រដ្ឋាភិបាលអាមេរិកសម្រេចផ្ដល់ជំនួយមនុស្សធម៌បន្ថែមទៀតទៅដល់ដៃគូនានា ដើម្បីគាំទ្រដល់កិច្ចខិតខំប្រឹងប្រែងឆ្លើយតបនឹងគ្រោះមហន្តរាយទឹកជំនន់នៅកម្ពុជាកាលពីខែតុលាកន្លងមកនេះ។
ការផ្ដល់ជំនួយមនុស្សធម៌របស់រដ្ឋាភិបាលអាមេរិកនេះ ត្រូវបានប្រកាសឱ្យដឹងនៅក្នុងសន្និសីទសារព័ត៌មានមួយធ្វើឡើងនៅឃ្លាំងស្តុកស្បៀងអាហាររបស់អង្គការកម្មវិធីស្បៀងអាហារពិភពលោក (WFP) នៅព្រឹកថ្ងៃនេះ។
ក្នុងសេចក្ដីប្រកាសព័ត៌មាននៅព្រឹកថ្ងៃនេះ សហរដ្ឋអាមេរិកតាមរយៈទីភ្នាក់ងារសម្រាប់ការអភិវឌ្ឍអន្តរជាតិ (USAID) នឹងផ្ដល់ថវិកា៦០ម៉ឺនដុល្លារនៅក្នុងជំនួយមនុស្សធម៌បន្ថែមទៀត ដើម្បីគាំទ្រដល់កិច្ចខិតខំប្រឹងប្រែងឆ្លើយតបនឹងគ្រោះទឹកជំនន់ធ្ងន់ធ្ងរនៅកម្ពុជាដែលបណ្ដាលមកពីព្យុះជាបន្តបន្ទាប់ និងភ្លៀងធ្លាក់ដ៏ជោកជាំចាប់តាំងពីដើមខែតុលាកន្លងមក។
អគ្គរដ្ឋទូតអាមេរិកប្រចាំកម្ពុជា លោក ផាក់ទ្រីក ម័រហ្វី (Patrick Murphy) ថ្លែងនៅក្នុងសេចក្ដីប្រកាសព័ត៌មានថា រដ្ឋាភិបាលអាមេរិកសម្រេចផ្ដល់ជំនួយបន្ថែមបែបនេះ ក៏ព្រោះតែតម្រូវការចាំបាច់របស់ប្រជាជនកម្ពុជាជាច្រើនដែលរងគ្រោះដោយទឹកជំនន់នៅឆ្នាំនេះ ហើយវាបង្ហាញនូវសាមគ្គីភាពជាមួយសហគមន៍រងគ្រោះផងដែរ។
លោក ម័រហ្វី បានថ្លែងទៅកាន់អ្នកសារព័ត៌មានថា លោកបានចុះទៅកាន់ខេត្តមួយចំនួននៅភាគពាយព្យប្រទេសកម្ពុជា ដែលរងគ្រោះដោយទឹកជំនន់កាលពីខែតុលាកន្លងមកនេះ ហើយលោកថា លោកបានឃើញដោយផ្ទាល់នូវពលរដ្ឋកម្ពុជារងគ្រោះយ៉ាងធ្ងន់ធ្ងរដោយសារទឹកជំនន់។
លោក ម័រហ្វី ថ្លែងថា៖ «នៅឆ្នាំនេះ កម្ពុជារងផលប៉ះពាល់ធ្ងន់ធ្ងរដោយសារទឹកជំនន់។ គ្រោះទឹកជំនន់នេះប៉ះពាល់ធ្ងន់ធ្ងរបន្ថែមទៀតទៅលើសហគមន៍ឬគ្រួសារដែលរងគ្រោះរួចទៅហើយដោយសារឥទ្ធិពលនៃជំងឺកូវីដ១៩»។
ជំនួយជាថវិកា៦០ម៉ឺនដុល្លារនេះ ត្រូវបានរដ្ឋាភិបាលអាមេរិកផ្ដល់ទៅអង្គការកម្មវិធីស្បៀងអាហារពិភពលោករបស់អង្គការសហប្រជាជាតិ (WFP) បន្ថែមទៅលើជំនួយលើកដំបូងទំហំ១០ម៉ឺនដុល្លារ ដែលអាមេរិកផ្ដល់ទៅអង្គការមួយនេះឆ្លើយតបភ្លាមៗទៅនឹងគ្រោះទឹកជំនន់នៅកម្ពុជា។
បើតាមសេចក្ដីប្រកាសព័ត៌មាន ជំនួយជាថវិកាទំហំ៦០ម៉ឺនដុល្លារនេះ នឹងត្រូវអង្គការកម្មវិធីស្បៀងអាហារពិភពលោក ផ្ដល់ជាជំនួយបន្ទាន់ជួយទៅដល់ពលរដ្ឋជិត៤ពាន់គ្រួសារដែលរងគ្រោះដោយទឹកជំនន់នៅខេត្តគោលដៅ ដូចជា ពោធិ៍សាត់ បាត់ដំបង និងបន្ទាយមានជ័យ។
នាយកអង្គការកម្មវិធីស្បៀងអាហារពិភពលោកប្រចាំប្រទេសកម្ពុជា អ្នកស្រី គ្លែរ ខូនែន (Claire Conan) បានថ្លែងថា គ្រោះទឹកជំនន់នៅកម្ពុជាកាលពីខែតុលាកន្លងមកនេះ បានប៉ះពាល់ពលរដ្ឋកម្ពុជាដល់ទៅ៨សែននាក់ និងផ្ទះសម្បែងពលរដ្ឋដល់ទៅជាង១៦ម៉ឺនខ្នង។
ប្រទេសកម្ពុជាបានទទួលរងភ្លៀងធ្លាក់ជាបន្តបន្ទាប់នៅខែតុលាកន្លងមកនេះ ដែលបង្កជាទឹកជំនន់ប៉ះពាល់ខេត្ត-រាជធានី ចំនួន២០នៅទូទាំងប្រទេស។ របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) ចេញកាលពីថ្ងៃទី២៧ ខែតុលាកន្លងមកនេះ បង្ហាញថា មនុស្សដល់ទៅ៤៣នាក់បានស្លាប់ ពាក់ព័ន្ធនឹងទឹកជំនន់នៅចន្លោះខែកញ្ញា ដល់ខែតុលាកន្លងមកនេះ។
ភ្លាមៗក្រោយកម្ពុជារងគ្រោះទឹកជំនន់ ស្ថានទូតអាមេរិកប្រចាំនៅកម្ពុជាបានប្រកាសឱ្យដឹងពីការផ្ដល់ជំនួយទំហំ១០ម៉ឺនដុល្លារ សម្រាប់គាំទ្រដល់ការឆ្លើយតបបន្ទាន់ទៅនឹងគ្រោះទឹកជំនន់នៅកម្ពុជាកាលពីខែមុននេះ។
តំណាង WFP អ្នកស្រី ខូនែន អះអាងថា ជំនួយជាថវិកា១០ម៉ឺនដុល្លារដែលអាមេរិកផ្ដល់លើកដំបូងនោះ ត្រូវបានយកទៅប្រើប្រាស់សម្រាប់បែងចែកស្បៀងអាហារដល់ពលរដ្ឋ ២ ៥៦០គ្រួសារនៅក្នុងខេត្តពោធិ៍សាត់ ជាខេត្តដែលរងគ្រោះដោយទឹកជំនន់ធ្ងន់ធ្ងរជាងគេ។
អ្នកស្រី គ្លែរ ខូនែន ថ្លែងទៅកាន់អ្នកសារព័ត៌មានថា៖ «គ្រោះទឹកជំនន់នេះ គឺជាបន្ទុកមួយធ្ងន់ធ្ងរសម្រាប់ស្ថានភាពរស់នៅរបស់ប្រជាពលរដ្ឋ ដែលរងគ្រោះរួចទៅហើយដោយសារវិបត្តិកូវីដ១៩»។
ស្ថានទូតអាមេរិកបាននិយាយថា រដ្ឋាភិបាលអាមេរិកបានផ្ដល់ជំនួយមានតម្លៃដល់ទៅជិត១៣លានដុល្លាររួចមកហើយចាប់តាំងពីឆ្នាំ២០០០មក ខាងផ្នែកឆ្លើយតបនឹងគ្រោះទឹកជំនន់ ការត្រៀមខ្លួន និងជំនួយកាត់បន្ថយហានិភ័យនៅកម្ពុជា៕