អាជ្ញាធរខេត្តកណ្តាល អះអាងថា អាជ្ញាធរវៀតណាម បានរុះរើតង់ និងសំណង់រឹងចំនួន២៦កន្លែង ដែលពួកគេបានសង់នៅតាមបណ្តោយព្រំដែនមិនទាន់ឯកភាពគ្នា ក្នុងភូមិសាស្ត្រខេត្តនេះអស់ហើយ។
ការរុះរើតង់និងសំណង់រឹងនេះ ធ្វើឡើងតែមួយថ្ងៃ បន្ទាប់ពីមានការសន្ទនាតាមប្រព័ន្ធវីដេអូ រវាងលោកនាយករដ្ឋមន្រ្តី ហ៊ុន សែន និងនាយករដ្ឋមន្រ្តីវៀតណាម លោក ង្វៀង សួនហ្វុក កាលពីថ្ងៃទី២៤ ខែវិច្ឆិកា ឆ្នាំ២០២០ ម្សិលមិញ។
អភិបាលខេត្តកណ្ដាល លោក គង់ សោភ័ណ្ឌ ប្រាប់វីអូឌីនៅរសៀលថ្ងៃពុធនេះថា យោធាវៀតណាម បានរុះរើតង់ និងសំណង់រឹងចំនួន២៦កន្លែងចេញវិញអស់ហើយ នៅថ្ងៃនេះ។
កាលពីចុងខែសីហា ឆ្នាំ២០២០ ស្នងការនគរបាលខេត្តកណ្ដាល បានរាយការណ៍ថា វៀតណាម បានសាងសង់ជម្រករឹងមាំធ្វើពីឈើសសរថ្ម កម្ពស់៣ម៉ែត្រ ទំហំ៥ម៉ែត្រគុណនឹង៤ម៉ែត្រ ដំបូលប្រក់ស័ង្កសី ស្ថិតនៅចម្ងាយប្រមាណ១២០ម៉ែត្រ ពីខ្សែបន្ទាត់ព្រំដែនកម្ពុជា-វៀតណាមដែលមិនទាន់ឯកភាពគ្នា។ ការសាងសង់សំណង់រឹងរបស់ភាគីវៀតណាមនេះ ត្រូវបានអាជ្ញាធរខេត្តបញ្ជាក់ថា បានធ្វើជាបន្តបន្ទាប់រហូតដល់ ២៦ទីតាំង។
ក្រសួងការបរទេស និងសហប្រតិបត្តិការអន្តរជាតិកម្ពុជា បានឱ្យដឹងនៅក្នុងសេចក្តីប្រកាសព័ត៌មាន នៅថ្ងៃទី២៤ ខែវិច្ឆិកា ឆ្នាំ២០២០ថា ក្នុងជំនួបសន្ទនាតាមប្រព័ន្ធវីដេអូ រវាងនាយករដ្ឋមន្ត្រីកម្ពុជា និងនាយករដ្ឋមន្ត្រីវៀតណាម ភាគីទាំងពីរសាទរចំពោះការរីកចម្រើន និងកិច្ចសហប្រតិបត្តិការរវាងប្រទេសទាំងពីរកន្លងមក និងបន្តពង្រីកកិច្ចសហប្រតិបត្តិការឱ្យកាន់តែរឹងម៉ាំថែមទៀត។
សេចក្តីប្រកាសព័ត៌មាន បន្តថា នាយករដ្ឋមន្ត្រីទាំងពីរ ក៏បានសាទរការផ្ដល់សច្ចាប័នបំពេញបន្ថែមលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ និងសន្ធិសញ្ញាឆ្នាំ២០០៥ ព្រមទាំងលើពិធីសារទទួលស្គាល់ការខណ្ឌសីមា និងបោះបង្គោលព្រំដែនគោកឆ្នាំ២០១៩ រវាងប្រទេសទាំងពីរផងដែរ។
សេចក្តីប្រកាសព័ត៌មាន បន្ថែមថា រដ្ឋាភិបាលកម្ពុជា-វៀតណាម បានឯកភាពគ្នាពន្លឿននីតិវិធី ដើម្បីផ្លាស់ប្តូរលិខិតតូបកណ៍នៃការផ្ដល់សច្ចាប័នលើសន្ធិសញ្ញាបំពេញបន្ថែម និងពិធីសារឆ្នាំ២០១៩ ឱ្យបានឆាប់តាមដែលអាចធ្វើបាន។
អតីតតំណាងរាស្ត្របក្សប្រឆាំងដែលសកម្មរឿងព្រំដែន លោក អ៊ុំ សំអាន អះអាងថា រដ្ឋាភិបាល កំពុងរុញសន្ធិសញ្ញាបំពេញបន្ថែមដែលមិនទាន់ស្របច្បាប់ទៅស្របច្បាប់។ លោក ចាត់ទុកការពន្លឿននេះថា បានធ្វើឱ្យកម្ពុជាបាត់បង់ទឹកដីបន្ថែមទៀតទៅប្រទេសវៀតណាម។
លោកថា៖ «សន្ធិសញ្ញាឆ្នាំ១៩៨៥ដែលខុសច្បាប់ធ្វើឱ្យទៅជាស្របច្បាប់ ធ្វើឱ្យទៅជាផ្លូវការតាមសន្ធិសញ្ញាបំពេញបន្ថែមឆ្នាំ២០០៥ ឆ្នាំ២០១៩ ហើយរបបក្រុងភ្នំពេញដាក់ទៅសភាអនុម័តទៅ ស្ដីពីពិធីសារ ខណ្ឌសីមា នៃការបោះបង្កោលព្រំដែន ដែលសភាឯកបក្សអនុម័តថ្មីៗហ្នឹង ហើយព្រឹទ្ធសភាអនុម័តថ្មីៗដែរ ហើយគេនឹងបញ្ជូនទៅព្រះមហាក្សត្រឡាយព្រះហស្ថហត្ថលេខា ឱ្យទៅជាច្បាប់តែម្ដង ដើម្បីឱ្យទទួលស្គាល់ពិធីសារខណ្ឌសីមា និងការបោះបង្គោលព្រំដែន៨៤ភាគរយៈកន្លងមកនេះ»។
ប្រធានក្រុមប្រឹក្សាឃ្លាំមើលកម្ពុជា និងសមាជិកក្រុមប្រឹក្សាភិបាលនៃចលនានិស្សិត លោក ម៉ែន ណាត ជំរុញឱ្យរដ្ឋាភិបាលកម្ពុជា លុបចោលសន្ធិសញាបំពេញបន្ថែមទាំងអស់វិញ ដោយសារសន្ធិសញាបំពេញបន្ថែមនេះ ផ្ទុយពីរដ្ឋធម្មនុញ្ញ និងសន្ធិសញ្ញាទីក្រុងប៉ារីស។
លោកថា៖ «កម្ពុជា ដល់ពេលគិតគូរអំពីបញ្ហាជាតិខ្លួនឯង គិតគួរអំពីបញ្ហាពលរដ្ឋខ្លួនឯង ជាប្រទេសមានអធិបតេយ្យ ជាប្រទេសមានបូរណភាពទឹកដីពិតប្រាកដ ដូចដែលមានចែងក្នុងធម្មនុញ្ញដែល លោក ហ៊ុន សែន ត្រូវធ្វើ»។
តែយ៉ាងណា ប្រធានគណៈកម្មាធិការព្រំដែនកម្ពុជា លោក វ៉ា គឹមហុង ធ្លាប់បានអះអាងច្រើនលើកហើយថា ការបោះបង្គោលព្រំដែនរវាងកម្ពុជា និងវៀតណាម ត្រឹមត្រូវ១០០ភាគរយ ហើយលោកជំរុញអ្នកអះអាងថាមានបញ្ហា ឱ្យបង្ហាញភស្តុតាងត្រឹមត្រូវទៅកាន់គណៈកម្មាធិការរបស់លោក។
កាលពីថ្ងៃទី២ ខែវិច្ឆិកា ឆ្នាំ២០២០ រដ្ឋសភាបានអនុម័តលើសេចក្តីព្រាងច្បាប់ ស្តីពី ការអនុម័តយល់ព្រមលើពិធីសារខណ្ឌសីមានិងបោះបង្គោលព្រំដែនគោក រវាងព្រះរាជាណាចក្រកម្ពុជានិងសាធារណរដ្ឋសង្គមនិយមវៀតណាម ដោយសំឡេង១១៦លើ១១៦សំឡេង។
កម្ពុជា មានព្រំប្រទល់ដីគោកជាប់ប្រទេសវៀតណាមប្រវែង ១ ២៧០គីឡូម៉ែត្រ ដែលបច្ចុប្បន្នភាគីទាំងពីរបានឯកភាពគ្នាបោះបាន៨៤ភាគរយហើយ៕
