ក្រុមហ៊ុនអាកាសចរណ៍ជប៉ុន បានប្រកាសនៅថ្ងៃនេះ ក្រុមហ៊ុននឹងចាប់ផ្ដើមដំណើរឡើងវិញនូវជើងហោះហើរត្រង់ពីទីក្រុងតូក្យូមកកាន់រាជធានីភ្នំពេញនៅខែក្រោយនេះ។
ជើងហោះហើរតូក្យូ-ភ្នំពេញរបស់ក្រុមហ៊ុនអាកាសចរណ៍ All Nippon Airways (ANA) ត្រូវបានផ្អាកកាលពីខែមេសាក្នុងឆ្នាំនេះ ដោយសារតែក្ដីបារម្ភពីការឆ្លងរីករាលដាលនៃជំងឺកូវីដ១៩ ប៉ុន្តែ ក៏គ្រោងចាប់ផ្ដើមឡើងវិញនៅខែកញ្ញាកន្លងមកនេះដែរ។
ក្នុងសេចក្ដីប្រកាសព័ត៌មាននៅថ្ងៃនេះ ក្រុមហ៊ុនអាកាសចរណ៍ ANA បានប្រកាសថា ខ្លួននឹងដំណើរការឡើងវិញនូវជើងហោះហើរទៅកាន់ទីក្រុងនានាក្នុងតំបន់អាស៊ី អឺរ៉ុប និងអាមេរិកខាងជើង។
ក្រុមហ៊ុន ANA ប្រកាសថា ខ្លួននឹងចាប់ផ្ដើមជើងហោះហើរពីអាកាសយានដ្ឋានណារីតានៅទីក្រុងតូក្យូតមកកាន់រាជធានីភ្នំពេញនៅខែធ្នូខាងមុខនេះ។
បើតាមតារាងជើងហោះហើរ ក្រុមហ៊ុនអាកាសចរណ៍ជប៉ុនមួយនេះ នឹងប្រតិបត្តិការហោះហើរត្រង់ទៅមករវាងប្រទេសទាំងពីរចំនួន ២ជើងក្នុងមួយសប្ដាហ៍។
ក្រុមហ៊ុន ANA បានបើកជើងហោះហើរត្រង់រវាងប្រទេសកម្ពុជា និងជប៉ុនចាប់តាំងពីឆ្នាំ២០១៦មក មុននឹងក្រុមហ៊ុននេះផ្អាកជើងហោះហើររបស់ខ្លួនកាលពីដើមខែមេសាកន្លងមកនេះ៕
