ក្រសួងសុខាភិបាលអំពាវនាវឱ្យអ្នកដែលពាក់ព័ន្ធនឹងព្រឹត្ដិការណ៍ ៣វិច្ឆិកា បន្តដាក់ខ្លួនឱ្យនៅដាច់ដោយឡែកឱ្យគ្រប់១៤ថ្ងៃ ដោយថា ដើម្បីចូលរួមទប់ស្កាត់ការចម្លងវីរុសកូវីដ១៩នៅកម្ពុជាឱ្យមានប្រសិទ្ធភាព។
ក្នុងសេចក្ដីប្រកាសព័ត៌មាន ចុះថ្ងៃទី១៦ ខែវិច្ឆិកា ឆ្នាំ២០២០ ក្រសួងសុខាភិបាលឱ្យដឹងថា ក្រសួងបានយកសំណាកអ្នកដែលពាក់ព័ន្ធនឹងព្រឹត្តិការណ៍ ៣វិច្ឆិកា មកធ្វើតេស្តលើកទី៣ ដែលមានចំនួន ១ ៣៥២ វត្ថុសំណាក គឺបង្ហាញលទ្ធផលអវិជ្ជមាននៃជំងឺកូវីដ១៩ទាំងអស់ ដែលជាលទ្ធផលល្អប្រសើរសម្រាប់កម្ពុជា។
ទោះជាយ៉ាងណា ក្រសួងជំរុញឱ្យអ្នកដែលពាក់ព័ន្ធនៃព្រឹត្តិការណ៍នេះ បន្តដាក់ខ្លួនឱ្យដាច់ដោយឡែកឱ្យគ្រប់១៤ថ្ងៃដោយត្រឹមត្រូវនិងហ្មត់ចត់ មុននឹងធ្វើតេស្តលើកទី៤នៅថ្ងៃពុធខាងមុខ។
អ្នកនាំពាក្យក្រសួងសុខាភិបាល លោកស្រីវេជ្ជបណ្ឌិត ឱ វណ្ណឌីន បានឱ្យអ្នកសារព័ត៌មានដឹងតាមសារអេឡិចត្រូនិចតេឡេក្រាមថា ការបន្តដាក់ខ្លួនដាច់ដោយឡែកបន្តទៀតឱ្យគ្រប់១៤ថ្ងៃ គឺជារឿងចាំបាច់បំផុត ដើម្បីឱ្យប្រាកដថា គ្មានការចម្លងវីរុសកូវីដ១៩ចេញពីព្រឹត្តិការណ៍៣វិច្ឆិកាបន្តទៀត។
លោកស្រីវេជ្ជបណ្ឌិត មានប្រសាសន៍ថា៖ «ការធ្វើតេស្តចុងក្រោយនេះ គឺជាការធ្វើតេស្តសំខាន់មែនទែនសម្រាប់ព្រឹត្តិការណ៍៣វិច្ឆិកា នៅក្នុងព្រះរាជាណាចក្រកម្ពុជារបស់យើង ហើយការសន្និដ្ឋានចុងបញ្ចប់នៃការចម្លងឬក៏មិនចម្លងវីរុសកូវីដ១៩ នៅក្នុងព្រះរាជាណាចក្រកម្ពុជារបស់យើង ហើយបើយើងនិយាយដោយឡែក ការចម្លងដែលពាក់ព័ន្ធនឹងព្រឹត្តិការណ៍៣វិច្ឆិកានេះ នឹងអាចវាយតម្លៃទៅបាន នៅពេលដែលលទ្ធផលលើកទី៤នឹងចេញបង្ហាញនៅថ្ងៃទី១៨ ខែវិច្ឆិកា ឆ្នាំ២០២០នេះ»។
លោកនាយករដ្ឋមន្ត្រី ហ៊ុន សែន បានសរសេរនៅលើទំព័រហ្វេសបុករបស់លោក កាលពីថ្ងៃទី១៤ ដោយបានលើកឡើងថា បើទោះបីលោកធ្វើតេស្តរកកូវីដ១៩ លើកទី៣ បានទទួលលទ្ធផលអវិជ្ជមានក្ដី ក៏លោកថា លោកនឹងបន្តដាក់ខ្លួនឱ្យនៅដាច់ដោយឡែកឱ្យគ្រប់ចំនួន១៤ថ្ងៃ និងជំរុញដល់អ្នកដែលពាក់ព័ន្ធព្រឹត្តិការណ៍៣វិច្ឆិកា បន្តដាក់ខ្លួនឱ្យគ្រប់តាមការណែនាំរបស់ក្រសួងសុខាភិបាលផងដែរ។
លោកសរសេរថា៖ «ទោះយ៉ាងណាក៏ដោយ ខ្ញុំនឹងបន្តធ្វើចត្តាឡីស័ករហូតដល់ថ្ងៃទី១៨ វិច្ឆិកា ដែលនឹងត្រូវធ្វើតេស្តលើកទី៤ និងជាលើកចុងក្រោយ ដែលខ្ញុំសង្ឃឹមថា នឹងមានលទ្ធផលអវិជ្ជមានទាំងខ្ញុំនិងភរិយា ព្រមទាំងបងប្អូនប្រមាណជាង១ ០០០នាក់ ដែលធ្វើចត្តាឡីស័កក្នុងពេលជាមួយគ្នាពីថ្ងៃទី៤ វិច្ឆិកា ២០២០ ដែលនឹងធ្វើឱ្យការព្រួយបារម្ភអំពីកូវីដ-១៩ ត្រូវបានកាត់បន្ថយនៅក្នុងរាជធានីភ្នំពេញនិងខេត្តកណ្តាល ដែលនឹងអាចឈានទៅបើកសាលារៀនឡើងវិញសម្រាប់ការសិក្សារបស់កូនចៅយើង»។
អ្នកដែលពាក់ព័ន្ធនឹងព្រឹត្តិការណ៍៣វិច្ឆិកាម្នាក់ សុំមិនបញ្ចេញឈ្មោះ បានលើកឡើងថា លោកបានដាក់ខ្លួននៅដាច់ដោយឡែកចំនួន១៣ថ្ងៃមកហើយ ដោយថា ការដាក់ខ្លួននៅដាច់ដោយឡែកនេះ ធ្វើឱ្យមានអារម្មណ៍តានតឹងណាស់ ជាពិសេសនៅពេលជិតដល់ថ្ងៃពិនិត្យចុងក្រោយ។
ទោះជាយ៉ាងណា លោកថា លោកព្យាយាមធ្វើការងារនិងហាត់ប្រាណដើម្បីបន្លប់អារម្មណ៍ស្មុគស្មាញនេះ។
លោកថា៖ «ថ្ងៃដំបូង គឺយើងព្រួយបារម្ភខ្លាំងបំផុតសម្រាប់ការធ្វើតេស្តហ្នឹងណា! ហើយអារម្មណ៍ពេលហ្នឹងគឺវាអត់ស្ងប់ទេ នៅពេលដែលយើងធ្វើតេស្តហើយភ្លាមៗអ៊ីចឹងណា ដល់ថ្ងៃពាក់កណ្ដាល អារម្មណ៍វាដូចធម្មតាហើយ តែនៅពេលដែលកៀកដល់ការពិនិត្យលើកទី២ លើកទី៣ ពិសេសនៅថ្ងៃទី២ អារម្មណ៍វារាងអត់ស្រួលដែរ ការគិតយើងច្រើនដែរទៅ ចេះតែបារម្ភចឹងទៅ។ ដល់ទី៣ ដូចធម្មតាទេ តែដល់ចន្លោះពីថ្ងៃទី៣ មកដល់ថ្ងៃនេះ យើងគិតថា វាដូចជាស្ត្រេសច្រើនជាងមុនអ៊ីចឹងណា ដោយសារតែក្នុងមួយរយៈហ្នឹង យើងនៅតែក្នុងបន្ទប់តែឯង ដែលយើងដើរទៅវិញទៅមករហូត»។
អ្នកសម្របសម្រួលគម្រោងនិងជាអ្នកផ្តល់ប្រឹក្សារបស់អង្គការ ធីភីអូ លោក ស៊ាង លាប មានប្រសាសន៍ថា ជាធម្មតា មនុស្សនៅពេលដែលត្រូវដាក់ឱ្យនៅដាច់ដោយឡែកតែម្នាក់ឯង ក្នុងរយៈពេលយូរ អាចធ្វើឱ្យពួកគេមានអារម្មណ៍ថាធុញថប់ ភ័យខ្លាច ឆាប់ខឹង អន់ចិត្ត។ លើសពីនេះទៀត លោកថា មនុស្សមួយចំនួននឹងចាប់ផ្ដើមបន្ទោសលើខ្លួនឯងដែលបណ្ដាលឱ្យមានរឿងនេះកើតឡើងមកលើខ្លួន។
លោកបន្ថែមថា៖ «អ៊ីចឹងវាធ្វើឱ្យខ្លួនគាត់អារម្មណ៍អត់ស្រួល អ៊ីចឹងដល់ពេលគាត់មានអារម្មណ៍ថា ពីមុន គាត់មានសេរីភាព ចង់ធ្វើអីបាន តែឥលូវគាត់នៅតែក្នុងផ្ទះអ៊ីចឹងណា! អ៊ីចឹងវាធ្វើឱ្យសម្ពាធផ្លូវចិត្តហ្នឹងវាកាន់តែកើនឡើងៗ ហើយមួយទៀត គឺភាពមិនច្បាស់លាស់នៃការឆ្លងហ្នឹង វាធ្វើឱ្យខ្លួនគាត់កាន់តែភ័យ។ អ៊ីចឹងជួនណាគាត់ឃើញគេបង្ហាញរោគសញ្ញាដែលពាក់ព័ន្ធកូវីដហ្នឹងយ៉ាងម៉េចៗ អ៊ីចឹងជួនណាទៅ [ខ្លួនគាត់] ចេញស្អីរាងប្លែកបន្ដិច គាត់ចាប់ផ្ដើមភ័យទៀតហើយ អ៊ីចឹងរឿងដែលធំមែនទែន គឺពាក់ព័ន្ធនឹងថប់អារម្មណ៍តែម្ដង»។
លោក ស៊ាង លាប បន្ថែមទៀតថា អ្នកដែលមានអារម្មណ៍បែបនេះ ត្រូវទាក់ទងទៅអ្នកជំនាញដើម្បីប្រឹក្សាយោបល់ ក៏ដូចជាជួយធ្វើឱ្យអារម្មណ៍របស់ពួកគេបានស្ងប់ផងដែរ។
លោកថា៖ «ការផ្ដល់ប្រឹក្សាតាមទូរសព្ទ វាជាបច្ចេកទេសមួយដែរ គ្រាន់តែខុសគ្នាបន្ដិចពីរឿងមួយឃើញ មុខមួយអត់ឃើញមុខតើ! ក៏ប៉ុន្ដែក្នុងផ្នែកចិត្តសាស្ត្រ គេមានបច្ចេកទេសក្នុងការថាគាត់និយាយមក យើងមានសមត្ថភាពអាចយល់បានថា តើគាត់មានអារម្មណ៍យ៉ាងម៉េច ថាគាត់កំពុងព្រួយបារម្ភឬមួយក៏គាត់ខឹងគាត់បន្ទោសខ្លួនឯង ព្រោះអ្នកខឹងទាំងខ្លួនឯង ខឹងទាំងអ្នកដទៃទៀត ហើយយើងនឹងបង្រៀនគាត់ឱ្យចេះធ្វើយ៉ាងម៉េចឱ្យអារម្មណ៍ស្ងប់ឱ្យធ្វើម៉េចឱ្យត្រជាក់ចិត្តវិញ»។
បើតាមលោក ស៊ាង លាប អ្នកដែលកំពុងដាក់ខ្លួនដាច់ដោយឡែក អាចទាក់ទងទៅអ្នកជំនាញអង្គការ TPO តាមរយៈហ្វេសបុកផេករបស់អង្គការដោយផ្ទាល់ក៏បាន។
គិតមកដល់ថ្ងៃ១៦ ខែវិច្ឆិកានេះ កម្ពុជាបានរកឃើញអ្នកឆ្លងជំងឺកូវីដ១៩ ចំនួន៣០២នាក់ ក្នុងនោះជាសះស្បើយចំនួន២៨៩នាក់ និង១៣នាក់កំពុងស្ថិតក្រោមការព្យាបាលបន្ត។
ចំពោះអ្នកជាប់ពាក់ព័ន្ធនឹងព្រឹត្តិការណ៍៣វិច្ឆិកាវិញ មានចំនួន១ ៧៤១នាក់ ត្រូវបានដាក់ឱ្យនៅដាច់ដោយឡែក ក្នុងនោះមាន៤នាក់ត្រូវបានរកឃើញវិជ្ជមានកូវីដ១៩៕
