រដ្ឋាភិបាលប្រកាសថា និស្សិតកម្ពុជា ១២៨នាក់ ត្រូវបានដឹកជញ្ជូនត្រឡប់ពីប្រទេសអ៊ីស្រាអែលវិញនៅព្រឹកថ្ងៃនេះ ហើយនិស្សិតកម្ពុជា ២៥០នាក់ទៀត នឹងត្រូវបញ្ជូនទៅសិក្សានៅក្នុងប្រទេសនេះវិញផងដែរ។
ក្នុងសេចក្ដីប្រកាសព័ត៌មានម្សិលមិញនេះ ក្រសួងការបរទេសកម្ពុជា បានប្រកាសថា និស្សិតកម្ពុជា ១២៨នាក់ ដែលបញ្ចប់ការសិក្សាជំនាញកសិកម្មនៅអ៊ីស្រាអែល ត្រូវធ្វើដំណើរវិលត្រឡប់មកកម្ពុជាវិញនៅព្រឹកថ្ងៃពុធនេះតាមជើងហោះហើរត្រង់ពីអ៊ីស្រាអែលមកកម្ពុជា។
ក្រសួងបញ្ជាក់ថា និស្សិតកម្ពុជាទាំងនោះ ជួបប្រទះបញ្ហាលំបាកក្នុងការធ្វើដំណើរវិលត្រឡប់មកកម្ពុជាវិញ ដោយសារតែការរីករាលដាលនៃជំងឺកូវីដ១៩។
ក្រសួងការបរទេសក៏ប្រកាសឱ្យដឹងផងដែរថា និស្សិតកម្ពុជា ២៥០នាក់ ក៏ត្រូវដឹកជញ្ជូនតាមជើងហោះហើរដដែលនេះពីប្រទេសកម្ពុជាទៅកាន់ប្រទេសអ៊ីស្រាអែល ដើម្បីទៅសិក្សាជំនាញកសិកម្មនៅប្រទេសមួយនេះ៕