រដ្ឋាភិបាលបានសម្រេចបង្កើតគណៈកម្មាធិការជាតិមួយសម្រាប់ដោះស្រាយបញ្ហាជនអនាថា ដែលស្ថាប័នថ្មីនេះដឹកនាំដោយរដ្ឋមន្ត្រីសង្គមកិច្ច។
ក្នុងសេចក្ដីសម្រេចចុះថ្ងៃទី១៧ ខែវិច្ឆិកា លោកនាយករដ្ឋមន្ត្រី ហ៊ុន សែន បានសម្រេចចាត់តាំងរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង សូត ឱ្យដឹកនាំគណៈកម្មាធិការជាតិដោះស្រាយបញ្ហាជនអនាថា។
ក្រៅពីរដ្ឋមន្ត្រីសង្គមកិច្ច លោក ហ៊ុន សែន ក៏បានចាត់តាំងមន្ត្រីឋានៈរដ្ឋលេខាធិការ ៥រូប អនុរដ្ឋលេខាធិការ ៩រូប អគ្គលេខាធិការកាកបាទក្រហមកម្ពុជាមួយរូប និងអភិបាលរាជធានីខេត្តទូទាំងប្រទេសជាសមាជិកក្នុងគណៈកម្មាធិការថ្មីនេះផងដែរ។
បើតាមសេចក្ដីសម្រេច គណៈកម្មាធិការថ្មីនេះ ត្រូវបានចាត់តាំងឱ្យទទួលបន្ទុកដោះស្រាយបញ្ហាជនអនាថានៅទូទាំងប្រទេស៕
