តម្លៃប្រេងឥន្ធនៈនៅកម្ពុជា នឹងធ្លាក់ចុះបន្ថែមទៀតចាប់ពីថ្ងៃនេះរហូតដល់ចុងខែនេះ ចំពេលដែលកម្ពុជាកំពុងស្ថិតក្នុងក្ដីបារម្ភពីការឆ្លងរីករាលដាលនៃជំងឺកូវីដ១៩ ក្រោយដំណើរទស្សនកិច្ចរបស់ប្រតិភូហុងគ្រី។
ក្នុងសេចក្ដីជូនដំណឹងចេញនៅថ្ងៃនេះ ក្រសួងពាណិជ្ជកម្មបញ្ជាក់ថា តម្លៃប្រេងសាំងធម្មតា នឹងត្រូវដាក់លក់ក្នុងតម្លៃ២ ៩០០រៀល ខណៈប្រេងម៉ាសូត នឹងត្រូវដាក់លក់ក្នុងតម្លៃ២ ៦០០រៀលក្នុងមួយលីត្រ ចាប់ពីថ្ងៃទី១៦ រហូតដល់ថ្ងៃទី៣០ ខែវិច្ឆិកានេះ។
តម្លៃប្រេងឥន្ធនៈដែលគ្រោងដាក់លក់នៅពាក់កណ្ដាលសប្ដាហ៍ទីពីរនៃខែវិច្ឆិកានេះ បានធ្លាក់ចុះអស់៥០រៀលបន្ថែមទៀត បើធៀបទៅនឹងតម្លៃប្រេងឥន្ធនៈដែលត្រូវបានដាក់លក់រាយចន្លោះពីថ្ងៃទី១ ដល់ថ្ងៃទី១៥ ខែវិច្ឆិកានេះ។
ក្នុងសេចក្ដីជូនដំណឹងដដែលនោះ ក្រសួងពាណិជ្ជកម្មនិយាយថា ការបញ្ចុះតម្លៃប្រេងឥន្ធនៈនេះ ត្រូវបានធ្វើឡើងទៅតាមសេចក្ដីសម្រេចរបស់លោកនាយករដ្ឋមន្ត្រី ហ៊ុន សែន ដែលក្រសួងនេះអះអាងថា គឺដើម្បីសម្រួលដល់ជីវភាពប្រជាជន។
តម្លៃប្រេងឥន្ធនៈលក់រាយនៅកម្ពុជា បានធ្លាក់ចុះចំពេលដែលមានក្ដីបារម្ភអំពីការឆ្លងរីករាលដាលនៃជំងឺកូវីដ១៩ ក្រោយព្រឹត្តិការណ៍ ៣វិច្ឆិកា ដែលសំដៅដល់ដំណើរទស្សនកិច្ចរដ្ឋមន្ត្រីការបរទេសហុងគ្រី លោក ភីធ័រ ស៊ីចាតូ។
ប្រមុខការទូតហុងគ្រីរូបនេះ ត្រូវបានធ្វើតេស្តរកឃើញឆ្លងជំងឺកូវីដ១៩ នៅថ្ងៃទី៣ ខែវិច្ឆិកា ក្រោយគាត់បញ្ចប់ដំណើរទស្សនកិច្ចនៅកម្ពុជា ហើយនៅពេលគាត់ធ្វើដំណើរទៅដល់ប្រទេសថៃ។
គិតត្រឹមថ្ងៃនេះ មានតែមនុស្ស៤នាក់ប៉ុណ្ណោះនៅក្នុងចំណោមមនុស្សរាប់រយនាក់ដែលពាក់ព័ន្ធនឹងដំណើរទស្សនកិច្ចរបស់គណៈប្រតិភូហុងគ្រីនោះ ត្រូវបានធ្វើតេស្តនិងរកឃើញឆ្លងជំងឺកូវីដ១៩។
ក្រសួងសុខាភិបាលកម្ពុជាប្រកាសនៅព្រឹកថ្ងៃនេះថា សំណាកដល់ទៅ៣ ៩១៨ហើយ ត្រូវបានប្រមូលយកមកធ្វើតេស្ត ហើយលទ្ធផលតេស្តបង្ហាញសញ្ញាអវិជ្ជមាន លើកលែងតែមនុស្ស៤នាក់ប៉ុណ្ណោះដែលត្រូវបានរកឃើញឆ្លងជំងឺកូវីដ១៩រួចហើយនោះ៕