់។
ក្រសួងសុខាភិបាលនិយាយថា៖ «ក្នុងករណីលោក លោកស្រីម្ចាស់គ្រឹះស្ថាន និងឱសថការីទទួលបន្ទុកបច្ចេកទេសគ្រឹះស្ថានខាងលើ ឬបុគ្គលណាដែលមិនគោរពតាមការណែនាំនេះ ក្រសួងសុខាភិបាលនឹងមានវិធានការតឹងរ៉ឹង ដោយធ្វើការផ្អាកសកម្មភាពអាជីវកម្មគ្រឹះស្ថាន និងវិធានការផ្សេងៗទៀតស្របតាមច្បាប់ជាធរមាន»។
ក្រសួងសុខាភិបាលបានព្រមានបែបនេះនៅចំពេលដែលកម្ពុជាមានក្ដីបារម្ភអំពីការឆ្លងរីករាលដាលនៃវីរុសកូរ៉ូណា ក្រោយពីដំណើរទស្សនកិច្ចរបស់រដ្ឋមន្ត្រីការបរទេសហុងគ្រី លោក ភីធ័រ ស៊ីចាតូ នៅកម្ពុជា កាលពីថ្ងៃទី៣ ខែវិច្ឆិកា។
រហូតមកដល់ថ្ងៃនេះ កម្ពុជារកឃើញមនុស្ស៤នាក់ហើយបានឆ្លងវីរុសកូរ៉ូណា បន្ទាប់ពីពួកគេជាប់ពាក់ព័ន្ធដោយផ្ទាល់ទៅនឹងដំណើរទស្សនកិច្ចរបស់គណៈប្រតិភូហុងគ្រីរូបនេះ៕
